餐廳樓高兩層，地下喺主力外賣，樓上先喺主要用餐區，佈置得有像船艙嘅感覺。最搶眼就梗喺樓梯嘅磁磚畫啦，巨型八爪魚同水母，非常高打卡感，樓梯中段仲放置咗張長木橷，若非側邊有個「小心地滑」嘅膠牌，坐晌度打個卡，真喺呃得吓人上咗船。
上到二樓，先入眼簾喺大大個三層高水缸，養咗唔少珍寶蟹同波士頓龍蝦，而再走入啲，先喺一排排嘅卡位，跟住就喺多組可活動嘅2、4、6人枱，其實樓上地方都幾深長。
如好多美式餐廳一樣，一大張過印有餐廳標誌嘅紙枱墊，冚晒成張枱面，就算啲刀叉就咁放晌枱面都唔怕污糟。而除了餐具，仲另備有即棄嘅膠手套同圍裙，不過，我哋又無乜叫龍蝦呀、珍寶蟹呀、麵包蟹呀、阿拉斯加長蟹腳呀……等等，所以，都未需要用到手套同圍裙！
雖然「海鮮袋」喺招牌名物，但除此以外，仲有好多種類嘅菜式，由前菜、小食、湯品、沙律、薄餅、漢堡、主菜、意大利麵、意大利飯、甜品……等等，夾夾埋埋幾十款，唔使擔心無選擇。甚至兒童餐都有，真喺照顧周到。
當然，亦要重點一下介紹「海鮮袋」啦，玩法好簡單，價錢分3層：$418（自選3種海鮮）、$598（自選5種海鮮）、$888（自選8種海鮮），而每一款海鮮都有講明份量大槪有幾多，但溫馨提示一下，部份貴價嘅海鮮，需要另外加錢。跟住，就揀番你心水嘅醬汁：卡彊蒜蓉汁、檸檬刁草忌廉汁、檸檬胡椒汁或混合醬汁；海鮮袋內已有伴菜，怕唔夠分或唔夠食，可以加錢額外再配。
既然喺賣海鮮，除熱食嘅「海鮮袋」，亦有凍食嘅「海鮮拼盤」，同樣分3個價：$408、$608、$1120，越貴所食嘅海鮮就越高檔啦，好似最貴嘅一款，又珍寶蟹、又大扇貝、以及翡翠螺，同樣可以揀配心水嘅醬汁。此外，仲有新鮮生蠔供應，以及生蠔配餐酒嘅組合！
怕煩嘅人，咪好似我哋咁，揀個套餐囉，餐廳提供2人或4人套餐。我哋所揀嘅2人餐，就包咗「海鮮袋」（自選3種海鮮）、前菜（5揀1，部份要加錢）、意大利麵或飯（3揀1），以及兩杯餐酒，如果唔飲得酒都唔緊要，可以轉為汽水，當然，感覺好似蝕底咗少少啦，哈哈！
正所謂飲飲食食，咁就介紹埋有咩飲品選項，食海鮮好多人都會配杯白酒，食肉嘅就配上紅酒，此外，仲有香檳、啤酒、汽水、果汁、咖啡、紅茶、沙冰、雞尾酒、非酒精雞尾酒、特色熱飲，務求大人、細路、年長、後生嘅都各有所好。
Coke、Ginger Ale我哋就唔太好酒，簡簡單單轉飲汽水，配炸雞翼又好，配海鮮亦唔錯，最後配個意大利飯亦啱。總之，碰碰杯，祝大家行得、走得，又飲得、食得。
脆炸雞翼 雖然都喺炸雞翼一碟，當然，都可以做到有特別色啦，有5款口味可揀，小弟揸主意揀咗蒜香蜜糖汁。雞翼入口熱辣辣，外皮都幾脆口，陣陣蒜香，又甜甜哋，伴有一小兜芝士醬，點埋就仲好食，味道更豐富，而伴碟嘅甘筍條同西芹條亦好爽脆。
海鮮袋（3款海鮮） 食完個前菜，是日主角就隆重登場，大大袋海鮮先睹為快，睇落好似無乜嘢，店員俾我哋影完個外觀，再大大力猛咁搖呀搖呀，揈呀揈呀，令蒸熟嘅海鮮跟檸檬刁草忌廉汁徹底混合。當一打開袋，熱力四散，香氣四溢，非常誘人。我哋揀咗海蝦、馬尼拉蜆及原隻去頭魷魚作為配搭，份量唔講得少，堆到一大盤。
原隻去頭魷魚 啲魷魚切得好有型，少少鎅咗花咁，口感好柔軟，帶少少韌勁，卻唔會好似橡筋咁咬唔斷，沾滿檸檬刁草忌廉汁，清新嘅檸檬味，又有幽香嘅刁草味，確喺揀得好。
海蝦 啲海蝦都唔細隻，食落真喺陣陣鮮甜蝦味，啲肉質又夠爽彈喎，用料新鮮就自然好食，而啲蝦頭仲有少少膏添。
馬尼拉蜆 試埋啲蜆先，啲蜆都夠大隻，最緊要夠肉地，睇落隻隻都厚肉，咬落又喺靚料，口感柔韌，唔會好似擦紙膠，仲帶有少少如海水般鹹鮮味，沾上汁底，更吊出其鮮味。
伴菜 咪以為海鮮袋得海鮮怕食唔飽，內裡仲有啲飽肚嘢，包括豬肉腸、薯仔及粟米，有肉、有菜，薯仔更喺飽肚之選。而且，撈勻啲汁，味道一啲都唔會寡。
蟹肉蟹膏南瓜意大利燴飯 最後，加多碟意大利飯，就實飽晒。食意大利飯就最能試得出廚師手勢，呢個飯真心好食，啲飯粒好有咬口，每粒飯都包滿南瓜汁底，卻又唔會太濕，味道帶甜甜哋，仲刨咗唔少巴馬臣芝士落去，芝香四溢。最討歡心，就梗喺飯內混有超多蟹肉，落得一啲都無手緊，又嗒到少少蟹膏嘅甘腴，個飯真喺無咩挑剔位。
睇見以下呢張相，唔喺入咗廁所，知道有啲客人食到搵手食，所以，晌酒吧尾加裝咗一個長型洗手盆，方便吓客人啫。
今次再食「The Captain's House」嘅出品，雖事隔5年，但水準不變，無走樣，更重要喺老友食得稱心，尤其是佢喺第一次食呢種海鮮袋，自不然更具新鮮感。此外，服務亦都好好，例如，上個飯時，會自動跟套新餐碟同匙羹。
個人評分
味道：9/10
環境：8/10
服務：8/10
抵食：9/10
平均每人消費：HK$423
味道：9/10
環境：8/10
服務：8/10
抵食：9/10
平均每人消費：HK$423
餐廳資料：
Mr. Crab by The Captain's House
地址：灣仔莊士敦道74-78號一樓及地下C號舖
電話：2328 8511
Mr. Crab by The Captain's House
地址：灣仔莊士敦道74-78號一樓及地下C號舖
電話：2328 8511
沒有留言:
發佈留言