一冰廳 Yat cafe：值的「一」試

今朝早陪老婆過去長沙灣蔬菜統營處攞水耕菜，所以，跨區過嚟荔枝角食早餐，因為佢時不時過嚟荔枝角買嘢，可以講仲熟過我，而今次試呢間「一冰廳」都喺佢主動推介我試下。晌餐廳鋪面，喺見唔到餐廳招牌，其實喺工廠區通常見到呢個現象因為好多時呢啲餐廳都喺攞食堂牌，不過，就當普通餐廳，照樣對外開放。

入到去，一室鮮橙色襯白，加埋燈光光猛，地方整潔，睇落令人幾醒神；天花更以餐廳嘅英文造成光管，左右兩邊都喺啲4人枱或卡位，而中間就喺6人枱，排得比好多茶餐廳較為鬆動。嚟嘅時候都成十點幾，所以，客人唔多，但望上去就算坐滿，起碼都唔會背貼背，有少少隙位走盞下。

講講餐牌，都有啲花臣嘢。先講講食物，呢度嘅早餐非常多元化，有簡單嘅三文治午餐，亦有扒餐、全日早餐……，甚至乎飯餐都有，而且啲選項好多彈性，定價亦唔會話好貴，絕對突出到茶記嘅精神。用水筆直接喺餐牌上的度剔，剔好就交俾店員落單，另類環保做法。

而餐具就放晒晌枱面側，仲有簡單嘅調味料同紙巾。

歐陸早餐（板燒雞扒） $47

老婆話辛苦咗一輪，今早食好啲，再者，今日食得晏就諗住一餐當兩餐。份早餐內容就幾近似另一款早餐「全日早餐」，只喺少少差別，就喺多士換成牛角包，另多一件薯餅，但就平$10，但依家都已經幾大份吓。沙律菜幾新鮮爽脆，配以胡麻汁，好食；香草豬肉腸比較普通雞肉腸就梗喺正好多啦，多士烘得金黃，老婆最欣賞就喺牛油另上，因為佢唔多食牛油，怕膽固醇高，再配嫩滑嘅炒蛋同茄汁豆嚟食，非常滋味。大主角雞扒亦都煎得好香口，夠晒大塊，不過，佢就話仲有少少雪味，而個蕃茄汁睇樣就知喺好茶餐廳碟頭飯嗰種醬汁底，用茄膏去推，食落缺少一種鮮活酸香味。

沙嗲煎牛肉公仔麵餐 $39

小弟就揀咗個公仔麵餐，貪佢配丹麥多士，而且，本身配炒滑蛋，但又可以改配另兩款食材，因老婆嘅早晨已有炒滑蛋，所以，就改為煙肉同煎蛋，煙肉稍嫌煎得唔夠香口，睇個樣都知，煎脆少少更好；煎蛋雖然唔喺好靚仔，但蛋黃都喺流心嘅，而丹麥多士烘過龍少少，但入口不失牛油香氣。公仔麵揀硬度適中，浸咗一陣都未變腍，啲沙爹確喺唔錯，香濃惹味，餐牌就話煎牛肉，其實同平時食嘅茶記沙爹牛肉差唔多，至少夠腍滑。

熱柚子蜜、熱奶茶
呢度啲餐飲都稍多選擇，老婆今次唔使又揀檸水，試咗杯柚子蜜，落得夠多，濃濃柚子香。小弟就慣例揀熱奶茶啦，奶茶茶底香，不過，幾敢肯定花奶偏多，奶味偏重，否則喺小弟嘅心水奶茶之一。

多謝老婆嘅推介，今早兩份早餐都有料到，份量又十足，真喺一餐當兩餐，晏晝都唔使食，環境又夠闊落，招呼都OK。

個人評分
味道：9/10
環境：7/10
服務：7/10
抵食：9/10
平均每人消費：HK$43

餐廳資料：
一冰廳 Yat cafe
地址：荔枝角長沙灣道883-889號億利工業中心地下
電話：2686 8399