呢家餐廳位處一入夜就鬼咁靜嘅永安廣場，餐廳內嘅環境好簡單，好平民嘅感覺，完全無咩華麗嘅裝修，感覺就喺既然食素，就毋庸奢華，但仍光鮮企理，菜式定價亦親民，更唔收加一，怪唔得只喺閒日夜晚，都有咁多「鄉里」幫襯，唔少喺一家大細，猶如飯堂。
打開餐牌，第一版就有餐廳嘅詳盡介紹。原來其歷史不短，而且，更喺跨越多國嘅連鎖餐廳。
由於餐牌都比較厚，又易屈起埋，非常難影嚟俾大家參考，好彩事後發現佢哋有設立網頁，更上載整個餐牌，故此索性編輯一下放上嚟等大家易於參考。如你所見，菜式非常之多，由湯品、前菜、炸餅、什錦烤串、麵條、蒸米糕、印式輕食、麵包及咖喱、煎餅、班戟、掛爐烤餅、米飯、印度套餐、鐵板、北印度風味、兒童套餐、蔬菜、飲品、鮮榨果汁、奶昔、小食，到甜點，一應俱全，多到眼花繚亂。餐牌唔止印刷精美，亦中英對照，有啲店員仲識幾句廣東話，唔使太擔心溝通問題。
芒果味印度奶昔（Mango Lassi）$35
如無記錯，小弟嚟親食印度嘢，都喺必叫呢一款芒果味印度奶昔，有啲就譯為芒果酸奶，因為喺以鮮芒果肉跟乳酪打成，故入口有陣陣醒胃嘅乳酪酸香味，而且，芒果味亦香甜濃郁。
菠蘿汁（Pineapple Juice）$35
呢度有唔少果汁選擇，更標明鮮榨，呢杯菠蘿汁一睇就知喺鮮榨，皆因仲睇到果汁內有唔少果肉嘅纖維，入口菠蘿香味天然清甜，不過，唔知喺咪講求健康關係，上文杯芒果酸奶，呢杯菠蘿汁，以及稍後介紹嘅石榴汁，都唔多冰凍，只喺入口涼涼哋嘅感覺。
石榴汁（Pomegranate Juice）$45
好少飲石榴汁，所以，幾有新鮮感。色澤鮮紅，望落仲以為喺西瓜汁添，試咗一口，雖然石榴味都好出，但對比起上述兩杯飲品，味道比較清淡一啲，但感覺就覺得好健康咁。
咖喱角（Samosa）$40
幾常見嘅印度前菜，既然喺素版，裡面就當然只得啲薯仔、蔬菜、青豆啦，特別之處就喺包到拳頭咁大。外皮口感比較酥化，卻唔油膩，配以印式甜酸醬及薄荷乳酪醬，食落更清爽。
洋蔥炸餅（Onion Vada）$60
炸餅無論外形，抑或口感都有啲似炸薯餅，我哋揀咗洋蔥口味，不過，洋蔥味嘅感覺唔喺好強，而且，好大件一個，幾個人共享就最好，一人一個都嫌太飽肚。配上嘅醬汁都好特別，白色嘅有少少芝麻香、又辣辣哋；白色隔離嗰兜都喺有點辣，但就帶薄荷味；再隔離就喺常食到富香料層次嘅咖喱；最邊邊大兜啲嘅喺咖喱雜菜。
蕃茄香辣班戟（Tomato Chili Uthappam） $70
無咩辣椒公仔嘅溫馨提示下，今勻真喺中咗伏，咪以為喺表面啲紅粉辣，喺班戟裡面堅有唔少青辣椒，嗰啲先非常之辣，而班戟嘅質感正正就喺平常晌麥記食早餐時嘅熱香餅嗰種，軟綿綿，但配鹹食個人感覺一般。
蘑菇咖喱（Mushroom Masala）$75
瑪沙拉喺混合多種具芳香性嘅香辛料所做，喺印度料理嘅萬能香料，就算呢道菜只配鮮蘑菇，一樣好好食，啲蘑菇好爽口，個汁底稀杰度啱啱好，香味有層次，微微哋辣，十分惹味，無論撈飯，抑或配印度烤餅，同樣咁正。
蒜香烤餅（Garlic Naan）$40
既然叫咗道瑪莎拉咖喱，咁就梗喺要叫番一客印度烤餅，蒜香口味簡簡單單就最合心水，一客有4件，仲加咗少少芫荽碎，啲烤餅入口香，配咖喱真喺一流，略嫌啲餅稍為韌身咗，唔知喺咪一早嚟到，擺耐咗嘅關係。
咪睇啲店員好似茶記啲阿叔，個個感覺都幾親和，唔會不耐煩咁，招呼都幾好架，而且，上菜速度勁有效率。此外，枱上放有收費嘅樽裝水，但同樣有放有水壺和水杯，有免費開水供客人飲用。越夜，就見越多「街坊」嚟幫襯！
個人評分
味道：8/10
環境：7/10
服務：8/10
抵食：9/10
平均每人消費：HK$120（指定信用卡9折）
味道：8/10
環境：7/10
服務：8/10
抵食：9/10
平均每人消費：HK$120（指定信用卡9折）
餐廳資料：
Sangeetha Vegetarian Restaurant
尖沙咀麼地道62號永安廣場UG層1-5,31舖
2640 2123
Sangeetha Vegetarian Restaurant
尖沙咀麼地道62號永安廣場UG層1-5,31舖
2640 2123
沒有留言:
發佈留言