康奇拉沙 U Favorite：稍勝預奇

久唔久星期六或日都會由葵興地鐵行上去葵涌，有時都會穿KCC咁過去，原來最近KCC開多咗一期，就喺一出地鐵接駁位嗰幢（之前喺封實當天橋咁行），呢幢新商廈名為Life@KCC。原本喺老婆帶我嚟KCC嘅一家日本餐廳食飯，諗住都會做埋星期六晚，原來都喺無開，結果就過咗Life@KCC嗰邊食。

睇水牌見一樓有個餐廳樓層，其實好小型，仲要好幾家專做樓上寫字樓客嘅外賣店已關門，部份鋪位仲圍緊板做裝修，全場只有4間店有營業：Pizza Hut、85°C、U Favorite及大公雞，較啱老婆食嘅就喺U Favorite，但配上一個諗唔通嘅中文名字「康奇拉沙」。

每家店嘅鋪位好細，亦唔喺以美食廣場形式運作，就以U Favorite為例，鋪面只有4張枱8個位，明顯就喺以樓上寫字樓客買外賣為主。故食物嘅選擇亦唔太多，鋪前嘅黑板就已經列晒有咩選擇，一共9款菜式，包一杯熱飲或餐湯，定價為$45-$55，全日通用，只喺下午茶時段有8折。

餐飲都喺基本嘢，奶茶、咖啡、華田、呵力……啲港式嘢，可轉其他飲品，但就要俾正價8折，不過，佢哋啲飲品都唔喺好貴，部份都喺廿蚊左右。

咁話時話，除港式嘢飲，仲會有啲咩？有啲特色奶茶、咖啡特飲、天然老鹽潤喉特飲及特色膠囊咖啡。

卡邦尼意粉、炭燒咖啡 $49

由於都喺以外賣為主，加上小店人手唔會多，所以，就算堂食都喺以紙盒盛載，以膠餐具用餐，環保嘅事就放埋一邊。份卡邦尼都做得似模似樣，不過，小弟就喜歡加蛋嘅版本。意粉煮得絕對有水準，口感仲喺煙韌而咬口，沾滿香滑嘅白汁，煙肉食得出唔喺齋得肥膏嘅平價貨，反而黑椒味唔使太重手，多多少少冚咗啲芝士香。咪睇佢一盒仔份量，其實，食完都好飽肚。而杯咖啡就普通啲，雖然話炭燒咖啡，但有點港式嘅味道。

日式咖喱雞蛋包飯、餐湯 $55

老婆就揀咗蛋包飯，當然同樣以紙盒盛載，之但喺，與其叫蛋包飯，不如叫咖喱雞飯加炒滑蛋，其實，依家真喺好少店肯做到真正嘅蛋「包」飯。講番個飯，整體味道喺唔錯嘅，炒蛋頗嫩滑，飯粒軟綿，咖喱完全喺日系，唔辣，帶微甜，有咖喱香味，雞肉亦無話「嚡烚烚」。反而個南瓜湯有改善空間，南瓜味非常突出，口感亦推得幼滑，問題在於湯內仍有唔少麵粉幼粒。

除咗正餐，亦有下午茶套餐供應，側旁仲有兩個餅櫃，但就無咩蛋糕或甜品晌裡面，只見少少英式鬆餅及戚風蛋糕，可能新開張，仍在摸索或調校營運關係吧！

做飲食我一向都覺得極之唔易，尤其小店，隨時一人分演幾個角色，加上呢類細場，只有靠樓上寫字樓客，平日夜晚及星期六、日，人客相信寥寥無幾，所以，我見佢哋都喺做到晚上8:00pm，搏多一輪加班打工仔客。老實講，呢個Life@KCC商場都好鬼靜。今次兩款食物都算稍勝預期，希望小店繼續提升質素，以及創出一兩款人無你有嘅特色菜嚟打響名堂，能吸引多啲街客。

個人評分

味道：7/10
環境：6/10
服務：8/10
抵食：7/10
平均每人消費：HK$52

餐廳資料：
康奇拉沙 U Favorite
葵涌葵昌路72至76號Life@KCC 1樓104號舖
電話欠奉