Mood Coffee：即慶下午茶

過到嚟金巴利街買少少韓國嘢，沿天文台道出番漆咸道時，偶然經過依一間非常的的骰骰嘅咖啡店，隨心就坐低享受一小段下午茶時光。

環境真喺晌門面已可以一眼睇晒，只有兩張高腳櫈，明顯就喺做外賣生意，尤其附近寫字樓多，點都有一定嘅客源。

基本上，咖啡嘅分類為黑同白，亦有數款特色咖啡，最特別喺呢度有提供豆奶、杏仁奶、燕麥奶，當然，需要額外加錢，但適合對牛奶敏感嘅客人。另外，仲有幾款「Dirty」系列，而食物方面，主要提供多士，以及一啲英式鬆餅。

鮮奶咖啡 $42

小弟一向就好加入奶泡嘅咖啡，咖啡嘅拉花好靚仔，表面非常平滑，線紋又夠細緻，個拉花亦算喺對稱，入口醇香之餘，有陣陣果仁香，奶泡打得綿密，加上沖泡嘅手勢非常好，故就算無攪過，口感綿柔而均勻。

三重朱古力肉桂焦糖流心鬆餅 $28

作為下午茶，食個鬆餅就啱啱好，不過，到訪之時只淨番一款口味。堂食嘅話店員會幫忙翻熱，果然喺三重朱古力，朱古力味好濃郁，鬆餅嘅口感帶點濕潤，而咬入去，真喺有流心嘅效果，只不過，肉桂味就比較隱約。

呢轉就純粹快閃飲杯咖啡，食件鬆餅，過吓癮，無話攤抖好耐，因為辦完事就返去食做節飯。

個人評分
味道：8/10
環境：6/10
服務：8/10
抵食：8/10
平均每人消費：HK$70

餐廳資料：
Mood Coffee
尖沙咀漆咸道南81號南海大廈地下E號舖
2789 9498