山區裡的走走趯趯: 萬麗咖啡室 Cafe Renaissance：西班牙「豐」情

2024年3月22日星期五

萬麗咖啡室 Cafe Renaissance：西班牙「豐」情

舊年就到訪過「萬麗咖啡室」，睇番啲食評，原來剛好一年前嘅事，當時就為通番關嚟食餐好嘅。今次見到餐廳做緊西班牙主題，頗有特色，又做緊啲優惠，所以，同老友嚟嘆番吓。

眨吓眼又一年，個環境當然無乜點變啦，柔和燈光加寬敞空間，依然予人感覺舒適，所以，整體感覺幾舒服。而食物區都喺二字左右排開，集中晌一個範圍，唔使左兜右轉，亦都比較方便。

上文都講，今次自助餐以「西班牙」為主題，四周嘅牆上都貼有唔少西班牙嘅裝飾，而菜式方面就有唔少西班牙特色菜。星期一至四晚計，成人收$808，星期五至日及公眾假期成人收$848，另收10%服務費，晌官網預訂有8折優惠。

冷盤
先講講冷盤同沙律，就晌食物區嘅頭位，選擇夠多喎，唔喺一般嘅凍切肉腸、莎樂美腸。有好多款都喺主題菜式，包括西班牙蕃茄凍湯、數款西班牙醃肉腸、一款牛奶芝士及一款羊奶芝士、西班牙沙甸魚、醋漬鯷魚、西班牙蕃茄麵包、煙三文魚，仲有啲橄欖呀、酸瓜……等配料。

Joselito西班牙火腿

而一入門口就見到有師傅即場將西班牙火腿切片，薄薄一片，仲要砌到好靚仔。唔講真喺唔知，原來「Joselito」呢個西班牙品牌已有150年歷史，單喺呢點，啲火腿理應已夠晒質素啦。

沙律

沙律吧陣容夠晒鼎盛呀，4款沙律菜、大大少少近20款配料，如鮮蝦、煙肉碎、露筍仔，配以4款自家調製醬汁，唔鍾意嘅，可以簡簡單單淋啲油醋，但我就鍾情蜜糖芥末汁同牛油果醬。此外，仲有款預製好沙律，包括意粉沙律、煙鴨胸沙律、蕃茄水牛芝士沙律、烤和牛沙律、海鮮沙律，喺唔想煩嘅懶人之選。

將最心水、最精選嘅沙律同冷盤放埋一齊，造就小弟呢碟超豐富頭盤，樣樣都有啲，夠晒多元化，色彩又夠繽紛，睇見都已經好醒神。幾款主題西班牙食材，果然有質素，尤其啲火腿，唔好見大片白色「肥膏」，出奇地無乜油膩感，反而有陣陣脂香，鹹鹹哋嘅味道，正呀喂！幾款預製好嘅沙律亦都好食，食完胃納大開。

海鮮

食自助餐最回本嘅一定喺啲冰鎮海鮮啦，今次所見，就有法國麵包蟹、澳洲青口、長蟹腳、翡翠螺同凍海蝦，佐以幾款醬汁，如雞尾汁、辣芫荽汁、紅酒醋同蜜糖蕃茄汁，都幾特別。就目測所見，呢啲回本嘢好搶手，但成晚都見補貨甚快，完全無間斷供應。

刺身、壽司、卷物
就晌近門口，凍海鮮傍，小弟平常比較少晌自助餐度食壽司，因為自助餐所提供嘅一般都喺啲大路貨色，但偶爾見到質素高嘅都會試試。今次就見啲帆立貝同八爪魚好靚，仲有一款炙燒和牛壽司好有興趣。

冰鎮海鮮又喺樣試啲，拎滿一大碟，再加埋刺身嘅帆立貝同八爪魚，做成一份海鮮拼盤咁。每一款都有其獨特嘅鮮甜味，麵包蟹好多膏喎，蟹腳鹹鮮味十足，蝦肉同螺肉又爽，啲帆立貝果然喺刺身級，又大件，柔嫩鮮甜，真喺「鮮」入為主。

老友原來都幾鍾意刺身、壽司，趁佢拎時我就搭單，再食啲帆立貝同八爪魚，但重點喺想試件炙燒和牛壽司，的確好正，壽司飯捏得緊致卻唔死實，燒和牛既有肉味，又帶點油香，正呀喂！

