Youniqueed：慢活 • 細味

大除夕，有得放早，難得早收工就學人慢活一吓，過到嚟尖沙咀嘅「Youniqueed」，因為見其風評不俗，就豪食一次下午茶。雖然話豪食，又唔喺咩英式下午茶嗰啲咁貴，只喺比起平常去茶記嘅，食得貴啲而已，所以，更加要慢慢嘆啦！

走進餐廳，屬小店規模，座位真喺唔多，收銀前有3張吧枱位，而靠牆一邊有3組二人枱，所以，好易就坐滿。一室以黑白為主色調，配以壁燈，加上小小輕慢音樂，感覺倒有幾分法式小館風情。

話喺小店，但估佢唔到食物都提供幾多種類，既然喺咖啡店，主打梗喺有多款咖啡啦，此外，仲有啲創意咖啡、茶飲、朱古力，甚至雞尾酒都有。

食物方面，主菜類、沙律、全日早餐、貝高包、甜品都有供應，唔會得啲蛋糕、三文治等輕食而已。

早餐時段、晚市時段，更提供多少少其他食物，不過，定價並非套餐價，飲品都喺需要另叫。

梳乎厘班戟配意大利低脂雪糕 $88

食梳乎厘班戟唔單止食味道，仲有手工，因為呢款甜點喺無得預早整定，都喺要即叫即做，故此亦要耐心等候。賣相就真喺簡單咗，不過，兩個梳乎厘班戟雖然送到嚟有少少塌，質素真喺唔差，口感十分鬆軟，帶有微微濕潤感，切開睇得出質感好綿密，甚具蛋香；而雪糕嘅朱古力味極之濃郁，富奶香，且非常軟滑，食到尾段，直頭當朱古力漿咁用。

鮮奶咖啡 $43

雖然店家有唔少特別咖啡，但無懸念，都喺揀番最心水嘅鮮奶咖啡。一來可欣賞到師傅巧手嘅拉花，二來飲到師傅沖泡嘅手勢，老實講，兩者都做得有水準，個拉花好有心思，好巧手，而且，線紋細緻，入口就口感好均勻，順滑綿柔，醇厚芳香。

一份班戟、一杯咖啡，確喺可以讓人暫忘塵囂，雖然只得一個人，但一個人有一個人嘅好處，有獨處嘅空間，沉澱一下思緒，為下一步作準備。

個人評分
味道：8/10
環境：7/10
服務：8/10
抵食：8/10
平均每人消費：HK$123

餐廳資料：
Youniqueed
尖沙咀加連威老道41C號嘉威大廈地下A2號舖