再走入店內，以一貫和風淺木色為主，裝修簡約，配以柔和燈光，襯以淺灰色梳化椅，感覺舒服。一張L形板前席，有9個位，喺食「廚師發辦」嘅指定最佳位置，因為可以睇到師傅切魚生嘅刀功、揑壽司嘅手勢，又可以跟師傅交流。
晌呢啲高檔餐廳，除咗環境，餐具及服務都喺值得留意嘅一環。一碟、一杯都好古雅，之後盛菜嘅器皿亦都賞心悅目，店名取自兵庳縣嘅淡路島，師傅一講，原來筷子托就喺淡路島嘅形狀，蠻有心思。
而服務方面，好熨貼，就如餐具旁，就放有熱毛巾及印有店名嘅口罩套；此外，師傅例必先問問有無嘢唔食得，或食物敏感嘅指定動作，店員又不時為我哋添茶及收拾餐具，態度有禮。師傅上菜嘅速度，亦喺恰到好處，令人用餐感到悠閒唔急促。
餐牌有介紹店家少少嘅資料，原來主理嘅大廚已有40年經驗，而仲有一位本地師傅，咁我哋就可以交流多啲。無論午市定晚市，都只有「廚師發辦」供應，晚市就只有一個價位：$2,200。
而午市就有兩個價位：$980及$1,300，小弟品嚐嘅喺「竹」，非常豐富，包括季節前菜、季節刺身、珍味、蒸 / 煮物、手握壽司、卷物、麵豉湯、季節果物。順帶一提，店家唔收10%服務費，但歡迎按心意俾貼士，以示對師傅、店員嘅讚賞。
如果鍾意飲兩杯嘅客人，咁就啱晒，店家提供好多唔同產地嘅清酒，當然，為要照顧喺其他客人，仲提供埋啤酒、梅酒及汽水。
先嚟3款前菜，叫得「季節」，就即喺時令，亦喺食「廚師發辦」嘅賣點。3款前菜分別喺海膽雞蛋豆腐、九州熊本豚肉及吞拿魚魚皮啫喱凍，以精緻嘅器皿一拼送上，而享用亦有次序，就喺由左至右。
海膽雞蛋豆腐 簡單嘅蒸雞蛋，但嫩滑如豆腐般，而甚具蛋香，最有趣喺加上一瓣海膽之餘，更佐以少少日式芥末，令味道更富層次。
九州熊本豚肉 師傅解釋依家天氣凍咗好多，前菜唔想全部都喺凍嘢，所以，加入一道熱菜。啲豚肉煮得好軟腍，加入少少新潟縣寒作里柚子辣椒醬去調和，而底下仲有啲野菌同大蔥，原來喺有名堂，叫做下仁田蔥，嚟自群馬縣。
吞拿魚魚皮啫喱凍 呢一道啫喱凍做得相當精緻，外表又晶瑩，入口清涼爽口，裡面除有啲魚皮，更混有博多嘅萬能蔥同一啲辛味噌嚟提味，好有趣。
然後就睇住師傅整季節刺身，刺身會提供3款，分別喺針魚、細池魚及帆立貝，真喺睇住Mark師傅一邊切魚，一邊整理啲伴碟裝飾，又問吓呢樣，問吓嗰樣，幾賞心樂事架。
針魚刺身 啲針魚切到既薄且透，魚身顯出一線銀光，加上花串、牙惹，賣相非常之靚。師傅話針魚本身屬於淡味嘅魚類，所以，特別伴上薑蓉、芥末嚟提味，故此，入口有份小清新嘅感覺，至於針魚嘅口感，則帶點柔韌、爽身，雖然魚味淡，卻好鮮甜。
細池魚刺身 細池魚一身嫩紅色，有光澤，表面還輕輕鎅花，伴以昆布、炸茗荷（薑花嘅芽，又長知識了），同樣又喺做得賣相亮麗，此外，除佐以薑蓉、芥末，更另外加上萬能蔥醬油，可以令魚鮮味更突出，的確，比起針魚，細池魚嘅魚味明顯突出。