湯品

呢度嘅湯品喺亮點，因為佢哋有提供是日燉湯，名稱就無講，但湯內睇得出有好多料，加上上次飲過確喺正，今回就當然翻兜。此外，仲有1中1西嘅「例湯」，前者寫住龍蝦菜湯，其實似喺加咗龍蝦肉嘅碗仔翅咁，後者就喺南瓜忌廉湯。

覇氣咁一次過試咗3款湯，包括西班牙蕃茄凍湯、南瓜忌廉湯同燉湯，可謂各有賣點。凍湯好少飲，入口清爽感極強；個南瓜忌廉湯亦都打得好滑溜，滿滿南瓜香味，等至於個燉湯，絕對喺高質量出品，飲落非常之清潤，味道醇和，可以講喺飲得出真材實料無欺場。

即煮粉麵

晌自助餐嘅即煮粉麵、即煮意大利麵……等等，都一律少試，因為太易飽肚，不過，偶有例外，就好似今晚咁，供應嘅喺馬來喇沙，仲要配半隻龍蝦，夠晒豪氣，又合晒小弟心水，就算易飽肚都想試試，彩老友都鍾意，嗌一客兩個人「些牙」。

個喇沙湯底入口真喺唔失禮，比一啲主打賣東南亞菜嘅餐廳所出品唔差得遠，香味四溢，而麵底可以揀油麵或米粉，識食當然梗喺揀摻摻啦，至於隻龍蝦啲蝦肉好爽口，充滿鮮甜味，加上成嚿蝦肉好易起出嚟，啖啖肉，食得超爽；此外仲有啲豆卜、芽菜同雞蛋作為配料，製作絕對唔馬虎。

咖喱、熱盤、烤肉

另一個「長區」就喺擺放多種熱食嘅食物區，晌呢度有好多精彩美食，先講重點，就喺多款西班牙主題熱盤，包括最大亮點嘅西班牙乳豬、西班牙海鮮炒飯，以及西班牙香菇炸丸子、西班牙薯仔蛋餅、西班牙欖油蒜香蝦、香烤西班牙腸香烤豬肉串，淨喺呢幾樣已好精彩，仲有新鮮蒸焗波士頓龍蝦。

以其餘嘅熱盤，一口氣介紹埋先，計有印度咖喱雞肉、印度皇飯、鑊炒和牛粒、烤爐魚、炒蜆、咕嚕肉、煙肉芝士焗蠔、紅燒鮑魚、烤牛肋排、焗薯、炒野菜、龍蝦茶碗蒸、海南雞、蒸大鱔……等等，都喺睇相寫返出嚟，可能都有遺漏，總之，可以講喺種類繁多。

講真，邊可能似得曬所有嘢，所以去到呢個大類都喺重點出擊，揀3、5、7款心水嘢嚟試。雖然喺咁，都砌咗成大碟「主菜」，蒸龍蝦當然喺以回本心態拎嚟食，不過，啲龍蝦好食就值得再回味；而西班牙乳豬非常之脆口，肉質好爽，香菇丸子咬落唔油膩，外脆內軟，味道幾特別，蒜香蝦充滿香蒜味，自然惹味十足，西班牙炒飯都做得有水準，至於其他嘅熱盤，就都樣樣拎少少嚟試下。

慢煮牛柳

晌熱盤類嘅篤篤最尾，仲有一個即做慢煮牛柳嘅檔口，點解要特別分開嚟講呢，因為，師傅會直頭好似啲高級餐廳咁做成一道主菜咁，墊上甘筍蓉再配烤青椒，賣相非常精緻。的而且確，牛柳入口肉質細緻嫩滑，肉味不俗，而墊底嘅甘筍容亦都打得柔滑非常，清甜好食。

生果、甜品
食得幾飽都好，點都要留返10%空間進擊甜品嘅，呢度嘅甜品都好有亮點，擺到琳琅滿目，尤其今次更加咗數款西班牙主題甜品：西班牙油條、香橙米布甸、聖地牙哥杏仁蛋糕、巴斯克芝士蛋糕，此外，其他款式如朱古力紅莓慕絲蛋糕、天使蛋糕、香桃批、焦糖牛油蛋糕、桂花啫喱、意大利芝士餅、紅棗雪耳糖水、曲奇、蝴蝶酥、朱古力噴泉、糖果……等等，絕對滿足到所有甜魔嘅喜好。