餐廳位處埃華街街口，由奧運站行過嚟都唔算耐，其實，呢條街開到成街都喺餐廳，變相喺一條食街嚟。推門內進，環境四四方方，裝修簡潔明亮，右邊喺4人卡位，左邊則喺6人長枱，不過，好似我哋得兩個人，就會安排坐6人枱，有心理準備要搭枱喔。
餐具已放晌枱上嘅木盒，轉頭店員都會拎支水俾客人自己「照顧」自己，唯一喺無放定啲餐紙巾晌枱上，不過，你問到，店員都會好快手遞上餐紙巾。
餐牌前前後後共4頁紙，其中一版算喺晚餐，包括全日早餐、漢堡、意大利麵、意大利飯，部份菜式包意大利香草包及餐湯（唔明點解其中兩款菜式唔包），亦唔包餐飲，需+$15揀選指定款式，無得再補差額之類轉款，感覺有欠彈性。
另一版就喺招牌嘅10吋薄餅，共10款選擇，賣點在於使用意大利"00"號麵粉，而且，加入墨魚汁做成黑底。此外，仲有啲惹味小食。
剩低嗰兩頁名為「創作料理」，並非套餐，但以組合形式登場，一邊喺指定嘅創作料理拼盤，另一邊則喺自由選擇嘅主菜，定價由$98-$158，視乎所揀嘅主菜。
而所有飲品，如咖啡、特飲、乳酪、汽水……等等，就印晌另一張餐牌上，製作比較簡單。
無意中，仲發現枱上嘅推介餐牌有樣「筍」嘢，就喺叫「黃金炒薯條」一客，就會免費送特飲一杯，咁著數就無理由錯過嘅。
黃金炒薯條 $68
近排真喺好興啲黃金乜乜乜，以小弟為例，早前先試過Sodam Chicken嘅「黃金鹹蛋炸雞」，以及沙嗲軒嘅「黃金脆魚皮」，今趟嘅「黃金炒薯條」就喺異曲同工，炸好嘅薯條加入鹹蛋黃兜炒，所以，入口寧舍鹹香惹味。不過，食太多會有偏鹹嘅感覺，3-4個人共享就最好，淺嚐得嚟啱啱好。
蕃茄濃湯、意大利香草包
晚餐嘅餐湯及餐包轉頭就送到嚟，碗蕃茄濃湯色澤對辦，入口亦無落差，蕃茄味好濃郁，酸香鮮活，口感夠晒細滑，有啲意外驚喜；餐包喺意大利香草包，喺小弟嘅心水包款之一，夠香軟，但香草味淡，睇包身，應未有晌搓包時加入香草，似喺同用薄餅嘅麵粉糰，再晌包面糝上香草做成。
鮮蝦扁意粉 $108
餐牌已寫明喺配以羅勒蒜香微辣蕃茄汁，所以，未食都預計到個味道，但食落比預期中好喎。扁意粉煮得有咬口，口感絕對喺啱啱好嗰隻，而且，掛滿汁醬，味道有層次，辣度輕盈，卻更令人醒胃；鮮蝦去晒殼，飽滿大隻，鮮甜而爽彈，果然有水準。
雙重芝士薄餅（加西班牙辣肉腸） $138+$30
呢個姨甥仔真喺芝士控嚟，上次同佢去大角咀間「薩莉亞意式餐廳」，佢點個「黑椒雞肉薄餅」都要加雙重芝士，所以，早估到佢會點「雙重芝士薄餅」，但齋芝士有啲寡，所以加西班牙辣肉腸。雖然話餅底加入新鮮墨魚汁做，除色澤變灰之外，味道就唔會太多特別，但呢度喺做「餅乾底」，焗得香脆，咬落咯咯聲；餅面鋪滿水牛芝士，再有粒粒嘅忌廉芝士，加埋落得無手軟嘅辣肉腸，口感、味道都一流，鹹香惹味，好食到唔停手呀。
凍柚子蜜（跟餐）+$15
話喺柚子蜜，都加咗少少梳打，所以，飲落爽多少少，味道OK啦，喺嫌佢多冰得滯啫。
荔枝冰紅茶（跟黃金炒薯條）
反而，姨甥仔話佢杯茘枝冰紅茶好飲喎，茶底芳香而不苦澀，荔枝味亦夠突出（都喺糖漿功勞啫）。
有一點較奇怪，通常賣意大利菜嘅餐廳都會有一、兩款甜品提供，但眼見餐牌就唔多見嘞。姨甥仔佢下年就要考文憑試，希望把握埋今年，唔好再迤吓迤吓咁啦。因為時間飛逝，轉眼又一年。
個人評分
味道：8/10
環境：7/10
服務：8/10
抵食：8/10
平均每人消費：HK$200
味道：8/10
環境：7/10
服務：8/10
抵食：8/10
平均每人消費：HK$200
餐廳資料：
Villa Villa
大角咀埃華街88-102號大全樓地下B及D號舖
2383 8111
Villa Villa
大角咀埃華街88-102號大全樓地下B及D號舖
2383 8111
沒有留言:
發佈留言