俊達信茶餐廳：「脂」不抵債

完咗聚會，同老婆各有各食，佢就同朋友飲茶，得番一支公，好彩仲有個老友同樣得一個，就問聚會所下面嘅茶記「俊達信 」食個午餐，簡簡單單費事周圍搵，香港地梗有一間茶記晌左近。其實呢間茶記開咗好多年喇 ，不過一直都試，因為比較心水喺附近嘅「太子小廚餐廳」。

環境都喺同大部分茶記差唔多，無玩懷舊，好街坊，但呢度勝在地方大，座位多，有細圓枱、大圓枱，卡位就唔使講啦，大電視送飯，又幾乾淨企理，尖峰時間都幾爆場架。

餐具、水杯、基本調味料放晒晌枱上，自由取用，仲一次過放埋一大壺水俾你。

茶記除咗平靚正之外，選擇亦喺無限多元化，好似乜都有咁，乜餐物餐、碟頭飯、湯粉麵、小炒……等等，不過此時此刻最抵食嘅都喺午餐啦，佢哋嘅午餐選擇唔多，只有五款，款款賣$45。唔啱食嘅可以晌主餐牌揀其他碟頭飯，貴啲之餘，飲品另外收錢。

例湯

嚟食午餐，除咗包嘢飲，亦都送埋例湯，啲阿姐都好好招呼，未點餐佢就送上例湯。是日喺簡簡單單嘅青紅蘿蔔煲豬骨老火湯，咁大量製作而用料夠足嘅話，都喺好唔錯嘅，最緊要都喺無加味精啫， 香港人工作繁忙，少湯水，所以就算有個例湯飲吓，都喺幾好㗎。

星洲炒米 $45
老友揀星洲炒米，茶記嘅炒粉飯麵另一賣點就喺夠大份，大大碟炒米即叫即炒，夠晒鑊氣。老友就講，碟炒米唔會話好食到飛起，但質素絕對喺穩打穩紮，有點點咖哩香， 同埋餸料多，而且，食到尾亦唔有好油嘅毛病。

吉列豬扒飯 $45
難得老婆無一齊食飯，咁就自然可以乘機放蹤少少，揀個熱氣又唔健康嘅吉列豬扒飯。都話茶記嘢喺抵食夾大件，兩大件豬扒炸得金黃，咬落香脆又唔會一口油，豬扒嘅肉質又算鬆化，不過就嫌佢個茄汁底少得可憐，俾多少少汁撈飯都好嘛。

熱奶茶
嚟茶記，就梗喺揀熱奶茶啦，佢哋沖得喺寧捨好飲，呢度嘅熱奶茶，都算出色，茶底既芳香馥郁，質感細滑，不過，暫時嚟講，我心目中最好嘅奶茶，都仲喺「太子」。

原來老友之後都喺無細藝，所以，兩個麻甩佬即慶行咗轉短山，順便幫助消化吓求先咁高脂嘅午餐。

個人評分
味道：8/10
環境：6/10
服務：7/10
抵食：8/10
平均每人消費：HK$45

餐廳資料：
俊達信茶餐廳
地址：葵涌青山公路412號葵星中心地舖
電話：2406 8233