素可泰 ASukhothai：抵食好路「素」

老婆周三晚嘅興趣班今晚喺最後一堂，下一輪要下個月先開番，所以，特意今晚出街食。佢放學行過嚟佐敦都近，所以，揀咗一家新開無耐嘅泰菜館「素可泰」試試。

單看門面都幾光鮮，入到鋪內，特色嘅吊燈，特色嘅壁磚，加上牆上嘅壁畫，裝潢較摩登，又帶點泰國風情，最好就喺唔會滿天神佛之類。而且，又夠光猛，最緊要喺啲枱櫈唔會排到好逼夾！

最有趣喺用番茶記嘅擺餐具方式，就喺枱旁嘅抽櫃，呢個設計真喺帶嚟好多方便。

翻一翻餐牌，見到好多耳熟能詳嘅泰菜菜式，類別由前菜、冷盤、湯品、咖喱、主菜、飯麵、飲品，到甜品，一應俱全，選擇非常多。初時，睇店名我真喺以為同素食有關，雖然餐牌內確喺有一頁素食，但大部份都唔喺，事後睇維基，原來「素可泰」喺泰國歷史上嘅首個有史料可以查證嘅王國，但都已經喺1238年至1438年嘅事。

蝦膠皮蛋 $68

簡單嚟講，就喺將打好嘅蝦膠包住啲皮蛋香炸，小弟都未食過呢道小食，所以，第一次試嘅感覺喺幾特別。啲蝦膠打得好彈牙，亦包得厚身，配皮蛋，效果唔錯，沾上少少泰式甜酸醬，更有風味。

泰式炒芥蘭 $69

既然同老婆食飯，點選菜式時自然會就佢，嗌啲蔬菜類，幾款蔬菜中佢就鍾意芥蘭多少少。啲芥蘭色澤青翠，炒得火喉恰好，口感爽脆，加入咗泰式豆板醬去炒，味道鹹香。

蝦金邊粉 $88

原先就睇中一道蟹肉炒粉絲，可惜已沽清，退二求其次，老婆就揀其最心水嘅泰式炒金邊粉，可以揀配蝦或煮雞，佢就選前者。出嚟嘅成品炒得有辦有眼，仲將花生碎分開上，對堅果敏感嘅人就可以唔使怕。金邊粉炒得濕潤，卻唔會黐埋一嚿嚿，味道酸酸甜甜，咪以為得面頭幾隻蝦，粉內仲有好多鮮蝦，蝦肉鮮爽。

芒果沙冰 $38、熱檸水 $22
本來想飲龍眼冰，但又想試試啲芒果沙冰，最後都揀後者，果然無揀錯。個沙冰打得好幼細，芒果味亦喺好濃郁，不過，飲落有少少似印度隻「芒果酸奶」（Mango Lassi），當然無酸味，但覺得有少少奶味，口感滑流流咁，襯住啲蝦膠皮蛋嚟食就最正。老婆就飲番佢一向嘅熱檸水，晌度飲，又無啲加配優惠，梗喺唔抵啦！

雖然都只喺三道食物，但份量足，都已經食得我哋好飽，而招呼又幾好，定價相宜，最正喺無加一嘛，好似去咗一家賣泰菜嘅茶記，快靚正。

個人評分
味道：8/10
環境：7/10
服務：8/10
抵食：8/10
平均每人消費：HK$140

餐廳資料：
素可泰 ASukhothai
佐敦佐敦道32-34號道興樓地下A號舖
2162 5288