燒帆立貝刺身 炙燒好帆立貝，再以紫菜包住，直接從師傅手上接過嚟，呢個食法唔陌生，以往晌其他「廚師發辦」都遇過。帆立貝嚟自北海道，非常大隻，又厚肉，香脆嘅紫菜搭上軟綿嘅帆立貝，加上鮮甜無比，嗰份嘅感覺真喺正。
淡路島蠔餐牌中有一環喺叫「珍味」，小弟都喺第一次聽，大意喺一啲精緻嘅料理。以淡路島出產嘅生蠔入饌，加入土佐醋同柚子醋去煮，雖然隻蠔唔太大，但蠔味濃，嗒到海水嘅鹹鮮味，兩款醋產嘅生化學作用，有一份酸香感，卻唔嗆喉。
薯仔饅頭 再來多一客熱焫焫嘅煮物，咪睇佢好似薯蓉一嚿，師傅介紹時，原來當中有好多食材，外層喺以北海道產嘅男爵薯仔、百合、准山所搓成，所以，入口煙糯，有薯香；餡心喺饅魚加上冬菇所做，味道比較油香。此外，仲以九條蔥、芥末打咗個茨汁，真喺處處都睇到心思。
食到呢刻，師傅晌我前方擺上壽司盤及漬物，就知喺手握壽司時間到。不得不講，除咗例有嘅酸薑片之外，仲有3款唔同顏色嘅醃漬蘿蔔，以及榨菜、淮山漬及紅酒橋頭，作為每道壽司嘅間場，又有清清味蕾之效，更擺設得好有藝術感。
其實，由開始至今，已見到師傅不時切定啲魚生片，放晌一旁嘅砧板之上，為做壽司作好準備，將切好嘅魚生片攤暖備用，更不時以手背去量吓啲魚生嘅溫度，會唔會仲喺好冰凍、適合俾客人食未。仲有個細心位，就喺師傅送上第一件壽司俾客人之後，都會問一問壽司嘅飯飯會唔會過多或過少，以便之後所做嘅更合客人心水。
此時，店員仲會奉上另一條濕紙巾，喺用作食壽司抹手用，所以，小弟都扮吓日本人咁，直接用手將壽司放入口。順帶講講，師傅會不時抹番乾淨個壽司盤，令觀感更佳。
石垣鯛壽司 師傅已晌每件壽司中加咗芥末，再晌上面薄薄塗上醬油。石垣鯛色澤亮麗，面頭放咗少少煮過嘅昆布，入口肉質鮮爽，魚味不失禮，飯粒挺實唔鬆散，口感軟綿。
深海池魚壽司 由於第一件壽司嘅飯量剛好，所以，之後嘅都唔需要加多或減少。晶瑩而帶淡粉紅嘅深海池魚望落保持一貫光澤，足見其新鮮度，魚質嫩得嚟帶點點爽口感，魚味鮮甜。
左口魚壽司 好多時食「廚師發辦」都有呢一款魚嘅蹤影，可以講喺常客。最有心思喺加咗一小件火炙裙邊，增加其油香度，卻又唧少少青檸汁去膩，所以，一啖入口，油香、清爽、鮮味大融和。
赤陸壽司 赤陸，又叫喉黑，真喺比較少食，小弟都唔肯定有無食過，總之，一樣細心去品嚐。師傅話專登連住少少魚皮，並輕輕炙燒過，魚身散發點點油香，加點以米、瓜、味噌、辣椒製成嘅三星漬，令食味更富層次。
鰤魚腩壽司 踏入11月，正喺鰤魚當造之時，鰤魚就即喺油甘嘅大人，咪以為大條咗就會肉質嚡，其實佢喺頂級食材，油份更重。今次更喺試其腩位，肉質入口油潤而甘甜，放上少少香脆嘅炸穚頭，令口感更特別。
