祥記燒臘飯店：長食「祥」有

趁星期六，同老婆晌荃灣搞銀行嘢，之後就打算行一轉「元荃古道」，咁都要食咗晏先。老婆曾有段時間晌「福來村」呢邊做兼職，所以，今次佢話事，帶我嚟到「香車街街市」搵食，上到平台層有好多餐廳，不過日頭做生意嘅唔多，得間賣車仔麵、茶記，以及打算試吓嘅「祥記燒臘飯店」。 

環境一眼睇晒，夠地道嘅真真正正大牌檔風，摺枱膠椅，嚟親大多數都喺晌附近嘅街坊或打工仔。依家天氣涼快都OK，如果夏天嚟真喺搞唔掂。嚟到梗喺零服務，自己招呼自己，有啲熟客直情自己過去裝湯、裝飯。

雖然話零服務，但啲阿姐都好醒目，見我哋兩個，就俾杯熱水我哋浸筷子，而且，佢哋都幾好禮貌。

店名喺燒臘飯店，但我哋就打算試佢哋蒸餸。不過，無論燒味飯，抑或蒸餸飯，都喺賣$44，非常經濟，送例湯，雖然都喺大路嘢，如青紅蘿蔔煲豬骨之類，但勝在老火，仲喺任飲添。

如果唔喺老婆晌度，就一定叫梅菜扣肉，哈哈！咁佢晌度就減低啲邪惡度改要咗鹹魚蒸肉餅啦，而佢就揀榨菜蒸黃花魚，店家好大方，仲送多碟灼菜心，兩個人真喺食到飽飽。

白灼菜心
灼菜心唔喺話有咩特別，但唔喺得幾炷，喺一整碟，絕對喺誠意嚟，

鹹魚蒸肉餅 $44
有時食煲仔飯，啲鹹魚少得可憐，但眼前呢碟就真喺俾足料。件鹹魚好香，鹹香味滲落啲肉餅度，更加正，而且，啲肉餅打得鬆化，肥肉又唔多，連老婆都話OK，因為佢好怕肥肉，喺肥肉篩查專員。

榨菜蒸黃花魚 $44
雖然牆上嘅餐牌喺寫豉汁蒸，但原來佢哋好隨意，所以你唔好諗住泥鯭會喺果皮蒸，鯇魚會喺梅菜蒸。但點都好，榨菜蒸一樣惹味，最緊要喺條黃花夠晒鮮甜，肉質非常之滑，喺樓下街市相熟檔口嘅新鮮貨，而且，咁大條，真喺幫襯佢哋好過自己整啦。

「祥記」呢一類老店，真喺為基層服務，大件夾好食，雖然只喺賣幾款嘢，唔會似茶記包羅萬有，但每樣餸菜都有誠意，富人情味，值得再撐。

個人評分
味道：9/10
環境：6/10
服務：7/10
抵食：9/10
平均每人消費：HK$44

餐廳資料：
祥記燒臘飯店
地址：荃灣福來村香車街街市二樓平台CF1鋪
電話：2417 2370