Thai Fire：午餐「泰」優惠

今日老婆又要過嚟「翠屏」參加義工活動，所以，趁過開嚟，但同佢晌觀塘區食餐飯，因為我哋住西九龍呢邊，東九龍就少去啲。講到晌觀塘搵食，就唔可以唔提啲廠廈、商廈內嘅食肆，有不少卧虎藏龍嘅樓上鋪。就好似今次晌網上搵到嘅「Thai Fire」，確喺一家有水準嘅摩登泰菜館。

比起廠廈，商廈啲大堂呀、通道呀，感覺會喺好好多。而踏進餐廳，感覺唔同晒，一室木系裝修，加上少少燈光裝置，以及挨牆一邊梳化椅，放咗好多盆栽，予人感覺有份小清新，有別傳統泰菜館所見到嘅神神佛佛咁，再者，成個場嘅環境都幾大，此刻人客又唔太多，感覺寫意。

睇環境就知呢度唔喺賣傳統泰菜，所以，就連餐具，都有刀有叉，亦有筷子，再睇睇餐牌，就見晌泰菜中，加入好多西式元素。

先介紹基本午市嘅餐牌，呢組午市套餐喺長期都有，共5款選擇，仲有小食加配優惠，而且，無限制加配幾多，店員仲話依家有個額外推廣，就喺加配兩樣只需$50，另外，午餐包一杯基本飲品，亦可加錢升級至其他飲品。

除咗上述嘅固定午餐，仲有個每星期都轉款嘅特色午餐，呢個餐牌就比較西式啲，都喺等客人多個選擇，同樣包一杯基本餐飲，以及小食加配優惠。

椰子雞湯 $28

店員推介佢哋嘅椰子雞湯，因為無添加，咪睇佢「白潺潺」，入口真喺幾鮮甜吓，好香椰子味，更唔會有泛油嘅毛病，夠晒清甜。

泰式魚餅 $32
泰式魚餅一向喺出名嘅泰式小食，不過，呢碟賣相就做得特別精緻。魚餅大大件，煎得甘香，外層好脆口，又有啲焦脆感，魚味濃，口感彈牙，唔喺溝粉貨色，沾上自家製酸香帶微甜嘅醬汁，更具層次。

泰式無骨鳳爪 $28
去晒骨自然好方便易食啦，啲鳳爪好爽口，涼涼哋，但嗒落啲辣勁就出晒嚟，唔喺講笑，真喺幾辣、幾刺激吓，不過，配合埋陣陣嘅酸味，就好醒神。

燴紐西蘭牛肋條伴青咖喱汁白飯 $98

主菜小弟就選牛肋條，份量好十足，牛肋條唔止大大條，仲有成5條之多，堆到成座小山，咬落去鬆化到不得了，真喺無牙嘅都咬得開，而且，又富肉香；沾上青咖喱汁，又辣又香，嗰份咖喱香喺豐厚唔寡，淨喺啲汁，都可以撈飯食晒成碗。

香煎石斑魚柳伴鮮蕃茄莎莎汁粗薯條 $98

老婆近排睇緊中醫，要佢盡戒紅肉，所以，呢一道煎石斑就合晒佢心水。條連皮魚柳煎得金黃，放入口，外皮香脆，魚肉好滑溜，佐以蕃茄莎莎，酸活清爽。另外，薯條炸得香脆不膩，伴菜嘅西蘭花，都煎炒過，唔喺烚完就算，有誠意。

熱檸水、水蜜蜜 +$28

餐飲方面，老婆就比較唔多心，簡單檸水就可以喇，而小弟揀咗辣嘅主菜，所以，飲品升級要杯水蜜蜜爽吓兼解辣。以蜜桃梳打為主，再加有奇亞籽及蜜桃啫喱，幾好飲喎，清爽又清甜，有啲啫喱啜吓，奇亞籽又富營養。

臨走，店員仲話佢哋有做聖誕到會，睇番啲單張，除散點之外，更有提供20-40人嘅套餐，選購套餐或消費至指定金額都有免費送貨，較適合大棚人或公司客。

今餐加配咗啲小食，所以，非常豐富，最緊要喺啱口味，太辣我就唔OK，呢類中辣都無問題，而環境又舒服寬敞，招呼確喺唔錯，值得推介晌附近返工嘅老友。

個人評分
味道：9/10
環境：8/10
服務：8/10
抵食：8/10
平均每人消費：HK$180

餐廳資料：
Thai Fire
地址：觀塘開源道71號王子大廈9樓A號舖
電話：2360 0188