金燕島潮州酒樓 Come-Into Chiuchow Restaurant：分「金」同味

太大棚人嘅家族飯，晌呢兩年都無出席過，最多只喺啲4人飯聚，自己本身就唔喺太怕病毒，只喺盡量減少群聚嘅社交接觸。冬至翌日晚，都有出嚟食吓飯，只喺跟啲舊同事聚一眾。難得咁耐先見一次，所以，大家都想食好啲，揀咗嚟「金燕島」食潮州菜，話晒佢都喺米芝蓮推介嘛，專做傳統潮州菜。我自己亦好耐無食潮州菜喇，數番對上一次，已經喺年初嘅事，仲要喺外賣嚟。

雖然，今次都喺第一次嚟「金燕島」，但事前都上上網睇過，佢都已經有好多年歷史，而內裡嘅裝修都喺舊派一啲，但就感覺古雅，又有好多富中國風嘅藝術擺設，客人都多數喺上年紀嘅，包括我哋，哈哈！但唔好理，確有唔少捧場客啫。

枱上已放好所有餐具、口罩袋，公筷亦會列明，但唔慣用公筷嘅人往往食食吓就亂晒，整體呢度嘅招呼幾好，啲店員亦好勤快。

鹹酸菜 $25

食潮州菜，餐前小食大多數都喺鹹酸菜或者脆花生。小弟細細個時窮，當然，依家都只喺小康，就試過加鹹酸菜加碗潮州粥，就當一餐。 此外，仲會先黎細細杯既功夫茶品嘗吓。為咗好睇，都唔會淨喺上兩杯俾你，俾就俾一小盤6杯，人少咪飲多杯囉，功夫茶色澤橙黃清澈、味道醇厚甘涼。另外開咗壺鐵觀音，茗茶就每位收$20。

黃金炸雙棗 $200

雙棗即喺蝦丸及蟹丸，由於蝦丸（圓形）以蝦肉撻成蝦膠做成，口感彈牙，滿有蝦味；而蟹丸（方形）以蟹肉加生粉搓成，再以腐皮包住，所以，質感紮實啲，口感兩者各有少少分別，唯一共通喺兩者都炸得甘香可口，卻唔油膩。 另一亮點喺配上兩款蜜糖，深色嘅更帶有柑桔味（友人話似「念慈庵」喎），淺色嘅帶有梅子香。

太極天河素 $50

賣相好有亮點嘅一道湯羹，因為綠白兩色做成太極陰陽圖案，頗為吸晴。綠色喺菠菜蓉加入高湯，白色喺雞肉末加入高湯，各有各試都嗒得出喺唔同味道，而再將兩者混和，又別具滋味，味道非常鮮甜，口感極之綿滑。

梅子明爐烏頭 $450

是晚嘅主角登場，咪以為泰式先有明爐烏頭，潮州菜一樣有，以明火烘住，就唔會咁易變腥，可以慢慢食，而烏頭肉質嫩滑，唔會有泥味，加入梅子去煮，酸香醒胃，有種越食越開胃嘅感覺；再者，內裡仲混有好多配料：豬肉碎、唐芹、大蔥、鹹菜、蕃茄，十分豐富，記得個湯都唔好嘥，可以飲埋去。

魚蛋煮紹菜 $180

潮州魚蛋一向有名氣，做得好嘅魚蛋唔喺度度都有，「金燕島」嘅魚蛋、炸魚片都喺自家手打，而且，做得特別大粒，入口果然爽彈，魚味濃郁；此外，紹菜亦好有驚喜，紹菜一向都喺平價菜，但食落十分清甜，我哋就覺得喺以上湯去煮，索晒味，所以，份外鮮甜。

黃金炸油粿 $60

有別炸油角，炸油粿就比較軟身，有少少似煎堆，口感綿糯煙韌，仲有，層外皮唔知喺咪加埋南瓜蓉或蕃薯蓉之類，帶少少香甜味，內裡喺芝麻同花生餡，喺幾好食。潮州菜臨尾往往再上多一次功夫茶，啱晒啦，因為功夫茶有健脾開胃、解酒除膩之效。

幾個舊同事聚一聚，食餐好嘅，傾咗好多近況之餘，又回味咗唔少開心往事，但願大家身體健康，長食長有，期待下次再聚，又再分甘同味。

個人評分
味道：8/10
環境：8/10
服務：9/10
抵食：7/10
平均每人消費：HK$340

餐廳資料：
金燕島潮州酒樓 Come-Into Chiuchow Restaurant
尖沙咀寶勒巷18號Oasis Avenue 香港粵海酒店1-2樓
2322 0020