山區裡的走走趯趯: PHI Coffee & Pancake：「梳」乎午餐

2021年12月23日星期四

PHI Coffee & Pancake：「梳」乎午餐

臨近聖誕，約咗同樣晌中環返工嘅舊同學食晏，當喺慶祝又好，當喺聚一聚又好。其實我都有少少怕食晏時間出嚟同人逼，因為中環放飯時段真喺好多人，人山人海咁，但同老同學食飯就點都要出嚟嘅。選址揀咗新開無耐嘅「PHI」，小弟就未到訪過，試新嘢我一向好有興趣。

餐廳嘅裝修帶點文青，一來以淺色木系為主調，配以柔和燈光，予人感覺舒服；二來喺好多位置都插上大量乾花、植物木，簡約富文藝氣氛，有份寫意感。

晌門口望入去，感覺室內環境好似唔喺好大，再走入啲，原本個鋪位都幾深、幾長。

此外，除咗招牌嘅梳乎厘班戟之外，佢哋嘅甜品都好有亮點，晌餅櫃裡邊就放有實物，當然要影一影啦。

食物方面，主打自然喺其梳乎厘班戟，款式十分之多，仲有多種鹹食，如三文治、法式多士、沙律、意大利麵、全日早餐、熱香餅，以及多款蛋糕；而飲品亦都非常多元化、多選擇，點主食，更可以以優惠價加配。

時值聖誕，店家亦相應節目推出咗幾款應節梳乎厘、特飲同咖啡。不過，小弟食評出街之時，呢個節日限定都應該完結咗。

青口煙肉意粉 $88

先嚟一碟鹹點墊墊肚先，本來就想試個辣蕃茄蟹肉扁意粉，不過，舊同學唔食得辣，就揀呢一道意粉，睇落亦都唔差喎，除了青口、煙肉，仲有啲大蜆，青口同大蜆入口都幾鮮甜，煙肉就添加咗啲鹹香味，意粉煮得咬口，又帶點點蒜香氣味。

宇治抹茶紅豆梳乎厘 $112

其實，店家嘅多款梳乎厘都好吸引，真喺唔易揀，然而，舊同學算喺抹茶控，就即時變得無懸念。單睇個梳乎厘嘅賣相，已經無得輸，3大個厚身嘅梳乎厘班戟，再鋪上紅豆、抹茶忌廉、抹茶金寶、三色小丸子、抹茶寒天、抹茶吉士醬，臨近聖誕，就加多個聖誕裝飾。梳乎厘部份鬆軟綿綿，空氣感強，微微濕潤，極有蛋香，紅豆又綿又清甜，金寶焗得好香脆，小丸子口感軟糯煙韌，寒天滑溜無比，配以忌廉、吉士醬，真喺非常好食。