The Pizza Pig：「豬」事順利

自姨仔搬咗入坑口，喺會少咗機會見面，但總有啲藉口走埋一齊食餐飯。之前好幾次嚟D2 Place食飯，都喺夾埋姨仔嚟，今次都喺，我、老婆、姨仔，三人行，皆因賀一賀佢轉新工，順便又聚一聚。揀咗「The Pizza Pig」，因為睇過性價比唔錯，尤其啲長形薄餅，都幾有特色。

踏入餐廳，唔止地方大，仲好高樓底，所以，空間感十分強；周圍都有啲跟「豬」有關嘅擺設，配以柔和燈光，感覺幾唔錯。我哋被安排坐晌中間嘅卡位，非常闊落舒適，睇見咁有人氣，用餐氣氛都唔同啲。招呼非常好，不時幫忙添水，見有需要亦會更換餐碟，並且，侍應都好好禮貌。

餐牌好美式，十分巨型，希望都影得清楚啦。睇到店名有「Pizza」一字，主打就梗喺薄餅啦，仲有湯品、沙律、小食、前菜、主菜、意大利麵、意大利飯及甜品，睇見食物嘅款式，都非常之吸引。

飲品類亦有非常之多選擇，酒精類故然唔少啦，如生啤、支裝啤、紅白餐酒、汽酒、多種烈酒……等等，非酒精呢，亦多，奶昔、特飲、果汁、汽水、啡茶……等等，不過，老婆同姨仔都唔好飲嘢，小弟只點一杯果汁而已。

蕃石榴汁 $38
今餐都揀咗多少少味濃嘅食物，所以，專登要杯蕃石榴汁嚟清吓味蕾，飲落酸酸甜甜，確喺幾清爽，唔太凍，涼涼哋，啱晒。

蒜蓉白酒煮蜆 $138

小食、前菜類有成十多款，其實款款都想試，但最終揀咗煮蜆，因為薄餅同主菜都喺濃味嘢，前菜就揀清少少。咪以為得碟蜆，仲伴有兩片酸種麵包，賣相立體咗，而且，蜆嘅份量都好足，蜆肉肥美鹹鮮，充滿蒜香，仲有微微嘅白酒滲出嚟，非常之好食。另外，自家製嘅酸種麵包亦好出色，烘得微濃，十分香脆，有點韌性，再沾上底下嘅蒜香白酒汁，極具風味。

新豬肉全素薄餅 $168
薄餅有好多特別款式，唔喺平常見嗰啲，專登揀咗一款全素嘅，以無麩質做嘅薄餅底，用料包括新豬肉、純素水牛芝士及車打芝士、甜椒、紅洋蔥配蕃茄醬，15吋長形薄餅真喺好有睇頭，烘得一片金黃，甚是吸引。雖然話喺全素薄餅，食落一樣咁美味，味道絕對唔寡，好食；無麩質餅底亦都唔錯喎，幾軟熟。

烤斧頭豬扒 $298
呢款喺主菜中，廚師推介之一，曾經食過斧頭扒（牛），而斧頭豬扒直情喺第一次見，所以，都幾期待。餐牌已標明足有500g，所以，放到嚟真喺有「斧頭」咁嘅樣，非常大件、厚身，而面層鋪滿辣肉醬，再配菠菜、忌廉及蒜香蜜糖汁，喺一道好豐富嘅主菜。落刀已覺得啲豬扒好鬆化，入口果然喺靚料，配上辣肉醬，有辣勁，卻喺惹味到不得了；相反，菠菜嘅味道正正帶嚟反差，質感柔軟細嫩，忌廉汁也好香滑。

意大利芝士蛋糕 $88
最後來一點甜，餐牌更大膽標示「Best in Town」，當然，就更加要試試啦。首先，都幾大件，我哋3個人享用都覺得夠，而且，打橫一睇，可見喺用上意大利手指餅嚟做，更浸透咖啡酒，食落真喺充滿咖啡及酒香，夠濕潤，而馬卡風芝士層，打得挺身而柔滑，嗒得出微微芝士味，加上面層灑滿唂咕粉，朱古力香味十足，果然出色。

大家除咗講講近況，亦交談咗好多話題，姨仔順利轉新工，舅仔買樓最終又成事，正所謂諸事順利。遲啲冬至，應該又會有家族飯，雖然，疫情下日日確診數字近萬，同老婆都仲叫守得住，托賴未感染，不過，依家都有啲麻木，防疫盡量做啦，生活都要平衡吓嘅。

個人評分
味道：10/10
環境：9/10
服務：9/10
抵食：9/10
平均每人消費：HK$268

餐廳資料：
The Pizza Pig
地址：荔枝角長順街15號D2 Place二期地下G02號舗
電話：2806 1681