伴糖水：暖意之伴

自問都好鍾意食甜品，無論中式、日式、西式……，當然，港式就更加要支持啦！所以，有晚經過佐敦柯士甸道，見到呢間「伴糖水」，裡面企滿人，好奇望望，原來喺主打傳統港式糖水嘅小店。

店家主打外賣，所以，店內地方唔大，就算放咗兩張高腳櫈，都只喺俾客人坐吓等外賣，佢哋喺不設堂食。

依家嘅甜品店已經去到進化再進化，好多口味都估佢唔到，非常創新，不過，總有啲時候癮起，就想番起啲以前既親切、又傳統嘅味道。店家所賣嘅糖水款式唔多，務求做到貴精不貴多，此外，亦兼賣幾款小食。

不過，有少少奇怪，門口嘅餐牌同裡面嘅餐牌喺有少少分別，點解會留意到？一陣講到碗西米露時再講。

不得不提，落單後，佢哋喺逐碗逐碗煮番起，好似啲生滾粥咁，夠熱焫，加上佢哋嘅外賣碗內層似喺有多一層隔熱層，所以，保溫力強，拎到返屋企都仲好夠熱。所以，服務一環，就俾多少少分。

香芋蓮子西米露 $38
就喺因為小弟點咗一款香芋蓮子西米露，先事後睇番啲相，發覺門口餐牌寫喺香芋西米露（無蓮子），裡面餐牌就寫香芋蓮子西米露，我最初喺望住裡面嘅餐牌落單，可能就咁講西米露，因為店內只有一款西米露產品，所以，最後返到屋企先發覺只喺碗香芋西米露，無咗蓮子，老婆有少少失望咁囉！

紅棗桂圓桃膠 $58
小弟一向都幾鍾意龍眼陣味，所以，揀咗呢一款招牌糖水，果然好足料，撈一撈，有好多紅棗、桂圓、桃膠，一啲都無欺場，非常大方，而個糖水底又好潤，啱晒近排乾燥嘅天氣食。再者，紅棗、桂圓都好清甜，桃膠晶瑩，有高纖同高蛋簡白質，夠晒有營，不愧喺招牌出品。

天寒地凍，飯後再加碗熱焫焫嘅糖水，感覺特別暖笠笠。

個人評分
味道：8/10
環境：7/10
服務：8/10
抵食：8/10
平均每人消費：HK$48

餐廳資料：
伴糖水
地址：尖沙咀柯士甸道144號祥景樓地下D號舖
電話：6733 9619