火車頭酸辣小窩 LOCOMO：長洲搵食第三站：食好嘢，唔需「車」望！

話說同老婆入嚟長洲宅渡假兩日一夜，先玩長洲，翌日搭橫水渡過坪洲。晏晝飯試咗「餃子冰室」，果然無失望，不過，同場加映嘅「海傍美食店」，啲糯米糍唔喺好得，所以，嚟到晚餐，搵番間啱老婆心水嘅餐廳俾佢，事前已做定少少功課，「火車頭酸辣小窩」應該喺最十拿九穩，一定唔伏。

一來晌網上見到佢有唔少好評，二來熱焫焫嘅嘢食、蕃茄濃湯、濕濕哋嘅粉麵類就最啱佢。由於屬蚊型鋪，地方唔大，所以，好易坐滿，我哋都要等10min左右先等到兩個門口位。而一室黑與白，牆上有少少手繪作裝飾而已。

店家提供免費wifi，不過，晌度食嘢都唔好意思打躉太耐；而點餐，就以二維碼落單，揀咗乜一滿二楚。

咁有咩選擇先？睇分類以為有3大類：經典自選、超濃蕃茄湯、海蜆紫菜湯，但睇真啲，經典自選裡面其實共有6款湯底可選。此外，揀麵底、配料唔多講，相信無乜人唔識。後頁仲有拌麵、輕食供選擇，而每款粉麵，都奉送細豆漿或基本熱飲，當然，可以額外加錢轉其他飲品。

餐具方面，好似大多數茶記咁，藏晒晌枱下側邊嘅拉櫃中，自由取用，我就最鍾意呢個設計，唔使成日煩到啲店員。

超濃蕃茄湯烏冬 $60
如果只喺一般嘅米線、米粉就只需$52，但老婆甚喜歡烏冬，所以，寧願加$8改為稻庭烏冬，而餸料唔喺任揀，喺有10款指定組合，佢就要咗長洲魚蛋+墨魚春卷。

先講個湯，話晒叫超濃蕃茄湯，睇樣真喺勁紅、勁濃郁，滔一羹上嚟，都唔知話佢喺湯，定話佢喺蓉，勁多茄肉，裡面仲有啲車厘茄，所以，茄味之重就不用置疑，酸香鮮活。不過，老婆就略嫌太杰身，煮到好似蕃茄炒蛋嗰種茄蓉咁，唔喺太啱佢口感。而魚蛋同墨魚春卷都好食，魚蛋咬落爽彈，充滿魚味，而春卷食落好真材實料，唔會好似啲溝粉貨色咁；而啲烏冬都正，入口有韌勁，口感滑溜。

蜆肉紫菜湯米線 $58
我就比較心水個蜆肉紫菜湯，因為，呢款湯真喺少食到，個人覺得比較特別。成品登場，單睇牌面，真喺無欺場，有好多蜆肉同紫菜，而餸料揀咗豬軟骨，同樣份量有唔少，好豐富。

個湯底好鮮甜，好似有淡淡嘅「海水」鮮味咁，連埋啲紫菜，真喺清晒去，而蜆肉新鮮，夠肉地，食完睇見成兜蜆殼就知有幾足份量；而大大件豬軟骨都滷得入味，肉質又鬆化，好食。米線方面份量十足，口感彈牙有米香。

芒果乳酸 +$5、熱檸檬柚子茶 +$4
基本熱飲都喺檸茶檸水咖啡之類，難得呢度有好多特飲供選擇，仲要加錢唔多，絕對轉得過。小弟嘅芒果乳酸大大杯，入口酸酸甜甜好清爽，雖然芒果味唔及啲印度芒果酸奶（Mango Lassi）咁濃，但都好唔錯；老婆就喜歡熱飲，柚子茶勁啱佢，仲加埋檸檬，夠晒多維他命C啦。

雖然坐咗晌外面半露天位，但天氣只喺涼涼哋，喺有毛毛雨，不過，食完碗熱烘烘嘅米線，成個人暖晒之餘，力氣都返晒嚟。

個人評分
味道：9/10
環境：7/10
服務：7/10
抵食：9/10
平均每人消費：HK$64

餐廳資料：
火車頭酸辣小窩 LOCOMO
地址：長洲新興街36號地下
電話：2981 2022