Vision 8：想像……願景

一位都真喺幾耐無見嘅朋友，偶然想返起，相約食餐晚飯，談談近況，講講軼事，雖然Whatsapp令人聯繫多咗，不過，有啲嘢真喺見到面先分享，原來老友嘅工作正晌膠著狀況，公司搞清盤但又遇到唔同人嘅玩嘢，拖咗成年有多，真無奈！咁啱今晚食飯嘅餐廳叫「Vision 8」，但願老友嘅願景好快達成，找到新出路。

其實，餐廳嘅環境有少少逼，枱與枱之間距離短，但晌香港開餐廳，真喺十居其九都喺咁，鋪租貴，又想做多啲生意，就唯有餐枱排得密啲，還好，燈光配合下，氣氛搭夠。

剛才晌門口，已先睇睇過食物有咩選擇，種類包括湯、小食、沙律、前菜、意大利粉、意大利燴飯、薄餅、主菜。除湯及小食以外，所有菜式都可以加$45變為套餐，多配餐湯或沙律及咖啡或茶，轉特飲需額外加錢。

蕃茄濃湯（配小圓麥包）

是日餐湯仲以為喺南瓜湯，但一入口，就知原來喺蕃茄濃湯，蕃茄咪幾突出，酸酸甜甜，配一個烘熱嘅小圓包，頗有麥香。

田園沙律

因為餐湯、沙律只可任擇其一，所以，一個要湯，另一個就要沙律。個沙律好田園，只喺沙律菜拌油醋，雖然沙律菜好新鮮，咬落索索聲，但就稍嫌普通咗，加點烤車厘茄或意大利蕃茄乾，都會變得好唔同。

白酒忌廉汁法國藍青口 $148

因為朋友唔算大食，簡單一客藍青口佢已經話OK。咪睇佢細細粒，啲青口好鮮甜，肉質嫩滑，不愧法國貨，而個白酒忌廉汁香滑且帶出淡淡白酒及洋蔥香，唔會太搶啲青口鮮味。

酥炸軟殼蟹配龍蝦汁燴意大利飯 $158

個燴意大利飯同樣整具水準，飯粒煙韌有咬口，入口夠濕潤而充滿龍蝦鮮香味，做出意大利飯嘅神髓。軟殼蟹炸得甘香，咬落非常酥脆，最緊要唔會食到一口油，而已，大大件十分有睇頭。

因為只點咗一客前菜及一客燴意大利飯，大家少少意猶未盡，所以，不如來一客甜點，餐廳甜點只有兩款：蘋果金寶及心太軟。

蘋果金寶配雲呢嗱雪糕 $65

面層個金寶做得好脆口，不過，牛油味唔重，叫做健康啲咁啦。而金寶下嘅蘋果，唔單又香又軟腍，更喺滿滿嘅玉桂香，配以冰凍嘅雲呢嗱雪糕球，冰火交融，倍添美味。

柚子蜜 +$10

天寒地凍，熱辣辣嘅柚子蜜就喺冬天窩心嘅熱飲，當然，即沖產品，唔好有太多期望，不過，估唔到柚子蜜要補多$10啫。

荃灣不斷蛻變，食肆嘅選擇亦多姿多彩，不時有唔錯嘅小店掘起，Vision 8可以算喺其一，怪唔之得風評不俗，而今晚所點嘅菜式都啱食兼具質素，招呼亦好好，繼續努力必有更好嘅前景！

個人評分
味道：7/10
環境：7/10
服務：8/10
抵食：7/10
平均每人消費：HK$260

餐廳資料：
Vision 8
荃灣兆和街34號榮安樓地舖
2612 1013