喜之次壽司 喜之次又喺另一高級嘅食材，火炙過，變得額外油潤甘香，肉嫩而帶點膠質，魚味頗濃；再加點點柚子胡椒嚟提味，確喺令魚鮮味更突出，有畫龍點睛之效。
中拖羅壽司 師大介紹時，中拖羅嚟自青森縣大間，仲熟成咗幾天，原來啲魚生都可以熟成，真喺長知識。件拖羅色澤艷紅，好新鮮嘅感覺，師傅不時晌啲刺身上鎅幾刀，増加美感。油花分布平均，所以，入口真喺好有油香，肉質柔嫩鮮甜。
海膽白蝦壽司 海膽喺北海道產，師傅更一整盒海膽拎出嚟介紹，而最誇張嘅喺，壽司飯上放上唔少嘅鮮甜，之後，就幾瓣幾瓣海膽咁鋪上面，亳不吝嗇，真喺「餸」多過飯，入口嗰一陣陣海膽甘腴豐厚嘅鮮甜味，加上綿密細膩，有種甘甜嘅餘韻，可以話無懈可擊。
箱押鯖魚壽司 1、2、3……8，餐牌就寫住手握壽司喺8貫，鯖魚壽司喺變咗「私人醒」嘅第9貫，失驚無神有驚喜，呢啲就喺食「廚師發辦」嘅趣味。切好之後，再火灸，師傅又有分享，佢話支火槍喺特吃訂製，出嚟嘅火焰喺唔會有嗰陣煤氣味，讚！此外，再晌面頭鋪上一塊薄到透嘅昆布，包上紫菜，由於鯖魚以醋漬過，飯內又混有黑白芝麻，整體酸香好食。
拖羅蓉卷去到「廚師發辦」嘅尾聲，梗有一道卷物，好得意，大多數都喺吞拿魚腩呀、拖羅蓉……之類。今回所食嘅喺拖羅蓉卷，睇住師傅做，放入大量拖羅蓉，再混入少少蔥碎、芝麻，雖然無咩驚喜，但一咬紫菜就應聲脆開，而魚蓉綿密鮮味，油香慢慢晌口腔內溢出四散。
麵豉湯 食完多款壽司、卷物，都喺時候飲番碗熱湯暖暖腸胃，簡單一碗麵豉湯 ，麵豉嘅味道香濃，尤其晌呢啲寒冷嘅日子，就更添暖意，飲過更感舒服。
季節果物真喺唔上到枱，都唔知會喺咩生果，卒之揭盅，喺甜度甚高嘅富山杮，杮肉清甜。有時晌啲網購中，更見做成富山杮乾，作為高級嘅禮盒！
四葉草芝士蛋糕布丁燒（節慶加推）因為時值聖誕，同場加映額外奉送多一客「布丁燒」，睇個樣有少少眼熟，師傅好老實話唔喺自家製，無錯，就喺對面街「小確幸」嘅出品喇，佢哋嘅布丁燒頗有口碑，當然，店家都加多少少「二次創作」，加點雜莓，唧上自家製朱古力漿，整靚個賣相。個布丁燒非常好食，上層原味布丁做咗輕輕嘅焦糖，而口感軟滑富蛋香，底層嘅芝士蛋糕綿密富芝士香。
今餐「廚師發辦」唔止品嚐到多款美食，亦有唔少驚喜，又學咗唔少嘢，非常滿足，真喺好有食「廚師發辦」嘅體驗。當然，小弟唔喺咩食家，對好多食材、烹調方法嘅認識都好有限，所以，每一次「廚師發辦」嘅體驗，都喺一次好好嘅學習機會。
個人評分
味道：9/10
環境：9/10
服務：10/10
抵食：9/10
平均每人消費：HK$1,300
味道：9/10
環境：9/10
服務：10/10
抵食：9/10
平均每人消費：HK$1,300
餐廳資料：
淡路 Sushi Awaji
中環歌賦街39號地舖
6060 5447
淡路 Sushi Awaji
中環歌賦街39號地舖
6060 5447
沒有留言:
發佈留言