禾味家 Wo Mei Ka： 「禾」諧組合

聖誕節期間，同朋友行吓山喺最佳節目，今次就由金山，一直上筆架山、獅子山，最後經慈沙古道，落慈雲山離開。由朋友帶路嚟到呢一間屋邨茶記「禾味家」食個下午茶先結束，唔喺朋友帶路，真喺估唔到呢度有間茶記，隱秘到呢。

既然屋邨茶記，加上從外圍睇呢條邨都有啲舊，所以，裝修都唔會太新派，整體嚟講，平平實實，乾淨企理，而且，地方都幾大，枱櫈嘅編排都闊落。

雖然，餐具就咗放晒晌枱面，方便到客人，但呢啲時勢就唔多衞生，不過，依家稍為注重衞生嘅客人，都會要杯熱水洗洗啲餐具消吓毒，等自己都安心啲。

下午茶時段，晌門口就放咗大大個餐牌，揭起埋下午茶嗰頁，一眼睇晒，有輕盈啲嘅，亦有燒味、粉麵飯餐，始終都喺做屋邨客，定價都算相宜。但老實講，服務就一般般啦，收幾十蚊個茶餐，都唔會要求太多吧！

金牌沙嗲牛肉包 $32

通常菠蘿油喺首選，無嘅話好多時都揀沙嗲牛肉包，因為，茶記嘅沙嗲牛都衰唔得去邊。睇樣，個沙嗲牛肉包好足秤，大大條熱狗包，塞滿晒沙嗲牛肉，啲牛肉好腍滑，充滿沙嗲香，汁底夠晒惹味，而且，唔會太瀉身，流到一手都喺，包身又暖烘烘，好軟熟，不失金牌之名。

熱奶茶

嚟到茶記，熱奶茶喺必然之選，用上大瓦杯，既喺情懷，又較保溫。色澤好對辦，深褐色得嚟有光澤，入口茶底醇香之餘，茶奶比例好，入口茶、奶嘅味道平衡，口感亦都算幼滑。

友人話佢哋嘅茶餐都唔錯，雖然，只喺試咗兩樣食物，未知其他嘢喺點，但起碼最基本嘅兩樣嘢都無失威先啦，而且，沙嗲牛包搭熱奶茶，喺茶記嘅茶餐中，幾和諧嘅組合之一。

個人評分
味道：8/10
環境：7/10
服務：6/10
抵食：9/10
平均每人消費：HK$32

餐廳資料：
禾味家 Wo Mei Ka
慈雲山慈正村慈正商場一期地下2號舖
2326 9797