八方雲集鍋貼水餃專門店 Bafang Dumpling：今餐又「餃」掂

平常去宅渡假都喺晌酒店，包一餐或兩餐，但今次入到嚟東涌，仲要喺鳳凰山山腳下村落中嘅民宿「城市綠洲」，唔包食，所以，早晚兩餐都要自己搞掂。雖然，可以借用民宿廚房，但得我哋兩公婆，就費事搞，故此一早已打算食埋晚餐先入民宿。而最近民宿就喺「滿東邨」，完全喺好隨意搵咗「八方雲集」。

話隨意，其實都有少少偏向，皆因鍋貼、餃子都喺老婆鍾意嘅菜式，投其所好，就變得順理成章，況且，我哋都好耐未食過「八方雲集」啦。對正入口，喺收銀處同廚房，而入到去，堂食嘅地方都幾大，仲好闊落吓，光猛企理。

晌收銀旁，就一大塊食物牌列晒所有煎式，由鍋貼、水餃、湯品、台式麵、台式美食，到各式各樣台式飲品。當然，唔少得鍋貼套餐、水餃套餐、雙拼套餐等等，定價親民。

落好單，等嗌號碼，之後，自己出廚房櫃面攞。見櫃面前擺咗張枱，有唔少外賣單。

而枱上備有簡單嘅調味料，以及即棄餐具，自由取用。

韭菜水餃餐（4號餐） $42

老婆一向都幾鍾意食水餃，所以就揀咗款水餃餐，韭菜亦喺佢「飛弗」，毫無懸念就喺呢款。一客有10隻，隻隻大粒又飽滿，確喺好夠份量，皮薄煙韌有咬口，而韭菜都刴得細碎，食落又夠晒菜汁，沾少少醋，食味更佳！另外，仲包湯品或$17元以下飲品 ，老婆想飲啲熱嘢，就揀咗杯茉香綠茶，唔算話有咩驚喜，但確喺幾幽香。

麵線套餐（10號餐） $47

小弟多心少少，就揀款雙拼套餐：麵線搭鍋貼（或水餃），前者可以選台灣麵線或肉羹麵線 ，後者就可以任揀一款口味，再包一杯珍珠奶茶，轉配正價$16以上飲品或湯品補番差價就可以喇，所以，彈性都幾大。

麵線要咗台灣麵線，其實碗麵線都幾大兜吓，有唔少大腸同肉丸，啲大腸沖洗得乾淨，唔會一陣陣豬臊味，咬落亦唔覺好肥，湯頭幾香濃，口感又唔會好稀，伴以芫荽，又混有少少木耳絲，而麵線入口好滑溜，的確不俗，最怕啲麵線煮到好軟爛。

既然老婆揀咗水餃，咁我就當然選鍋貼啦，一客6隻，隻隻包成長條型，口味方面就揀招牌口味，即喺椰菜搭豬肉。鍋貼煎得啱啱好，唔會過燶，底下焦香脆卜卜，入口熱焫焫，裡面嘅豬肉做得好鬆化，富肉汁。

一向都幾好珍珠奶茶，所以，就唔需要轉款。雖然喺跟餐，但奶茶大大杯，茶味比預期中好喎，香得嚟唔會覺得好單薄，加上唔太甜，又唔太凍，更加啱飲，而珍珠亦唔錯，煙煙韌韌，最怕煮得過腍嘅珍珠，難食兼黐埋一嚿嚿！

唔使一嚿，兩個人食到飽飽，真喺比去茶記抵。跟住摸黑入民宿，加上落毛毛雨，但都不減我哋遊樂嘅興致！

個人評分
味道：9/10
環境：7/10
服務：8/10
抵食：9/10
平均每人消費：HK$40

餐廳資料：
八方雲集鍋貼水餃專門店 Bafang Dumpling
地址：東涌滿東邨滿樂坊地下G07號舖
電話：2609 0938