Feast Oyster Bar and Restaurant：「蠔」情以外

都話近年尾喺會多咗少少飯聚，繼早前同老同學晌中環食餐粵菜午飯聚聚舊，今次就同一位老友記聚一聚。大家都鍾意食西餐，就揀間坐得舒服嘅，偶然睇到呢家西餐廳「Feast Oyster Bar and Restaurant」，午餐有自助沙律吧，百鬆啲蚊，感覺唔錯喎。

中環放飯時段超多人，所以，大多數餐廳為咗做多啲生意，枱櫈編排都用到盡每吋地方。不過，入到嚟「Feast Oyster」，感覺幾舒服，一來燈光柔和有氣氛，二來枱櫈唔會排得好密，裝修摩登而有格調，最正喺入門口右邊嘅馬蹄位，三幾個朋友嚟就啱晒，仲好有酒店嘅高級餐廳感。事後先知仲有上層，不過，就未有上去睇睇。

既然店名以「Oyster」嚟尊稱，生蠔自不然喺主打菜式，雖然喺午餐時段，照樣提供各式生蠔，而且，又真喺有啲客專誠嚟食蠔，喺真正嘅「蠔」客。

咁講番午市，食蠔以外，午市套餐都好唔錯，定價以所揀嘅主菜計，並共10款，由$128-$258，包埋自助任食沙律吧及廚師精選餐湯，不過，要留意，飲品就需另外加錢，有別慣常包餐飲嘅做法。

枱上放咗張「二維碼」，咁你就知喺自行點菜，不過，唔熟玩法就叫番侍應落單都OK。基本上，坐低咗就可以自行出去拎沙律，而點菜主要喺點選主菜、餐飲及其他額外食物。個人建議，佢哋上菜都幾快，所以，大可以食咗一陣沙律先再落單，咁就唔會一下子堆到成枱都喺食物。其實，佢哋整體嘅服務真喺幾熨貼，收碟、添水，都好快手，又有禮。

自助沙律吧
就晌門口嘅吧位，兩款沙律菜，再加6-8款配料或冷盤食物，另有6款醬汁，離開時，仲稍稍留意到有啲已經轉咗款，規模唔算大，但作為一頓午餐前嘅「頭盤」，已好足夠。小弟呢啲唔蝕底嘅，就梗喺樣樣要啲啦，雜沙律菜、羅馬生菜、薯仔雞肉沙律、粟米粒、藕片、麻辣茄子、甜南瓜，再淋上心水嘅蜜糖芥末汁。而食材夠新鮮，生菜又爽脆，雞肉嫩滑……已無得點輸，加上個醬甜甜辣辣，有個性，好味道。

廚師精選餐湯
是日喺南瓜湯，雖然，稱唔上有咩驚喜，但打得香滑綿密，亦充滿南瓜嘅香甜味，已經叫得做收貨。

煙三文魚香草蕃茄水牛芝士意大利包 $128

咪以為一份麵包，其實一樣可以好飽肚，大大個意大利「拖鞋包」，墊有好多煙三文，夾住大大片蕃茄，加埋水牛芝士落得一啲都無手緊，份量十足，而麵包內就搽咗少少香草醬，所以，一口過咬落去，真喺味道紛陳，口感豐富，啖口卻軟熟嘅水牛芝士搭鹹香嘅煙三文，確喺幾襯，仲有大量甘香脆口嘅薯條，飽晒。

香煎鯛魚柳伴白酒忌廉汁配薯菜 $148
老友記就清少少，唔想太肉，所以，就揀咗香煎鯛魚柳，一整片大大件魚柳，煎得金黃，非常吸引。小弟都試咗一小口，果然煎得香脆，肉質細嫩，而且，完全唔會有咩雪味，再者，佐以個白酒忌廉汁，香滑得嚟滲出微微酒香。薯菜用上意大利黃瓜，自然成本又高啲，味道又好食啲。

鮮奶咖啡、熱檸水 +@$18
雖然飲品要加錢，但都想餐後飲杯嘢，我哋又繼續價吓偈，暢談軼事。估唔到佢哋沖泡嘅鮮奶咖啡有一手喎，媲美咖啡店嘅出品。拉花自然都睇得出有水準，入口口感平勻，奶泡撞落濃縮咖啡夠均勻，而且，醇厚細滑。就連老友杯熱檸水都用上壺上，叫做大體有誠意，當然，心態上點檸水喺唔抵架喇，哈哈！

老友有揸車嘅，食完話車我到公司樓下，我話唔使啦，幾步腳就到，但老友好盛情，所以，做咗幾分鐘好似食完晏啲大老闆咁。

個人評分
味道：8/10
環境：8/10
服務：9/10
抵食：8/10
平均每人消費：HK$170

餐廳資料：
Feast Oyster Bar and Restaurant
地址：中環域多利皇后街15-16號地下及1樓
電話：2808 1858