太平洋咖啡 Pacific Coffee Company：燕麥奶咖啡

有時有啲嘢真喺興之所至，路經擺花街分店嘅Pacific Coffee，就隨心走入去，純粹想歇息吓飲杯咖啡迤一迤，不過，見啲甜點賣相幾好，就索性飲啖啡、食啖餅，輕鬆一下。

其實中環有好幾家Pacific Coffee，但以呢間環境比較大啲、闊落啲，而且，相對上無咁近寫字樓，客人少啲，感覺就寧靜啲，坐晌度讓人更感悠閒。

本來例點心水嘅鮮奶咖啡，埋到櫃位時，見佢哋推廣一款植物做嘅Oatly「燕麥奶」，以代替牛奶，問問職員喺咪咩咖啡都可以用，基本上喺，而且，佢仲話上個月為了響應世界環境日仲特別將6月份訂爲環保月，有唔少推廣，更有啲買一送一嘅優惠，可惜錯過咗。

甜點方面，放晒晌餅櫃下層，眼見都有唔少選擇，好幾款都啱心水，但想醒神啲，揀咗檸檬撻。

燕麥奶咖啡 $38

Pacific Coffee啲咖啡本身喺唔錯，改用咗燕麥奶，飲落跟平常飲到嘅，又唔會話有咩太大差別喎，入口依然醇香，口感柔滑，唯一喺需要額外付出多$4，支持吓環保都要啦。

清新檸檬撻 $24

賣相清新簡單，只以半片燒過嘅檸檬片做裝飾。撻殼幾鬆化脆口，而撻心嘅檸檬軟漿好軟滑，入口頗有檸檬清香，少甜而感覺清新，不過，如果酸多少少就更有個性。

一杯咖啡，一件甜點，一個悠閒環境，確喺可以為勞累嘅身軀加點力氣。

個人評分
味道：8/10
環境：8/10
服務：7/10
抵食：7/10
平均每人消費：HK$62

餐廳資料：
太平洋咖啡 Pacific Coffee Company
中環擺花街43號地下
2537 1688