華鳥風月 Kacho Fugetsu：煩惱盡「燒」

日本菜一向予人感覺都喺高級啲，夠專注，用料靚，更喺不時不食。今晚同朋友嚟到銅鑼灣食廈Cubus嘅「華鳥風月」，嘆嘆特色料理、串燒，絕對喺高質嘅演繹。餐廳佔地兩層，而要到訪餐廳，喺要先上25/F，呢一層喺新派時尚嘅居酒屋，而落一層23/F（餐廳有專用嘅樓梯）喺附屬嘅雞尾酒吧，餐前或餐後落嚟飲番杯都幾唔錯。

走進餐廳，非常摩登型格，一室黑、白、灰，裝修簡約，牆上嘅和風彩繪頓成亮點。左邊一排喺吧枱位，可以欣賞到師傅整串燒，而右邊喺餐枱位，適合較多人一齊用餐嘅位置。

而走到餐廳到尾，見到一面仲有個廂房，不過，睇到有啲客，唔太方便走入去影相，所以，遠距離補一張。

另外，近門口，吧枱之上，放咗一大盤「是日廚師精選魚鮮推介」，師傅話喺由日本漁市場直送到港嘅海產，客人可以選擇唔同嘅烹調方式，當然，師傅都會提供一啲建議食法嘅。

食日本菜，一向啲餐具都特別精緻，就算喺今晚咁摩登嘅居酒屋，啲餐具都一樣好靚，所有餐具、容器都以天然石材造成，非常有質感。此外，招呼亦好貼心、有禮，喺一貫日本餐廳嘅高服務水平。

靜岡縣水果茄沙律 $78

唔止海產，好多食材都用上日本貨，定價略高，但質素自然更有保證。簡簡單單水果茄、沙律菜，再加少少自家醃製蕎頭組成。水果茄嘅甜度非常高，而沙律菜新鮮爽脆，蕎頭則酸酸甜甜，食罷令人更開胃，為今餐飯打開序幕。

海膽松葉蟹肉拖羅他他 $288
可以講喺招牌菜式之一，以帶子刺身、松葉蟹肉、拖羅他他做成塔型，加上海膽同黑魚子做裝飾，賣相本身已經又靚又矜貴，仲要有埋咁有心思嘅擺盤，真喺有齊晒打卡呃讚嘅元素。食法就以附送嘅紫菜包住嚟食，紫菜就脆到不得了，而幾款海產食材混在一起，一個字講晒：鮮，尤其啲蟹肉，鮮甜得過份。

鵝肝茶碗蒸 $78
食過兩款凍嘢，再嚟一個熱騰騰嘅茶碗蒸就最好不過，不過，呢一道茶碗蒸喺加強版，因為加咗一大件香煎鵝肝，讓鵝油滲進去蒸蛋中，份外「脂」味；再者，啲鵝肝口感綿密甘香，蒸蛋則滑溜有蛋白，非常好食。

既然嚟到居酒屋，又點可以錯過啲串燒，一口氣試咗4款，包括虎蝦雞皮串、阿波尾雞翼、秋葵及大蔥，唯一可惜唔喺晌正我面前嘅燒爐度做，而喺晌另一邊燒爐做，睇唔到師傅表演。

虎蝦雞皮串 $98

細心品嚐，就會食得出當中嘅心思，虎蝦中間已去殼，入口自然啖啖肉，而最特別喺以雞皮去包住虎蝦去燒，中間仲耍捲埋一片紫蘇葉，所以，入口油香得嚟唔肥膩，又有陣陣紫蘇香，加上蝦肉夠晒爽口，真喺貴得有道理。

阿波尾雞翼 $48

餐牌列明出自日本德島縣產，小弟都曾經食過一次阿波尾雞。雞全翼燒得金黃，陣陣香氣，確喺誘人。入口外皮極之香脆，咬落咔咔聲，肉質嫩滑多汁，證明師傅做串燒手勢好，時間拿捏啱啱好。記得不妨加少少師傅特製嘅辣粉，就更加好食！

秋葵 $28

秋葵就簡簡單單燒香，再灑少少鹽及七味粉調味，秋葵一向入口都有種「滑潺潺」嘅感覺，但燒過之後，就無乜呢種感覺，而咬落脆口，簡單健康。

大蔥 $28

大蔥同樣都喺簡簡單單燒香再灑少少鹽及七味粉調味，而大蔥本身都好新鮮，入口蔥香自然清新，食咗啲濃味嘅，又食番啲清新嘅，平衡吓，又叫有多啲蔬菜落肚，無咁大罪惡感。

香煎甘鯛配粟米蓉 $188

雖然無成條魚咁叫嚟食，但呢一道香煎甘鯛亦都好正，真喺唔知點整法，外層嘅魚鱗煎到好酥脆，咬落勁卜卜脆，而魚肉超嫩滑，又有魚味，底下仲有啲粟米蓉，非常清甜，可以以魚肉沾嚟食，事後跟店員傾開，原喺粟米蓉自家製，而粟米嚟自宮崎。

燒飯糰（明太子、辣味增）$48

最後，以燒飯糰墊墊肚，燒飯糰有3款口味：明太子、辣味增、芝士，試咗前兩者，最好食喺明太子，鹹香惹味，然而，辣味增就相對鹹咗啲，而講到啲燒飯糰，就真喺燒得啱啱好，唔會好乾，外層有飯焦香，內裡則保持軟熟。

蕨餅

餐廳嘅小小心意，送上一小件蕨餅，口感軟糯，過過口癮都好。

晌上層用完餐，店員都會例必介紹你落去下層嘅酒吧，就算唔飲嘢，都可以參觀吓。其實，佢哋話，有啲客就相反，先晌下面飲吓嘢，傾吓偈，好似收工啲Happy Hour時間咁，等個人放鬆吓，之後先再上去食飯。

落到去又真喺幾別有洞天嘅感覺，一來地方幾大，啲枱又喺矮枱，空間感十足，二來吧枱後面牆身櫃擺滿酒，餐廳尾嘅牆身又畫有白鶴及櫻花，感覺真喺幾唔錯。一藍、一綠嘅梳化椅，坐落去真喺非常舒服。

同友人都唔嗜酒，所以，就問問有無非酒精類飲品，店員就推介咗一啲無酒精雞尾酒俾我哋，定價都跟出面嘅酒吧差唔多，但呢度勝在就更好坐。

Yuga Soda $88

以荔枝、檸檬、梳打水溝成，再以玫瑰花瓣作點綴，而最特別喺面頭一層用蛋白打成的泡沫，非常輕柔，帶點點玫瑰香氣，而拌勻之後，飲落喺陣陣清爽，卻又有種荔枝嘅清甜香味慢慢滲出嚟，幾特別，又幾好飲。

Citrus Dream $88
另一杯就以橙汁、熱情果、芒果、牛奶組合而成，再以一片香橙乾作為點綴，色澤鮮艷亮麗，賣相吸引。飲落，又估唔到果汁跟牛奶都幾夾喎，而且，仲以為加咗熱情果會好酸，卻唔喺，反而有重富層次嘅果香。

今次，無論在上層居酒屋所嘆嘅美食，抑或下層酒吧所飲用嘅無酒精雞尾酒，都好享受，加上朋友間嘅風花雪月，讓人可以拋開煩惱。

個人評分
味道：9/10
環境：8/10
服務：9/10
抵食：8/10
平均每人消費：HK$800

餐廳資料：
華鳥風月 Kacho Fugetsu
銅鑼灣開平道1號Cubus 23-25樓
2872 8968