原來自助晚餐正正做緊「大澳主題」，唔知會做到幾時，因為相信12月中大多數酒店嘅自助餐都以聖誕為主題。以「大澳」為題，相信有唔少本土特色海鮮菜。價錢以星期日至四計，成人收$488，小童收$244；而以星期五、六計，就貴多啲，成人收$638，小童收$319。不過，星期日至五就有第二位半價優惠（星期六除外）！
飲品吧就對正入門口位附近，本來平平無奇，不過，因為今日行咗成4個幾鐘，此刻，當然有啲幾口渴，故此，一起手灌咗兩杯芒果茶，加多一杯橙汁，當堂爽晒。仲有，唔知咩原因，酒店仲送上咗杯香檳，等陣用嚟配凍海鮮就真喺一流。
沙律、特色冷盤跟住，就逐個逐個食物區介紹，先喺自助沙律吧，唔算大陣容，兩款沙律菜加少少配料，數款醬汁，另外，就仲有啲預製好嘅沙律及特色冷盤，最有亮點喺啲冷盤，多元化之外，加入好多本土元素，我老婆就勁鍾意，小弟就樣樣要啲。
雜錦凍肉拼盤晌另一邊長枱，有啲凍肉腸拼盤、挪威煙三文魚，喺唔少自助餐必見嘅冷盤嘢，小弟一向用嚟襯沙律食，而睇落啲凍肉腸幾好樣，望上去都幾油潤，唔會「乾崢崢」。
刺身、壽司本身都喜歡食刺身、壽司，不過，平常食自助餐就比較少揀，但點都要介紹番兩句。刺身有八爪魚、鯛魚、吞拿魚同三文魚，都喺港人頗喜歡嘅款式；而壽司就雜綿啲，做好晒一大盆放晌度自取，款式上都喺大路少少。
今日就貪口痕，捧吓場，試咗少少刺身，阿師傅幾有心，幫我捲起去，擺得靚仔啲，啲三文魚仲俾一大堆我，哈哈。三文魚好夠油潤，鯛魚就味淡啲，但好清爽，而八爪魚柔韌好食。
凍海鮮、芝士盤晌沙律、冷盤大圓枱嘅另一面，就放有凍海鮮、幾款芝士、乾果、水餅，依家生蠔唔再喺自助餐必然供應嘅食物，太多基於食衛安全去考慮，雖然無生蠔，但仍有大大隻麵包蟹、大蜆、凍甜蝦及鱈場蟹腳。
餐湯、麵包自助餐就一定會提供中湯、西湯，前者有青紅蘿蔔煲豬骨，後者就喺蕃茄湯，兩款都唔喺咩特別嘢，不過，食完一輪沙律、冷盤、凍海鮮，飲少少熱湯暖番個胃。而麵包籃一大個，裡面有好多選擇。
中西式熱盤、即煮檔、烤肉跟住輪到介紹熱食呢個大片區啦，先一口氣介紹晒有啲咩食，包括：芋香臘味炒飯、藥膳雞腳、避風塘富貴蝦、薑蔥炒蟹、即炒青口（配香辣蒜香橄欖油或豉椒炒）、金蒜粉絲蒸帆立貝、鹹魚薑米蒸鱸魚、德國脆豬手、德國香腸、燒烤西冷牛肉、百里香烤羊腿、咖喱雞、紅酒牛肋條、紅燒炆豬手、炒時蔬、蜆介陳皮鯪魚球、大澳蝦醬雞翼、紫菜墨魚餅、大澳生曬鹹蛋黃脆魚皮、雜錦海鮮粥，期間都不時轉款，補充又快，所以，未能盡錄，記得幾多得幾多。
老實講，梗喺樣樣都想試啦，但實際就試唔晒，老婆攞啲，我又攞啲，部份嘢就「些牙」吓，務求試多啲。太多嘢就唔逐樣評，整體嚟講，不少菜式都好有質素，富賣點，尤其一堆炸嘢、烤肉、大澳特色菜，確喺好食又特別。喺可惜食完啲熱盤都好飽吓，留少少肚食甜品，所以，就無試個海鮮粥。
生果、甜品甜品主要放晒晌入門口位左邊，兩組凍櫃加個食物長枱，數一數有近廿款甜點，以及兩款生果，仲不時有更新，憑啲相，一次過介紹吓有咩選擇：堤拉米蘇、朱古力卷蛋、鮮果撻、日式芝士蛋糕、黑森林蛋糕、咖啡白朱古力蛋糕、紅桑子慕絲、啫喱鮮果條、士多啤梨慕絲、紅豆綠茶慕絲、焦糖燉蛋、芝麻卷、雪糕、雪條、糯米糍、鮮果西米露、綠豆煎餅、大澳蝦醬雞蛋仔，有成咁多款，應該都好滿足到一般需要。
咖啡、熱茶順便講埋，甜品位再過啲，有兩部自助咖啡機，以及幾壺熱茶、熱水，同埋檸檬，講到食甜品，就點都要拎杯咖啡嚟襯一襯，就算唔喺咩意式咖啡，即磨嘅，只要豆靚都唔差得去邊。
又飽又滿足，食自助餐好玩之處就喺既可盡情食，又可以一次過試好多嘢。加上呢度環境真喺唔錯，有機會就揀晏晝再嚟過，食個午餐或下午茶，欣賞窗外美景都好嘛。
個人評分
味道：8/10
環境：9/10
服務：9/10
抵食：8/10
平均每人消費：HK$415
味道：8/10
環境：9/10
服務：9/10
抵食：8/10
平均每人消費：HK$415
餐廳資料：
Café bord de Mer & Lounge
地址：愉景灣海澄湖畔路88號香港愉景灣酒店地下
電話：2295 8299
Café bord de Mer & Lounge
地址：愉景灣海澄湖畔路88號香港愉景灣酒店地下
電話：2295 8299
沒有留言:
發佈留言