鼎家喜筷 Ding Lee：開心「喜」筷

以地區計，荃灣可以講喺嚟得多嘅區域，皆因一個站就過到嚟，加上幾個大商場連埋晒，買嘢、搵食都非常方便。雖然冬至就過咗，不過，都搵個藉口同朋友聚一聚，大家都喺住晌屯馬線之上，所以，揀咗晌「海之戀」開檔嘅「鼎家喜筷」食餐開心聚舊飯。

餐廳嘅環境光猛醒神，有長枱，有圓枱，少人、多人都合適。而最搶眼應該喺天花啲白色霓虹光，有鼎爺嘅標記，又有主打嘅燒鵝公仔。

其實，除咗天花，周圍仲有好多鼎爺相關嘅彩繪或標記。

我就幾欣賞佢哋嘅防疫，至少做到足嘛，用啲大塊嘅膠板隔一隔，又真喺睇你有無掃安心出行。

之前一直以為主打喺燒鵝，翻一轉餐牌，原來食物非常多元化，斬料燒味、特色燒味飯、意粉、海鮮菜式、煲丁面餐、鍋飯定食、足料靚湯、鼎家小食、點心、三文治精選、鼎家甜品，真喺食物都已經有咁多種類。

飲品又點？亦喺估佢唔到咁多選擇，除一般茶記常見嘅啡茶檸水……之外，仲有鮮果花茶、芝士茗茶、沙冰、蘆薈綠茶、芝麻系列、特色咖啡及奶茶，不愁無選擇。

除咗主餐牌，枱邊仲放有個揭頁餐牌，有啲額外嘅晚餐選項，如精選晚餐、臘味精選、養生花茶、香芋特飲、全新可可飲品……等等。而晚餐、主食類……等等，都會包基本飲品，但可加錢轉其他飲品。

鼎家柑橘燒鵝（例）$178

睇起嚟外觀真喺燒得幾靚仔，外皮非常有光澤，睇餐牌有咁嘅介紹：以多種鮮果醃製，更長達18小時，亦無添加味精，並晌店內明爐即燒，估唔到都花唔少心思。入口外皮又確喺幾香脆，油潤而不膩，肉質嫩滑鬆化，且富肉汁，佐以自家製嘅柑橘醬，甜甜酸酸，更去油膩感，不愧鎮店之作。

化皮燒腩仔上湯米粉（晚餐）$68

燒鵝唔錯，而燒腩仔亦唔失禮，望上去真喺無乜肥肉，算得上夠晒瘦，外皮好香脆，腩仔肉好鬆化，醃得夠味，沾上少少芥辣，真喺幾好食；上湯米粉份量亦好足，亦無話煮到過腍，湯頭更無話有淡而無味嘅問題，如果一個人食，實好夠飽。

燒豬肋骨配薯菜（晚餐）$128

因為晚餐餐牌無相睇，故初時以為一如美式嘅燒豬肋骨咁，嚟到就比較似燒味嘅燒排骨，比較細條啲，食落就更加肯定喺，肉較為少，表面搽得較多麥芽糖，香就香，但稍稍黏牙；伴有炸薯條及酸青瓜，前者香脆不膩，後者酸香開胃，喺中西合壁嘅薯菜。

黑芝麻咖啡 +$28

散點賣$48，不過，點咗晚餐，就有轉配優惠。餐牌有介紹喺將自家炒製嘅芝麻粉加入鮮奶打成奶泡，再倒入咖啡當中，怪不得呈現出上下兩層。友人就話芝麻香好突出，攪勻再試，感覺幾得意，有陣陣芝麻味，又滲出醇厚嘅咖啡香。

田園芳香芝士奶蓋 +$28

散點賣$38，同樣叫咗晚餐關係，+$28就可以轉配。芝士奶蓋打得非常厚身，先試一口芝士奶蓋，鹹鹹香香，口感極之綿密，而茶底以花茶沖泡，好芳香，之後再將兩者拌勻，感覺好夾。

熱鮮檸檬薏米水 $38

講健康揀呢一款薏米水就最好喇，一來天寒地凍，飲杯熱飲就最暖胃舒服，二來薏米有益，加入鮮檸檬令薏米水變得清新好飲，更啱今晚食咗少少油膩嘢添啦！成壺咁上，仲可以成晚慢慢嘆。

整體嚟講，食物揀幾樣都喺同燒味有關，質素做得穩打穩紮嘅，反而，飲品富特色，又有驚喜；服務方面都幾好，見佢人手好似唔多，但啲店員幾勤快，快手快腳搭夠，此外，亦好有禮，會主動收搭一下枱面，等啲客人坐得舒服啲。

個人評分
味道：7/10
環境：8/10
服務：8/10
抵食：7/10
平均每人消費：HK$170

餐廳資料：
鼎家喜筷 Ding Lee
荃灣大河道100號海之戀商場3樓3012號舖
2488 8399