2022年11月15日星期二

喜多嬉牡蠣屋 Kitaki Kaki:「蠔」不客氣

早睇晌雜誌睇到呢一家居酒屋「喜多嬉牡蠣屋 」嘅專訪,嚟自日本北木島,小弟唔喺日本通,所以,對北木島呢個地方好陌生,而睇雜誌嘅專訪,「喜多嬉」本身喺歷史悠久嘅牡蠣(我哋就慣叫生蠔)養殖場,今次喺首次進軍香港飲食市場,個人感覺喺幾大膽嘅決定。同位舊同學傾開,原來佢喺蠔痴,所以,今日嚟到就食餐「蠔」華午餐。
單睇鋪門窄窄,其實,入到裡面都幾深長,裝修都幾骨子,傳統嘅日式木系,雖然簡約,亦有啲亮點,例如天花掛咗啲繩網,猶如捕魚嘅大魚網般,不過,最特別喺啲貝殼形吊燈,燈光又令一室柔和,而牆上亦掛上唔少北木島、牡蠣嘅相關照片。眼見,嚟親嘅客人都喺衝住啲牡蠣而嚟,絕大部份都喺選擇牡蠣放題。
櫈下有個小雜物箱,放便放吓背包、手袋,唔使擺晌椅背,咁就坐得更舒服啦!
枱上除咗精緻嘅餐具,仲有少少調味料,有一罌「秘製魔鬼辣椒粉」,有別一般嘅深紅色,而喺泥啡色,我哋唔嗜辣,無試,真喺想知有幾「魔鬼」!
嚟到呢度,相信好多人都為啲牡蠣放題而嚟,聽店員介紹,蠔種嚟自岡山縣直送。而佢哋嘅牡蠣放題,分60 / 90分鐘任食牡蠣刺身(即喺生蠔)同鐵板烤牡蠣,另附有一個豐富嘅前菜,前者收$398,後者收$498,貴唔貴就見仁見智,在乎你喺唔喺好鍾意食蠔。此外,新張期間更會贈送烤日本帆立貝!
除咗牡蠣放題,午市另備有午餐,此外,亦提供多款散點菜式,包括小食、串燒、飯麵,當中更有不少喺各式各樣嘅牡蠣菜式!
bowl前菜(八寸-喜多嬉九品)
賣相就好吸晴喇,晌九宮格方型木托盤之上,放上8款食物,精緻到不得了,食物包括喜多嬉牡蠣茶漬飯、日本直送象拔蚌刺身、時令沙律、天婦羅秋葵、二色燒活白鰻、喜多嬉牡蠣刺身、手工月見燒鳥串、天婦羅紫蘇葉吞拿魚蓉,問過店員有無食用嘅先後次序,以上打出嚟就喺佢講嘅次序,即喺食完中間個茶漬飯,就由象拔蚌開始順時針咁食。有別我心想由淡至濃味咁食法,當然,食嘢隨喜好,亦可以按自己喜好嚟食。
bowl喜多嬉牡蠣茶漬飯
話喺前菜,但就有個迷你版茶漬飯,感覺有少少破格。「茶漬」只喺代名詞,實際喺蠔湯飯,個湯好濃蠔味,仲混咗少少蠔肉,食落真喺幾正。
bowl日本直送象拔蚌刺身
象拔蚌刺身都唔喺第一次食,不過,加埋片醃漬藕片,賣相就靚仔咗好多。象拔蚌口感幾清爽,咬落柔韌有嚼勁,沾上少少芥末,成個人醒晒。
bowl時令沙律
簡簡單單嘅沙律菜,淋上少少柚子醋,特別就唔特別,但可以清清番啲味蕾,作為間間場嘅前菜。
bowl天婦羅秋葵
再落嚟就試試店家嘅天婦羅,入口唔錯,粉漿夠薄,亦唔油膩,秋葵仲爽爽哋口,不過,因為嚟到都隔咗段時間,感覺喺少咗份香脆感。
bowl二色燒活白鰻
兩小件燒鰻魚,一口一件啱啱好,入口充滿鰻魚嘅油香,口感挺實卻好嫩滑,加上已塗上醬油去燒,頗為惹味。
bowl喜多嬉牡蠣刺身
