新上海飯店：疫後「滬」動

停擺咗3年嘅「細胞小組」活動，卒之因防疫措施放寬而成事，大家都經歷艱難嘅日子，自然更想出嚟聚一聚。選咗美孚平台嘅「新上海飯店」，雖然小弟喺美孚街坊，但今次唔喺我主意，不過，呢間上海飯店上手就幫襯過，據聞喺子承父業，我就無深究，但轉咗手就未試過喇。

依家市況大致回復，所以，星期六晚嚟到，睇到近9乘滿，好多都喺家庭客添。裝修上就比較老派，平平實實，因為美孚大部份餐廳都喺做區內客生意，尤其平台上面添，甚少區外客專登走嚟。

食物選擇，一大張點菜紙底面兩頁就喺餐牌，都喺見慣見熟嘅上海菜，雖然店名叫「新上海」，但賣嘅都喺傳統滬菜，無咩花巧嘢。茗茶收$3位，平日全日都唔收加一，喺星期六、日、假期晚市先收加一，算喺實惠。

另外，仲有啲套餐餐牌，分4人、10人、12人，屬全包宴，已包茗茶及加一，店主亦強力「推介」，不過，個人覺得好似唔太抵，都喺散叫就算。

美味燻魚 $72

先嚟一道前菜，不過，有別往常所食嘅燻魚，以往食到嘅，全喺唔會有醬汁，都喺乾身嘅燻魚，但呢碟就加咗汁醬上面，但話時話，作為前菜，佢嘅份量都幾大碟。講番啲燻魚，肉質挺身而具咬口，有嚼頭，入口帶幽幽煙燻香味，唔算好強，感覺適中，加咗汁醬就啱啲唔喜歡吃得太乾嘅客人。。

小籠包 $42
嚟食上海菜，都比較少唔嗌小籠包，除咗好食，亦喺幾試到師傅手勢嘅滬式點心。外觀上，摺紋就唔算好靚好平均，但外皮搓得夠晒薄，咬開就見裡面有好多湯汁，肉質鬆化，食落唔覺太多肥豬肉，都算得上有水準。

菜肉雲吞 $58
紅油抄手喺另一款出名嘅滬式點心，不過，同枱絕大部人都唔嗜辣，改為點咗一客菜肉雲吞。無正式數，但一客好似有6隻，啱啱好平均分唔使爭，粒粒包得好豐滿，填滿晒菜肉，啲菜刴得細碎，口感不俗，加上湯頭香濃鮮甜，所以，有得食又有得飲。

上海酸辣湯 $78
要一窩就夠晒我哋分，其實，都好耐無飲過酸辣湯。成品都唔錯，質感唔會太稀，又無話太餬；味道酸酸辣辣，唔會太嗆喉，加上湯內好多料，木耳呀、筍絲呀……總之用料十足。

蒸銀絲卷 $26
有人鍾意食炸嘅，有人鍾意食蒸，同枱較多老友喜歡後者，貪佢軟軟熟熟，口感極之鬆軟，又唔黏牙，沾啲酸辣湯一齊食，更加正呀。

西芹鮮魷 $85
呢個明顯喺一道粵菜啦，做法都喺，純粹大家啱食啲，所以，揀番道海鮮菜式。西芹好爽口，鮮魷就好柔嫩，亦好夠份量，但就嫌個茨汁比較餬身，影響咗少少口感。

黑醋骨 $80
賣相黑黑沉沉，感覺就唔搶眼，但就絕對喺真人不露相，個糖醋汁調校得非常之好，嗰份黑醋嘅香味好沉實、好醇和，酸香微甜唔會有嗆喉感，好有上海菜濃油赤醬嘅特色；而肉排大大件夠厚肉，肉質又鬆化喎，非常好食，喺是晚推介嘅菜式。

韮黃肉絲炒粗麵 $68
最後嚟一碟亦富上海菜特色嘅炒粗麵，簡單只以韮黃同肉絲炒，再加啲銀芽，所以，食落口有陣陣爽爽哋，但同樣喺好好食，再者，啲麵條好有咬口，真心唔錯。

仲有樣嘢值得讚，我哋順便買個蛋糕為其中一位組員慶生日，但店家唔收切餅費，仲拎啲新碟同叉俾我哋用，喺咪抵讚呢！故此，服務一環加多佢少少分。

一班組員，經過3年再聚，感覺喺既熟悉，又有份新鮮感。希望疫情漸趨平穩，大家就可以再聚多啲，搞吓其他活動。

個人評分

味道：9/10
環境：7/10
服務：9/10
抵食：9/10
平均每人消費：HK$105

餐廳資料：

新上海飯店
地址：美孚美孚新邨第三期百老匯街45號平台151C舖
電話：2370 0805