太平洋咖啡 Pacific Coffee：又到聖誕！

同老友晌青衣走一轉短山「青衣自然徑」，輕鬆易行，完咗，落番青衣城，都近5:00pm，今次下午茶就唔食喇，因為晏咗，轉頭就返屋企開飯，坐低飲杯嘢兼抖一抖啦！經過青衣城二期門口，撞啱見到間Pacific Coffee，又有啲贈券，一於趁到期前用埋去。

呢間Pacific Coffee都算迷你，而啲枱更加喺添，明顯喺俾人飲吓嘢、食啲輕食，反正我哋都喺飲杯嘢，都無所謂，不過，如果嚟當正餐咁食，部份枱就有少少淺窄嘞。

老友無咩心水，不過，見新推咗一啲聖誕主題飲品，就應吓節試試。雖然仲有成兩星期先到，不過，商場內嘅氣氛已經好聖誕。

黑森林燕麥朱古力咖啡 $43

Pacific Coffee嘅咖啡一向都唔錯，而呢一杯以黑森林為主題，原來喺加入咗一啲雜莓元素，誘發出淡淡嘅雜莓酸甜香味，再配上植物做嘅燕麥奶，確喺幾香滑，友人讚唔錯。

黑森林燕麥朱古力 $43

食晏時飲咗杯熱奶茶，用咗是日配額，所以，今回就試吓杯熱朱古力，朱古力味好濃郁，口感幾滑，以前都試過好幾次燕麥奶，真喺跟一般牛奶差唔多，而滲出微微雜莓果香，重一啲可能仲好。

近排又有新變種病毒，希望香港無乜事，大家可以過一個愉快嘅聖誕啦！

個人評分
味道：8/10
環境：7/10
服務：7/10
抵食：8/10
平均每人消費：HK$43

餐廳資料：
太平洋咖啡 Pacific Coffee
青衣青敬路31號青衣城二期1樓186-187號舖
2968 4125