2022年11月16日星期三

珍珠皇宮印度餐廳 Moti Palace Indian Restaurant:重慶大廈搵食「宮」略

數一數,原來好耐無食過印度菜喇,睇番啲食評,已經超過年半有多,同個老友傾開,佢都好有興趣食番餐印度茶。晌網上查一查,搵到位處「重慶大廈」嘅「珍珠皇宮印度餐廳」,有別要搭電梯上樓,行一層樓梯就到,較為方便。
晌門口,放咗啲易拉架,原來連Error、喬寶寶都幫襯過。而入到餐廳內,環境比較幽暗,一室以紅為主調,全喺皮梳化櫈,坐得舒服,我哋被安排坐晌餐廳尾,原來側旁仲有個廂房。初時,諗住會喺其他亞洲人多,點知意外地本地人先喺佔多數。
掃一掃餐牌有咩選擇,菜式分門別類,有晒中英對照,由頭盤、小食、湯品、天多尼燒烤、印式咖喱、素食、飯品、印度烤餅、沙律、炒菜、乳酪……等等,以及各式飲品,選擇甚多。
bowl芒果奶昔 $38
基本上嚟親印度餐廳,都幾乎會一定叫呢一款印度特色乳酪飲品(Lassi),芒果口味喺小弟「飛弗」。入口口感細滑,芒果味好濃郁,乳酪帶出嘅酸味唔太酸,反而有少堂醒胃感,跟芒果嘅清甜味好平衡;單單喺乳酪同芒果打成,所以,飲到尾,味道跟質感都無走樣,堅真材實料。
bowl印度奶茶 $25
老友本身好鍾意飲奶茶(其實小弟都喺),就揀印度嘅奶茶,佢話跟港式嘅有少少相似,茶味比較濃香,口感都幼滑,但比起港式嘅奶味就偏重少少。
bowl混合肉燒烤拼盤 $178
一向都幾鍾意天多尼,尤其烤雞,今次一眼就睇中呢款「混合燒烤」,因為既食到天多尼風味,又可以一次過試到幾款食物:印度燒雞、免治羊肉卷、烤魚塊和乳酪腰果汁燒雞,最好喺樣樣兩件,同老友「些牙」就啱啱好。而以鐵板上枱,滋滋聲,熱力四射,夠晒熱焫焫,仲伴以洋蔥同啲椰菜絲!
bowl烤魚塊
大大件嘅烤魚塊,切得幾厚身,落刀感覺到肉質比較挺實啲,入口帶少少香料味,但仍然食到魚鮮味。
bowl乳酪腰果汁燒雞
外表較白,加上燈光,跟啲魚塊好易認錯。因為以乳酪腰果汁醃過,味道帶微微酸香,肉質都頗為嫩滑,感覺幾特別。
bowl印度燒雞
講到天多尼,就不得不提印度烤雞,混入多種香料去烤,真喺寧舍好食,特別惹味,又唧咗少少檸汁上去,更感清新不膩。
bowl免治羊肉卷
羊肉卷做成腸形,加上搓得紮實,唔會一夾就散開。好有羊肉香,卻唔會話好羶,相信對大部份都應該易接受,而質感真喺幾唔錯。
bowl椰汁忌廉煮蝦 $138
因為揀咗個混合肉拼盤,所以,另一款心水就揀咗廚師推介中嘅煮蝦,加上呢款菜式寫明多汁,用嚟配印度烤餅就夾晒。上枱時,果然多汁,成碗餐湯咁,其實,裡面有唔少蝦仁,蝦仁食落好爽口,而個汁底本身喺咖喱味,但就滲出濃郁嘅椰汁香,搵啲烤餅襯嚟食,真喺一流。
bowl乾果果仁蓉烤餅 $38
平常食嘅都喺原味、蒜蓉或芝士,今次揀款未食過嘅乾果果仁蓉,烤餅都喺即叫即做,而啲烤餅上枱時都專登反起少少,等你睇到裡面鋪咗唔少果仁蓉。烘得幾好,柔韌有咬口,加上果但蓉,多一重滋味,沾埋啲椰汁咖喱,正到痹啦。
今餐印度菜同老友都覺得好滿意,基本上,花費唔喺好多,就試到好多款式嘅食物。怪唔之得都多本地人幫襯。

個人評分
味道:9/10
環境:7/10
服務:8/10
抵食:8/10
平均每人消費:HK$230

餐廳資料:
珍珠皇宮印度餐廳 Moti Palace Indian Restaurant
地址:尖沙咀彌敦道36-44號重慶大廈1樓96-97號舖
電話:3706 5772 / 6174 0223

沒有留言:

發佈留言