海傍美食店 Praya Shop：長洲搵食第二站：「糍」不達意

前文提要，清大假同老婆入嚟長洲宅渡假兩日一夜，先去咗「張保仔洞、鯆魚灣、五行石」兜個大圈，再返嚟大街嘅「餃子冰室」食晏，然後去渡假屋攞房。經過碼頭對開嘅「海傍美食店」，見到有唔少長洲名物「芒果糯米糍」，就建議買返去食，當喺飯後甜品。

睇睇凍櫃，有咩口味就見晒，款式唔多，包括芝麻、花生、芒果及榴槤，而芒果就有大個裝及細個裝。

店定仲拉埋張宣傳，純粹睇張宣傳，芒果、榴槤糯米糍日日新鮮製造。又加上極品二字，自然睇高一線。所以，都費事多諗，就要呢兩款口味。

芒果糯米糍 $12
「極品」之名就預咗肯定喺誇大架啦，不過，咬一啖，就失望到極點，底面兩層都厚，皮厚都算喇，啲芒果肉喺酸嘅就無得容忍啦！

榴槤糯米糍 $16
同樣都喺好厚皮，還好嘅喺啲皮都好煙糯、好軟熟，比起啲芒果，呢粒嘅榴槤餡就真喺好正喇，又香、又綿，榴槤味勁突出。

雖然粒榴槤糯米糍拉番唔少分，但都要俾個負評佢，原因之一，喺成張易拉架話「極品」，已經好流啦，其二，芒果唔熟都用嚟整俾客食，差唔多等同於用啲次貨食材，你叫隻炸雞翼食都預佢炸熟架。

個人評分
味道：5/10
環境：6/10
服務：6/10
抵食：7/10
平均每人消費：HK$14

餐廳資料：
海傍美食店 Praya Shop
地址：長洲海傍路30號地下
電話：2981 9638