初時見牡蠣「刺身」以為好似啲魚生咁切切裁裁得番件肉,其實就喺平常所食嘅原隻生蠔。因為稍後都喺生蠔任食,所以,等陣再講,反而,覺得作為前菜,改以另一啲漬物、小食代替仲好。
bowl手工月見燒鳥串
月見即喺隻生雞蛋,當然喺嚟自日本嘅靚貨,而件燒雞串搓得夠「實淨」,但入口卻喺鬆化唔死真,有肉香,沾上雞蛋,口感多咗一陣滑溜感。
bowl天婦羅紫蘇葉吞拿魚蓉
最後一道喺吞拿魚蓉,睇都睇得見刴到細碎,軟滑之餘,不泛脂香,最有趣喺配上一片天婦羅紫蘇葉,同時入口就令口感更具變化。
bowl牡蠣刺身配土佐酢啫喱
睇番散點餐牌,單點價一隻盛惠$48,我都唔算蠔痴,前前後後食咗4隻而已,都叫回一半本喇。唔理你兩個、定三個,一起手,店員會捧上一碟6隻牡蠣刺身,睇落啲賣相靚啲嘛。的確外觀好有光澤,隻隻都非常肥美,再者,加埋辣蘿蔔蓉、蔥花、土佐酢啫喱,真喺未食都先興奮。
平常食蠔都喺晌酒店食自助餐時食,蠔種都偏向歐美、澳洲,反而,日本蠔真喺較少食。柱位無切開晒,以示新鮮正貨,入口口感帶少少爽脆感,鮮味十足,蠔味都濃,而海水味唔會太強,所以,好啱舊同學嘅口味,佢就反而怕太重海水味嘅生蠔。再佐以辣蘿蔔蓉、蔥花、酢啫喱,酸酸爽爽,食味更具層次同立體。
跟住就會試吓啲鐵板烤牡蠣同烤日本帆立貝,但未食之前,先介紹6款配搭嘅醬汁:蒜蓉醬、孜然醬、XO醬(前排)及芝士醬、秘製酸汁、泰式辣醬(後排),都喺嗰句啦,無話邊款最夾,都喺睇個人口味而已,而小弟就最鍾意孜然醬、XO醬及芝士醬。
bowl鐵板烤牡蠣
烤牡蠣絕對唔喺第一次食啦,有啲BBQ豪吓,都會買少少生蠔嚟燒,有時晌啲日式串燒店,都久唔久試番一次半次,不過,佢呢一款鐵板烤牡蠣,有別往時啲「明火」燒,啲牡蠣並非全熟,食起嚟有啲半生熟嘅感覺,仍然好爆汁,但蠔味更濃郁,都幾得意。加上配搭唔同醬汁,食味各有特色,風味可以變得完全唔同,一口氣豪食咗5隻,以散點價計,返本啦。
bowl烤日本帆立貝
呢個食法大家都絕對唔陌生啦,好多時日式放題都有,不過,可能隻帆立貝無咁大隻啫,睇相都見,啲帆立貝真喺幾大隻,幾厚肉吓,烤得啱啱好,鮮甜好味,肉質都幾軟熟,更有少少焦香,如果再燒耐啲就過籠,入口好易韌。同樣,喜歡咩醬汁咪配咪醬汁囉,小弟就鍾意夾啲濃味嘅。
bowl白桃烏龍冷泡茶 $28
店家除提供清酒、啤酒,仲有冷泡茶同汽水,要咗支白桃烏龍,用嚟清清牡蠣嘅濃味都幾好,而且,支白桃烏龍本身烏龍味都幾清幽,白桃味亦算突出。
如果本身好鍾意食日本蠔,呢度就真喺啱晒你口味,加上配搭咁多款醬汁,喺一個幾特別嘅體驗。舊同學除咗喺蠔痴,仲喺哈日人士,食住今餐日本蠔當熱身,準備遲啲出發「返鄉下」。

個人評分
味道:9/10
環境:8/10
服務:8/10
抵食:8/10
平均每人消費:HK$468

餐廳資料:
喜多嬉牡蠣屋 Kitaki Kaki
地址:中環擺花街1-7號一號廣場地下9號舖
電話:6089 8740

沒有留言:

發佈留言