但講到最心水嘅位置，應該喺挨近窗邊一列卡位，除咗有啲街景睇吓，景觀較為開揚之外，卡位嘅挨背設計得特別高，被鄰枱嘅騷擾近乎零，而且，枱面面積亦較常見嘅長，真哋坐成6個人都得呀！
睇睇餐牌有咩選擇，散點餐牌沙律、湯品、前菜小食、意大利麵、意大利飯、主菜（漢堡或肉類）及甜品等，以尖沙咀區而言，價位差不多。
想划算啲叫套餐，星期六、日午市就有個早午餐套餐（Brunch）供應，不過，依家Brunch呢個詞都有啲濫用，原意Brunch喺指俾人一次過當早餐、午餐一齊食，故通常11:00am就會供應，但Shine成12:00pm先開門，不如簡單啲個套餐叫番午餐（Lunch）咪仲貼切。題外話講多咗，早午餐只有6款菜式，由$78-$148，包一杯基本餐飲。
此外，飲品就印晌另兩組餐牌，晌門口睇見佢個酒吧位，規模唔細，就知有唔少酒類供應。而有一組餐牌，顯示出佢哋雞尾酒類嘅款式特別多，所以，都刻意貼出嚟，不過，就算唔飲酒嘅，非酒精類一樣多選擇。
炸魚薯條 $128（套餐菜式）
早前先晌西營盤嘅「Fish & Chick」食過傳統嘅英式炸魚薯條，所以，興之所至想再回味，晌早午餐度揀咗呢款菜式。件炸魚份量好十足，墊底仲有大量幼身薯條，雖然唔知喺咩魚種，但肉質嫩滑富魚鮮味，粉漿既薄且甘脆，沾上自家製嘅他他醬，食味一流。不過，可能啲薯條被條炸魚壓住，最底嘅薯條散唔到熱氣，入口時已經腍晒，影響個口感。
加拿大龍蝦意大利飯 $188（散點菜式）
衝着呢道龍蝦意大利飯而嚟，喺選菜嘅穩膽，餐牌亦列佢為廚師推介。有半隻烤龍蝦，再配以海鮮湯底煮成嘅意大利飯，賣相好搶眼，而啲飯煮得恰到好處，飯粒濕潤，有濃郁嘅蝦鮮味，咬口卻唔會有生米嘅感覺，龍蝦亦都好爽口鮮甜，尤其小弟要咗個鉗位，大大啖蝦肉，爽呀，不愧為推介。
玫瑰鮮奶咖啡 +$15（跟餐）
套餐嘅餐飲可以額外加錢升級，都知表哥鍾意飲咖啡，我就介紹吓佢試試玫瑰鮮奶咖啡。佢話杯咖啡真喺沖泡得唔錯，順滑而香醇，又有淡淡嘅玫瑰花香，更讚其拉花夠靚。雖然我就無試佢杯咖啡，但單睇賣相確喺不俗。
意大利泡沫咖啡 $45
個意大利飯喺散點，又無咩配飲品優惠，由於都打算叫一客甜品嚟「些牙」，所以，就不妨嗌杯意大利泡沫咖啡嚟襯甜品。我杯咖啡都唔差呀，奶泡打得夠綿密，咖啡醇厚細緻。
甜品方面，餐廳供應6款甜品，其實感覺上都有啲唔平，賣$58-$108，如果晌套餐上有啲加配優惠就好喇。不過，試過款「提拉米蘇」，你就會發覺又值回票價。
提拉米蘇 $78
佢嘅賣相已經唔喺「求其」擺件意大利芝士餅，加幾粒生果咁簡單，裝飾除咗龍珠果、藍莓、士多啤梨之外，仲以開心果仁碎及朱古力漿做成美感嘅線條，而且，件餅嘅外形亦唔喺做定即切件嘅貨色，如要做成圓柱體現況，都幾大機會喺即做貨色。
叉開睇睇，近底嘅海綿蛋糕浸滿咖啡酒，濕潤綿綿，咖啡跟酒香皆突出；而馬卡風芝士打得柔滑細膩，淡淡嘅芝士香，同時嚐到雲呢嗱嘅香味，再細看，點點黑點就証明喺用上天然雲呢嗱籽，而非香精，感覺喺唔同少少；面層灑滿唂咕粉，充滿可可香味。
晌度食飯絕對唔可以快閃，喺要慢慢享受，因為環境舒適唔在講，尤其選上卡位，而且，店員招呼殷勤，添水、換餐具，都做到足，加上食幾樣嘢都好滿意，覺得喺水準之作。
個人評分
味道：9/10
環境：8/10
服務：8/10
抵食：7/10
平均每人消費：HK$250
味道：9/10
環境：8/10
服務：8/10
抵食：7/10
平均每人消費：HK$250
餐廳資料：
Shine
尖沙咀北京道12A號太子集團中心6樓
5328 8480
Shine
尖沙咀北京道12A號太子集團中心6樓
5328 8480
沒有留言:
發佈留言