Pinot Duck：Duck心應手

一講到食北京烤鴨，就想到幾家老字號，而唔少外國人都同樣好鍾意食北京烤鴨，故此，以外國人或者後生仔為對象嘅新潮烤鴨店就應運而生，位處灣仔橫街嘅「Pinot Duck」就喺其中一家。睇店名就知喺以鴨嘅菜式為賣點，是夜由好友安排，一齊嚟呢度歡聚。

鋪門嘅設計已十分型格，走進餐廳內，裝修糅合中西，雅致得嚟夠潮，加上高樓底，不失氣派，而且，地方寬敞，予人感覺舒適。

就連餐具、茶壺，都古雅盎然，微細位都處理得一絲不苟。

由於燈光比較昏暗，今次影餐牌影得差，所以，就無相比大家參考，但種類方面，大致分為招牌烤鴨、鴨肉小食、其他小食、湯品、主菜、飯麵、伴菜（即蔬菜類）及甜品，可見餐牌嘅設定都較為西式。

涼拌麻醬茄子 $68

絕對唔喺大家平時食開嘅樣，喺重新以西式去演繹，茄子搓成蓉，再拌入芝麻醬做成，賣相精緻。茄子蓉入口冰涼軟綿綿，啖喺都充滿芝麻香，簡單而醒胃。

孜然芹香羊肉串 $108

一解羊痴嘅慰藉，一客有4串，羊肉燒得帶點焦香，而且，肉質非常柔嫩，孜然香味突出；最特別喺伴以自家製嘅日式芥末乳酪醬，微辣而帶點酸，配羊肉，真喺幾過癮。

自製鴨肝醬羽衣甘藍脆片 $128

呢道菜道帶有鴨元素嘅小食，自製鴨肝醬已見誠意，好有心思咁將鴨肝醬做成好似法式燉蛋咁，燒成一層薄薄焦糖晌面，配有西式嘅脆多士及中式嘅軟包膜嚟襯啲鴨肝醬，食落肝醬好豐腴柔和，而羽衣甘藍脆片就成為好似薯片般嘅小食。

北京片皮鴨（半隻） $250

嚟得呢度，估計十枱有七、八枱客會點呢道片皮鴨，想食嘅話，緊記預訂就穩陣啲。雖然只喺半客，鴨嘅份量都唔少，配上薄薄嘅蒸餅皮及金銀蒜蓉、京蔥、青瓜、甜麵醬、沙糖等伴食。叫得片皮鴨就梗喺要皮連肉啦，鴨肉切得厚薄均一，皮脆肉嫩，再夾齊所有配料，大大啖入口，味道層次豐厚。

黑松露野菌烤走地雞 $208

走地雞唔喺得個講字，無論食邊個位，脾位還是雞胸，口感都一樣細嫩，加上幽香嘅黑松露，香氣入晒肉，極之入味；底下墊咗好多法邊豆，爽脆好食，再者，一客雞嘅份量唔少，人少就唔太建議點呢道菜喇。

漁村焗飯（兩位用）$228

有「飯桶」同枱，點都要點個飯撐飽佢。梗喺要有好多海鮮先稱得上「漁村」啦，所以，飯面鋪上超多海鮮，有虎蝦、大花甲、帶子、青口、魷魚……等等，十分鮮味，用上虎蝦，更喺既爽彈，又夠晒睇頭；驚喜位仲有喺啲飯，食落有啲味，嗒耐啲原來喺加入腐乳去煮，實在有心思。

炸杏仁脆奶 $68

最後甜品作結，先登場喺呢道炸鮮奶，外觀炸得金黃平均，而且，做到外脆內柔，外層脆到不得了，裡面嘅杏仁奶既香且柔滑，最出奇不意喺配上新鮮熱情果醬，酸酸咪嘅果醬唔單止提升獨特酸香味，更有去膩之效，食起嚟伴脆奶更感清爽。

陳皮焦糖燉蛋 $78

焦糖燉蛋肯定大家都食唔少，加入陳皮呢個元素，促使想試嘅主因。法式焦糖燉蛋本身已做得相當有水準，面層嘅焦糖夠薄夠脆，燉蛋幼滑且富蛋香，慢慢滲出陳皮嘅香氣，再者，賣相一啲都唔馬虎，伴上龍珠果及柑橘肉，精緻好睇。

餐廳以西式營運，所以，仲提供果汁、汽水、特飲、啤酒、雞尾酒、餐酒……等等，加上環境好，招呼又貼心，晌用餐期間不時幫忙添水、換碟；菜式除以鴨為主，其他菜式亦多元化，故此，人少老友短聚飲吓酒食啲特色小食，抑或大棚朋友或家人嚟歡聚慶生皆「Duck」宜。

個人評分
味道：8/10
環境：8/10
服務：8/10
抵食：8/10
平均每人消費：HK$250

餐廳資料：
Pinot Duck
灣仔聯發街18號地舖
2891 1177