RIVA 灣 Bar & Grill：轉個靚「灣」食好嘢

雖然，近排啲出入境防疫要求放鬆咗，但短期內都未有計劃出門，而依幾年無得出遠門，都積累咗唔少假，所以，得閒就揀平日放吓假，攤抖吓之餘，兩公婆搞吓宅渡假或本地遊。今次就先入咗馬灣玩，早上就由沙灘廣場起步，行經青馬橋底，再上大嶺頭，落大排咀碼頭，再返回沙灘廣場食晏。一早已心儀「RIVA 灣 Bar & Grill」，喺朋友推介，貪佢望住大橋景。

先介紹環境，因為，呢度啲餐廳，環境喺賣點。講講室內，因為一連幾個鋪位，所以，地方都幾大，而且，以唔同嘅裝飾同枱櫈作為分區，好明顯，一眼就睇得出，各區域亦各有特點。咁叫得酒吧，吧位就梗喺唔少得啦。

另外，餐廳尾有個凹位，放咗張8人枱，雖未叫得做廂房，因為喺開放式，至少都自成一角。

依家天氣好，又涼涼哋，室外位就變得搶手，就晌鋪面對出，就有幾組。對出大海、青馬大橋，夠晒有渡假感，踏一步就喺沙灘，店家仲專登擺咗好多沙灘玩具，所以，好啱親子家庭用餐，大人就飲飲食食，小朋友就放電。

餐牌一本過，因為喺閒日，有午市套餐提供，只賣$90，喺最實惠嘅選擇，另外，散點嘅就有前菜、小食、沙律意粉、海鮮、主菜、薄餅、三文治、亞洲精選及甜品，選擇幾多元化。飲品方面，就有紅白餐酒、汽酒、烈酒、啤酒、雞尾酒……啡茶、汽水等。

洋蔥豬扒配白飯 $90

賣相就平平無奇，如一般西餐廳所見嘅煎豬扒飯，而且，佢唔喺做個洋蔥汁，而喺加上大量炒紫洋蔥，所以，比做汁會爽身少少。講到件豬扒，煎得香口，最正喺意外地好鬆化，軟腍得好輕易就切得開。順帶講講，淋晌沙律菜嘅黑醋，好醇香，唔嗆喉。

沙威瑪烤羊肉三文治 $90
有羊肉就揀羊肉菜式啦，因為唔喺咁經常會有，尤其午餐添。初時睇「沙威瑪」以為喺啲醬汁之類，再上網查查，原來喺「卡巴」嘅變奏，源於中東，所以嚟到都幾「卡巴」樣。餅皮好軟熟，捲住好多羊肉條，羶香軟腍，仲夾有蕃茄粒、酸青瓜片、薯條，一客兩大件，所以，甚飽肚。

鮮奶咖啡 +$10、熱檸水

始終唔喺咖啡店，所以，揀鮮奶咖啡都喺有少少風險，不過，晌如此寫意環境，真喺好想襯杯意式咖啡。睇外觀，都知喺自動咖啡機沖，幸好啲豆都應該喺靚豆，入口醇和，帶點果仁嘅香氣。老婆照舊揀熱檸水，因為今餐佢比平常食多咗肉，搵杯檸水清新吓。

心太軟配雪糕 $88
午餐就無包甜品，而散點餐牌中有一道「黎巴嫩焗脆皮芝士」，本來都好想試吓，但可惜侍應話今日未有供應，問我哋不如試試心太軟，都好有水準架，故此，最後，就來一道心太軟作結。真喺做得唔錯，先講賣相，個心太軟比一般常見嘅大，而且，夠晒流心，朱古力味好濃郁；個桃味雪糕球唔止墊咗片焗蘋果片，仲加咗片金箔，真喺變得貴氣晒！

啲服務好到位，侍應又好有禮，食飽飽，再坐吓，吹吹海風，欣賞吓靚景，讓我哋有個稱心午餐時光。之後，繼續餘下行程，到訪埋馬灣公園、古蹟館、芳園書室、石仔灣碼頭、海魚養殖魚排……等等，晚上，再到東涌一家民宿住返晚。

個人評分
味道：8/10
環境：9/10
服務：9/10
抵食：8/10
平均每人消費：HK$153

餐廳資料：
RIVA 灣 Bar & Grill
地址：馬灣珀麗路8號珀麗灣沙灘廣場1樓1-3號舖
電話：2669 8388