對大街嘅門面店名都無，若非事前有上網睇睇，真喺唔敢推門內進。入到去先喺窄窄嘅通道，通道旁原來有啲貴賓房，再到大廳，但是日滿座，我哋被安排坐入貴賓房，如包房晚市好似要$10,000，有興趣嘅朋友自行再向店家查詢！
坐入去，同師傅嘅距離更近，睇到師傅做菜更仔細呀！
嚟得「鮨文」，都知道只有廚師發辦套餐供應，分別定價為$1,350或$1,750 + 10%兩款，消費絕唔平便，但交足貨兼有唔少驚喜。
後頁，仲有唔同嘅飲品供應，當然，日本清酒會喺主角。
嚟呢度，唔好掛住食，仲要學欣賞，欣賞師傅手勢，欣賞店員服務，欣賞用餐餐具……唔少得盛菜嘅器皿啦。
蟹肉金箔茶碗蒸
外面天寒地凍，雖然入到室內暖和好多，但點都唔及嚟一道茶碗蒸暖心窩。加入蟹肉、金箔自不然令其變的不平凡，蒸蛋內仲有元貝、花菇，令其口感滑溜之餘，更添加一份蛋鹹香味。
漬物前菜
師傅非常忙，兩頭走，先做一道前菜俾我哋過口癮。紅酒橋頭，酸酸哋，有微微紅酒香；醬油漬牛蒡，少少鹹，多多爽；芥末淮山，入口爽脆，帶少少潺；仲伴有點壽司薑，清清味蕾。
塩辛
呢道小點唔喺包晌餐牌菜式之中，純喺師傅私人醒，話喺日本人重口味嘅佐酒「零食」，查實喺墨魚肝，果然重口味，頗鹹吓添，哈哈！
新鮮生蠔
食生蠔可能成日聽人講法國蠔、美國蠔、澳洲蠔，其實，世界仲有唔少地方有生蠔出產，如愛爾蘭、墨西哥，仲有唔少得日本。今晚師傅為準備咗佐賀縣小長井嘅真蠔（初時仲以為叫珍蠔），蠔肉本身極之肥美，口感爽脆，蠔味不俗，最特別喺加上一小撮辣椒蘿蔔蓉及刨咗少少柚子皮，立時味道變得有層次感。
鮟鱇魚肝
鮟鱇魚都曾經食過，但其魚肝印象中就第一次。但師傅話佢哋賣嘅魚肝喺自家製，好多功夫，浸過清酒之後，又要蒸……。一客有兩件，點點紅色喺油份，師傅刻意淋上酸汁，食落有份新鮮感，唔腥，油份無食鵝肝嗰類咁重，較輕盈，口感就非常好，綿滑細緻。
鰻魚BB
鰻魚相信大家都食唔少啦，尤其蒲燒，但鰻魚BB小弟應該都喺第一次，嚟自愛緩縣嘅「BB」，幼細而透光，配上平時食冷麵嘅汁。入口口感幾似食粉皮，滑嘟嘟咁，淡淡醬油香，又幾「過製」喎。
八爪魚
食完道滑嘟嘟嘅鰻魚BB，跟住就喺口感煙韌嘅八爪魚，有咬口得嚟唔會好似擦紙膠咁韌，有入柔軟感，唔錯喎。
跟住師傅拎咗一大袋嘢出嚟，原來喺即場起咗條吞拿魚，過程話易唔易，話難又好似唔難，當然，皆因師傅手勢好，就轉眼起晒條魚啦。
煙燻吞拿魚
吞拿魚喺香港人較熟悉嘅刺身之一，初時以為佢單單俾兩件魚生過我哋食，咁樣唔會喺「鮨文」嘅取態，加入煙燻，好有視覺效果，亦令味道變得特別。晌上面添了蔥花、蒜蓉、芝麻，賣相好睇，吞拿魚保持半生狀態，入口竟然喺爽爽哋，又好有魚油香，精彩！
清酒煮鮑魚
日式煮法就梗喺搵清酒煮啦，啲鮑魚好腍身，柔韌有咬口，睇件成品看似簡單，但睇師傅切嘅時間用上特別嘅刀法切出鋸齒紋，原來喺為咗更掛汁。而啡啡黑黑嘅喺濃醬喺鮑魚乾醬，非常濃郁，吊起鮑魚鮮味
此外，咗正嘅醬汁只喺沾兩件鮑魚就梗喺有啲嘥，所以，師傅又特意再搓咗粒醋米飯俾客人，用嚟撈勻啲醬，猶如鮑汁撈飯，食得唔好嘥嘛！
食完鮑魚，就到下一環節：壽司。不過，師傅唔喺切魚先，喺磨山葵，呢度嘅日本芥末喺用鮮磨貨色，味道天然，而且，壽司上碟就食得。
石鯛壽司
