奇華餅家 Kee Wah Bakery：以禮傳情、以善報喜！

有一日搭地鐵見到「奇華」個廣告，原來佢80歲喇，為慶祝80周年，推出咗一啲相關嘅產品。更以「以禮傳情」為主題，再加上特別版嘅慈善禮盒，令到「生日」都變得更有意義。

「經典老婆餅」禮盒 $85

依家啲人鍾意懷舊，對小弟而言，唔喺死硬派懷舊「粉絲」，唔會一味乜都去懷舊，懷舊都要講情感，中式嘅老婆餅就喺其一。以前住石硤尾，會偶爾晌「八仙餅家」（仲健在）、「新金漢麵包」（已轉名）買老婆餅食，反而大個就少咗。正正見佢哋出咗款復刻版嘅「經典老婆餅」禮盒，包裝以瓦通紙貼上「娘」爆嘅粉紅招紙，捆上麻繩，極具懷舊風，好有50、60年代感，煞是有趣。

一盒有8個，全部獨立包裝，乾淨衛生，又唔使一次過要食晒。個個都烘得金黃，面層灑滿芝麻，入口外皮鬆化，餅心填滿冬瓜蓉，清甜不膩，平時小弟喜歡嘆杯咖啡配包點，但食到中式餅食，就梗喺搵杯普洱嚟襯佢啦。如方便，搵焗爐烘番熱，風味更佳。

「心晴蝴蝶酥」禮盒 $60

上文都提及到佢哋今次加插咗做善事元素，而呢盒包裝溫暖嘅禮盒，就正正喺幫助「心晴行動慈善基金」義賣，晌盒內有張單張，簡單介紹咗呢個基金，佢哋專為受情緒困擾嘅人士提供各方面嘅支援，奇華更喺每賣出一盒，都喺全數捐贈予俾佢哋，頗有意義。

而盒內共有4小包蝴蝶酥，每包3片，奇華嘅蝴蝶酥都非第一次食，所以，知道有番咁上下嘅水準，蝴蝶形狀對稱，口感酥脆，味道富牛油香，果然喺水準依舊。

講到做善事，佢哋仲有一款「童願同享DIY慈善曲奇禮盒」，喺幫助「願望成真基金」籌款，正所謂助人為樂，好事成雙。雖然時代變遷，對傳統餅食亦少咗接觸，不過，對於老婆餅、雞仔餅、油角……等等傳統餅食，仍懷有一份兒時感情。

個人評分
味道：8/10
環境：7/10
服務：7/10
抵食：7/10
平均每人消費：HK$85

餐廳資料：
奇華餅家 Kee Wah Bakery
中環港鐵中環站CEN E19號舖
2602 2501