蘇山雞飯 Susan chicken rice：獨領風「蘇」

一向都鍾意食馬拉嘢，不過，就唔會太刻意專登去食，喜歡隨遇而安，而「蘇山雞飯」亦都無話刻意嚟，不過，撞啱約咗朋友過嚟長沙灣食飯，而聽住晌附近嘅親戚介紹，呢間主打星馬菜嘅食店，絕對喺平靚正嘅街坊飯堂。

睇門面都估計到，餐廳都應該唔細，間鋪確喺幾深長，一室木系配上藍調嘅座位，而地下黑白色大方格地磚，帶點馬拉懷舊茶室嘅感覺，加上牆上掛有唔少浮雕木繪，讓簡潔嘅裝修又不失雅氣。

餐牌蓋咗層膠，有啲反光，好在晌外面有啲外賣單張拎，掃瞄晒出嚟就一目了然，由招牌雞飯、推介、湯粉、蔬菜、小食、特色飲品到甜品，都充滿星馬風味，難得喺價錢貼地 ，又無加一，怪唔之得親友叫佢做飯堂啦。

此外，亦有一系列午餐、下午茶、個晚餐精選……等等，已有多款招牌菜式供選擇，包飲品，並有多種升級及加配優惠。

可以用二維碼落單，相信都唔使多介紹啦，店家唔收加一，喺親民嘅表現，再者，啲服務又好吖嘛，俾多少少貼士都值得。

順化炭燒豬肉串 +$20

既然有加配優惠，咁當然就用盡啲優惠啦，不過，印象中「順化」應該喺越南嘅一個城市，但都唔理咁多，好食就得。以為喺平常嘅一嚿嚿嘅豬肉，嚟到一睇喺豬肉棒，咁功夫就自然多咗，入口好鬆化，又充滿肉汁，唔知喺咪真喺炭燒，但確喺有陣陣炭火香。廿蚊3串，抵食到暈啦。

參巴醬通菜 +$20
呢個又喺抵食，無話因為加配，而份量就將貨就價，一樣載到滿大大碗，比起好多粉麵店還要大碟。雖然點菜時有得揀走辣，但走辣就失咗少少風味，況且，無走辣，其實都唔喺好辣。參巴醬類似我哋嘅蝦醬，食落非常鹹香惹味，帶微微辣，通菜又夠爽口。

獅城芽菜走地雞飯配輕怡新加坡白胡椒肉骨茶 $90
既然店名叫得雞飯，朋友就話梗喺叫雞飯啦，仲標明走地雞，仲配上白胡椒肉骨茶、雞油飯，包埋餐飲，絕對喺精選中嘅精選，完全唔使多諗，就揀佢。的確，單喺一整盤套餐送上嚟，賣相已好吸引，最搞嘢，揀咗少飯，都一大碗，再睇吓其他客，原來正常飯量喺會堆到成咗山咁。

睇外觀，個雞油飯有別平常所見，比較深色，問問店員，原來煮雞時，用上啲日本花菇、元貝、多種香料增味，加埋啲雞油、斑蘭汁，所以，個飯真喺色香味全，

用上走地雞，油脂會無乜，果然食落雞皮更爽下，皮下近乎零脂肪，啲肉又嫩滑，加上已去骨，啖啖肉；佐食嘅3款醬汁：秘製辣醬、薑蓉、黑醬油，夠晒傳統、地道，下面墊咗唔少怡保芽菜，外形短身肥嘟嘟，清爽有特色。

白胡椒肉骨茶飲落陣陣白胡椒香，少咗朕藥材味，對好多人嚟講變得輕怡易入口，豬肋排亦炆到好腍、好鬆化，啲肉一咬就開。依家天氣凍，飲呢個湯夠晒暖胃！

星洲龍蝦叻沙摻摻配鮮油咖央多士 $128

老早就相中呢個餐，因為有我鍾意食嘅叻沙，更配上龍蝦添，真喺無得唔點，再者，配埋同樣打算都會嗌嘅咖央多，真喺一個餐滿足兩個願望，合晒心水。嚟到果然好有睇頭，半隻大龍蝦，兼有好多配料，絕無欺場，摻摻份量又多，真心推介。

先講個叻沙湯，色澤略為淡色，但仍算濃郁鮮香，呷一啖，淡淡椰香慢慢滲出，夾雜富層次嘅香料味；一般叻沙多數伴有雞蛋、豆卜，呢度仲有魚片、魚蛋、芽菜、通菜，夠晒豐富，然後折開啲蝦肉，唔單止啖啖肉，仲非常爽口鮮甜，口感一流；配上摻摻，即油麵加米粉，夠地道啦，而且，份量真喺勁多。

鮮油咖央多士賣相夠晒邪惡，中間件牛油厚到呢，件多士烘得極之脆口，中間嘅咖央好清甜，搭上香滑鮮香嘅牛油，嗰份化學反應絕對唔喺一條公式講得明，只有試過你就知有幾好食。

鮮檸檬薏米水
套餐包鮮檸檬薏米水或基本熱飲，亦可加錢轉凍飲或特色飲品，但天寒地凍，當然飲杯熱飲暖和啲。入口有陣陣檸檬清香，飲到尾就見有好多薏米晌杯底，飲完感覺非常舒服。

多謝親友嘅推介，果然抵食，百零蚊就食到捧住個肚走，而且，味道非常之好。啲阿姐亦好有禮，見我哋每逢食完嘅嘢，都幫忙收搭，保持枱面整潔。

個人評分
味道：9/10
環境：7/10
服務：8/10
抵食：9/10
平均每人消費：HK$129

餐廳資料：
蘇山雞飯 Susan chicken rice
地址：長沙灣元州街411號義華大廈地下
電話：5648 8622