本地薑 Soul Ginger：突破「薑」局

過嚟葵芳搵食唔算多，都叫間唔時有，但大多數都喺「新都會」、「葵涌廣場」呢一邊，但以地鐵為界，另一邊屬「領展」嘅「葵芳廣場」（跟「葵涌廣場」只喺一字之差）就完全未嚟過。若非老友喺街坊，應該都唔會過嚟吧！今晚就同呢個老死聚聚舊，兩個麻甩佬，食吓小炒，傾吓近況。

餐廳門面幾光猛，裡面一室以白色為主調，以二人、四人枱為主，但樓底特別高，一眼所見，都喺做街坊生意，不時有啲街坊買外賣。

餐具、基本調味料簡單放晌枱上，依家疫情緩和就好啲，否則，無遮無掩就唔喺咁衛生。但依家基本上都會要杯熱水用嚟洗洗餐具，求個安心。

單睇店名你未必估到佢賣乜，翻一轉餐牌，其實都喺新派少少嘅茶記，早午茶餐、碟頭飯、小炒……固然會有，亦兼賣吓米線咁，較特色喺一系列嘅薑湯泡飯，啱晒依家有啲天寒地凍嘅時候食。總之，一貫茶記風格，乜都有啦。

椒鹽香酥雞球配白飯 $78

晌出面食小炒，就梗喺揀啲唔家常嘅，屋企唔方便煮，又或唔識煮嘅，所以，小弟就揀呢一道雞球。份量唔少，炒得啲雞球一身金黃，睇見滿滿椒鹽，就好誘人。試一口雞球，掂喎，啲雞肉頗嫩滑，而且，好有椒鹽香氣，非常惹味，拌飯就啱晒。

豆腐火腩煲配白飯 $88

兩個麻甩佬唔講咩浪漫，但喺，老友都揀豆腐火腩煲，純粹鐘意食，脂肪萬歲！個煲仔菜送到嚟真喺嗞嗞咁聲，夠晒熱焫焫，配有好多蔥同洋蔥，所以，都幾香噴噴。啲紅燒豆腐做得好嫩滑，火腩入口又夠鹹香，少少肥膏在所難免，但就喺食出一種情懷。

鹹檸七 +$7

啲小炒套餐包大大碗白飯同基本餐飲，轉其他就如慣例要加錢。食小炒、煲仔菜，所以，揀飲冰凍嘅鹹檸七就最好不過，原罐雪碧送上，自斟自飲，個鹹檸切成檸角，比原隻半個難篤啲。食住啲香口嘢，再飲喺凍飲，尤其喺汽水類，特別「疏肝」。

八兩金 +$22

店家仲好特別提供一啲特飲，猶如酒吧的無酒精雞尾酒咁，如果轉飲呢一類就有正價減$10優惠。老友就想試試呢款由薑汁、菠蘿汁、梳打水溝成，再放上原片菠蘿做裝飾嘅「八兩金」。佢就話入口甜甜酸酸辣辣，感覺都幾複雜、幾得意，一試都無妨。

呢一類茶記小店，都唔喺講咩服務，不過，啲阿姐都幾好招呼，幾有禮貌，加上啲小炒又確喺做得唔錯，有「鑊氣」，比預期好喎，只喺位置少少偏，未必多區外客而已。

個人評分
味道：8/10
環境：7/10
服務：8/10
抵食：8/10
平均每人消費：HK$95

餐廳資料：
本地薑 Soul Ginger
葵芳興芳路177號葵芳廣場地下18號舖
9217 6226