品樂冰室：我的星期六美孚早餐 ~ 早餐無「樂」差

呢間茶記「品樂冰室」喺美孚開咗好一段日子，曾經食過一次下午茶，不過，印象一般般，但聽 啲街坊老死話佢啲嘢幾唔錯，咁都隔咗好一段日子，再嚟試試佢哋嘅早餐睇吓喺點。今早就趁天氣唔錯同老婆嚟食個早餐之後，帶佢挑戰下由美孚上馬騮山，再行到去城門，落番大窩口離開，全程用咗3個幾鐘，都算快。

由於餐廳地方唔大，所以，平時經過都已經見佢哋早市好鬼旺，今次就好啲，客都唔少，不過，就未爆滿。咁依家疫情都過晒氣，搭枱就變返常態。

茶記早餐，不外乎嗰幾款啦，不過，呢度嘅粉麵餐都幾抵食，一大碗粉麵之外，仲有埋多士、腸仔、炒蛋之類，都喺40零蚊左右。

另外，有啲外賣單張拎，就順手落張貼埋出嚟俾大家參考吓。

仿鮑魚絲火腿通粉 $40

老婆話食清少少，就揀仿鮑絲再揀配餐肉、炒蛋，份量好足，至少成片多士，唔喺得嗰1/2，通粉滿滿，仿鮑魚絲、火腿絲亦俾好多。港式清雞湯，啲通粉又煮得啱啱好，餐肉又唔喺平價貨，絕對交租功課，喺塊多士烘得未夠，搽牛油亦都hea咗啲，不過，俾到丹麥多士，又加番佢分。

特濃沙嗲牛肉公仔麵 $42

嚟茶餐廳食沙嗲牛麵都喺少少情意結，佢哋啲牛質素確喺幾高，而且，又大大件，無碎濕濕，嫩滑有肉香，兼且算多牛肉；個沙嗲汁夠香濃惹味，絕對充滿港式情懷，麵條煮得彈牙，而我就配芝士腸炒滑蛋，前者就普通咗啲，反而後者就炒得幾滑，仲食得出有少少奶香，至於丹麥多士就肯定比一般多士好食啦，多份牛油香，就算唔搽牛油都OK。

熱奶茶、熱檸水

呢個喺我哋兩公婆嘅標準餐飲，晌茶記飲熱奶茶一向都無乜點衰。茶色幾夠，有光澤，茶味香濃，滑度都OK；老婆一向都講健康，清清地熱檸水就最好不過。

今次再嚟「品樂」，感覺喺好咗好多。之後，食到飽飽，行轉中長途山既郁動吓，又幫助消化，難得天氣又幾舒服。

個人評分
味道：8/10
環境：7/10
服務：8/10
抵食：8/10
平均每人消費：HK$41

餐廳資料：
品樂冰室
地址：荔枝角蘭秀道6A-6B號美孚新邨第五期地下N20號舖
電話：2720 3099 / 9803 0900