學師傅話齋，壽司就梗喺有淡味到濃味咁食，所以，第一道壽司喺白身魚嘅石鯛（註：由於事前都唔知有咩壽司款式，所以，款式喺師傅一邊做，一邊介紹，希望啲名無記錯）。石鯛雖然喺白身魚，油份又以足，肉質細緻。
針魚壽司
第二道都喺白魚，但就喺濃味啲嘅針魚，師傅話12-4月喺時令，所以，俾大家一試。外表魚身好有光澤，針魚有啲細骨，師傅好細心咁鉗走晒，而且，師傅好喜歡晌刺身上鎅幾刀顯示一下刀功，深淺剛好，肉質夠挺，魚味確喺濃一點。
象拔蚌壽司
去三聖食海鮮，我哋一班死佬就梗會買條象拔蚌做刺身，今晚以象拔蚌嚟做壽司當然好啦。象拔蚌本身無乜味，所以，師傅唧咗啲青檸汁，口感超爽口而味道清新。
三文魚籽軍艦
跟住依道軍艦只喺三文魚籽，較大路，感覺就自然比之前幾款嚟得普通，但三文魚籽質素都高嘅，一咬爆汁，濃濃鹹鮮味。
沙甸魚壽司
師傅話，呢段時間沙甸又喺時令，但做法就以炙燒，令油香更突出。順帶一提，咪睇細細件壽司，捏飯、切魚嘅大細都有其心思，刺身剛好冚過壽司飯，而飯粒挺身唔會實繃繃。
車海老壽司
講到鮮蝦壽司可能你會覺得無乜特別，但有幾何喺晌面前睇住由紮紮跳嘅鮮蝦，做成壽司！車老海即喺我哋慣常叫嘅花竹蝦，新鮮即剝，新鮮度無庸置疑，蝦肉真喺非常鮮甜，肉質爽口。蝦頭呢？唔會嘥，油炸之後，成隻放入口，脆到爆呀！
吞拿魚壽司
再嚟呢件超有驚喜，非一般吞拿魚，師傅切嘅時間好似牛肉咁樣，紅得嚟比較鮮色，小弟就當然估唔到啦，開估就喺吞拿魚嘅「面珠」。經火炙後，口感極似豬頸肉，有咬口，但味濃，好特別。
鮮魚湯
食完一輪壽司後，再呈上一小碗鮮魚湯，濃郁魚鮮嘅甜味，但清而不濁，熱辣暖心窩。
伊達卷
呢道菜喺因為時近過年，師傅特別加映。伊達卷，喺過年先食，味道有啲偏甜嘅，捲埋有團圓嘅意思，好似我哋食湯圓咁。師傅仲話，食壽司，最尾喺蛋，有句號嘅意思添，又長知識。
海膽軍艦
師傅問我哋夠皮未，咁精彩嘅廚師發辦，如果仲有得試就梗喺好啦！點知佢就拎咗板新鮮嘅馬糞海膽出嚟做軍艦，啲海膽堆到滿滿，都唔知有幾多瓣，入口綿密細膩，新鮮到不得了，加上啲遠山紫菜極為香脆。
右口魚壽司卷
見大家意猶未盡，師傅玩吓啲小技巧，做到一道去司卷。將右口魚肉（中國人會叫鰈魚），千本漬及醃蘿蔔切蓉，混入飯內，跟住就喺亮點，由於右口魚油份極高，炙燒魚皮，擠出魚油，令啲飯粒更甘香油潤，喺驚喜嘅壽司（卷）壓軸，讚呀！
白蘭地蜜瓜
最後一道喺新鮮日本蜜瓜，賣點喺食前淋上白蘭地，點火後引發酒香，而蜜瓜本身亦好甜蜜，讓整個廚師發辦有個園滿嘅結束。
正如標題所講，晌「鮨文」食一次廚師發辦，唔單止食其味道，不論前菜、漬物、壽司……都非常精彩，而且，更充滿視覺樂趣，刀功、技巧、擺設……都十分養眼。加上服務好，師傅又會跟你互動，喺好難得嘅一次體驗。
個人評分
味道：9/10
環境：9/10
服務：9/10
抵食：8/10
平均每人消費：HK$1,925
味道：9/10
環境：9/10
服務：9/10
抵食：8/10
平均每人消費：HK$1,925
餐廳資料：
鮨文 Sushi Man
紅磡黃埔花園11期紫荊苑第9座地下G22A號舖
2794 3995
鮨文 Sushi Man
紅磡黃埔花園11期紫荊苑第9座地下G22A號舖
2794 3995
沒有留言:
發佈留言