2022年11月1日星期二

Prime Pho:賞心「越」目

記得好耐之前幫襯過一次「Prime Pho」,嗰時仲喺晌「擺花街」窄窄嘅舊鋪,因為嗰次有少少即興,亦唔方便影相,所以,食評就無寫喇。最近,先知佢搬咗去嘉咸市集「My Central」樓上,而正正約咗朋友食飯聚一聚,故就不如揀佢啦,就晒我,收工行過去都得嘛。
雖然「My Central」位置有少少隱蔽,但對晌中環返工嘅我,當然唔難搵,而比起舊鋪,呢度大好多,裝修簡約,水泥地,水泥牆,有少少似工業風嘅感覺。入門靠右全行都是面壁位,適合一、兩人,尤其放午飯時間,呢啲面壁位好搶手;而再入啲,就好見到好多四、六人枱,配以射燈,感覺唔錯,加上晚市較少人,用餐輕鬆。
睇店名,你都估到主打就喺越式湯粉,不過,搬到嚟新鋪,菜式就再進化,唔單止有湯粉,仲有沙律、炸物、越式小食、主菜、米紙卷、米紙薄餅、甜品、啤酒及特色飲品,可謂夠晒悅目。
此外,枱旁仲插咗一張餐牌,原來喺一啲特色飯品,為「飯桶」客人提供多一啲選擇。雖然想試嘅嘢好多,但簡簡單單試咗一款小食、一款越式法包及其招牌湯河。
bowl青檸梳打 $35
近排天氣叫涼咗,不過,有時又熱番,老友揀杯青檸梳打志在想爽吓。杯內唔止有半個青檸晌度,仲加咗好多薄荷葉,加上有汽嘅梳打,所以,非常之酸香清爽,襯晒一陣間個炸物小食。
bowl莞茜梳打 $35
之前就已經試過莞茜可樂,覺得又幾OK喎,所以,貪得意試試莞茜梳打。一睇就見有好多莞茜蓉浮晒晌面,聞到聞得到嗰陣陣莞茜嘅草青味,入口莞茜味好強勁,一湧而出,感覺清爽,又無話好怪。
bowl炸賓墟 $58
一客有4件,賣相色彩繽紛,睇餐牌就知,以越南特色小食炸米餅為基礎,加上蔥油、越南沙嗲醬、櫻花蝦同豬肉鬆,仲有啲黑魚籽,配上一片蕃茜,做得精緻。入口米餅香脆不膩,味道紛陳具層次,一口米餅,一口梳打,真喺夠晒爽呀!
bowl火燒牛腩越式法包 $88
越式法包一向都幾有特色,目測大概有8吋長嘅法包塞滿好多餡料,有牛腩肉、扎肉、雞肝醬、酸蘿蔔絲、生菜、金不換,包得大大份,一啖過咬落去真唔喺件易事,然而,法包外層超脆,包心軟綿,所有食材混合起嚟令味道多元,口感豐富,仲伴有4片蝦片過過口癮添。
bowlPrime Pho bo $148
越式湯河有一款叫「火車頭」,即喺大堆頭嘅什錦湯河,然後,呢一碗招牌湯河可以叫做超級火車頭,單睇牌面,寫到明餸料就有封門柳、牛脷、牛腩、牛丸、牛展、牛筋、牛尾同扎肉,配上自家製油條 ,而湯底喺24小時熬煮嘅牛湯,好大碗,夠2-3人共享。
先試啖湯,湯底果然夠晒濃鮮,香而不濁,真喺每啖都喺精華,我哋兩個差唔多都飲晒啲湯咁滯。
自家製嘅油條亦具亮點,因為混入咗金不換搓成嘅蓉,入口陣陣香味,可以講喺越式嘅意大利香草包,不妨又沾少少牛湯嚟食,另有一番滋味。
而啲餸料,雖然無逐樣影出嚟,但份量絕無欺場,一次過試到咁多唔同牛嘅部位,啱晒多心嘅客人。試晒各部位後,真喺無咩好挑剔,最愛就喺封門柳、牛脷同牛尾,皆因肉味同肉質,都喺別具特色。
今餐雖然都喺食越南嘢,但前後試咗幾樣嘢,都各有賣點,喺一餐不平凡嘅越南菜。不得不提,店員除招呼好之外,對食物都甚了解,問佢哋少少有關菜式及食材嘅嘢,都對答如流。

個人評分
味道:8/10
環境:7/10
服務:8/10
抵食:8/10
平均每人消費:HK$200

餐廳資料:
Prime Pho
地址:中環嘉咸街23號My Central1樓10號舖
電話:2562 2392

沒有留言:

發佈留言