星記海鮮飯店 Sing Kee Seafood Restaurant：有「星」有色

時近年尾會喺多咗啲飯聚，有大有小，今次同老同學短聚食餐晏晝飯，就番小弟就梗喺晌中環啦，而大家都想靜靜局傾吓偈，所以，搵咗「星記」。雖然佢喺中菜館，但有別一般酒家，午市有啲小炒套餐，所以，都幾划算。

踏出電梯門，第一眼除咗大大個店名之外，其次就喺啲「米芝蓮」獎狀，雖然未摘星，但都多年獲選為推介餐廳。不過，個人而言，小弟搵食就從來都唔睇「星」，口味嘅嘢都喺講個人嘅。

走入餐廳，地方唔算話好大，但裝修雅致，唔會太俗氣，而且，枱與枱嘅分隔都OK，無話太逼、太侷促嘅感覺。

呢度跟附近嘅酒家唔同，午市都喺做小菜，完全無點心供應，而且，仲有唔少喺貴價嘅菜式，如鮑參翅肚、龍蝦、龍躉都有。

咁又唔使擔心，經濟實惠啲嘅有小菜套餐，一款喺多人組合嘅「午市超值套餐」，睇落貴就貴在有道龍躉；再經濟啲，仲有款「特價午市小菜、粉麵飯套餐」，包老火湯及甜品，定價都喺$88，啱晒我哋。當然，嚟得飲茶，仲有茗茶$15位，另收加一。

老火湯

落好單，先嚟就梗喺飲啖湯先啦，老火湯每日不同，是日就喺西洋菜，呢排當造，啲西洋菜好嫩、好甜，飲落夠老火，又無添加，清甜滋潤。

馳名鳳梨生炒骨
我見好多人都會點呢道菜，餐牌亦好標榜佢，所以，其中一道小炒就揀佢。大大碟，外觀做得幾靚仔，而啲生炒骨較大粒，好肉地。 外層炸得香脆，肉質卻咬落鬆化，每粒掛滿汁，卻唔會有多餘嘅汁漏晒晌碟底，最正喺啲汁稀杰度啱啱好，甜酸細緻，唔會有嗆喉感，果然撚手！

鹹魚蓉雞粒茄子煲

另一道茄子煲亦出色，送到嚟真喺煙縷四起，仲聽到滋滋聲晌，夠晒熱焫焫，此外，加入鹹魚蓉，香氣更喺四溢，都咪話唔吸引。茄子煮都好腍滑，卻無過火而「爛蓉蓉」，雞粒嫩滑惹味，所以，就算一道平常嘅茄子煲，都可以做出不一樣嘅效果，可謂功力加上心思。

甜品

午市酒家送嘅甜品，唔喺紅豆沙，就綠豆沙啦，估唔到喺一道好清潤嘅糖水，咩名堂我就無問，但清潤嘅糖水中有爽脆嘅雪耳、鬆化嘅蓮子、軟腍嘅紅腰豆，有誠意，呢排涼涼哋就好啱飲。

叫做被「米芝蓮」推介嘅，食物質素確喺唔差得去邊，環境又好，啲阿姐招呼亦好唔錯，不時仲幫忙添茶，又有禮喎。

個人評分

味道：9/10
環境：8/10
服務：8/10
抵食：9/10
平均每人消費：HK$115

餐廳資料：
星記海鮮飯店 Sing Kee Seafood Restaurant
地址：中環擺花街1-7號1號廣場2樓
電話：2970 0988