Kuru Kuru自家製手作意粉：意味．深長

今日走咗入荃灣工廠區嗰邊做咗阿茂，即喺學人整餅，但唔喺普通嘅餅，喺應節嘅迷你奶皇月餅，雖然仲有成兩個月先到中秋，學定都差唔到啦。整完餅，走咗過去「8咪半」商場搵食，皆因上次晌「叁茶陸飯」食嘢時，留意到對面有家以自家製手作意粉為賣點嘅「Kuru Kuru」，故此順道走過去一試。

從鋪面已知道餐廳環境，因為餐廳採用開放式設計，配合整個商場，並以簡約嘅設計，卻加上唔少植物、牆上有關意大利麵嘅製作及烹煮嘅手繪，都令到整體嘅感覺有活力，再者，光線明亮，樓底高聳，變得更清爽開揚。

由於餐廳都喺由日本人主理，所以，好似唔少日本餐廳咁，餐牌頭一、兩頁，都有啲自我介紹，製作認真。雖然麵條佢哋只賣一款，但就強調選用來自意大利生產嘅粗粒小麥粉、意大利嘅100% 橄欖油，做出更具煙靭度、口感更順滑嘅麵條，每日新鮮製造，極具誠意。

翻開餐牌，設計精簡，圖文並茂，中英日菜名對照，一共有13款選擇，賣$45~$69，定價相當親民。更有幾款配料可額外追加，如煙肉、日本本菇。

此外，仲有一款應喺季節限定，夏祭乜乜乜，賣$63嘅御好燒意粉。

最正喺加多少少錢就可以變成套餐，加$18就可以配沙律 / 餐湯再加餐飲，而加$22就3樣嘢都有齊，平成咁又真喺好難唔要齊囉。餐飲想轉為特飲，亦只需額外俾多$3，絕對值得豪俾佢啦。

除意大利麵，另外一大版就印有5款小食類嘅菜式、飲品及是日推介蛋糕，同樣，定價相宜。

餐具已放晒晌枱上，更備有岩鹽及黑椒自行取用，作合適調味。順便講講，店內職員都喺後生仔女，揸住本ipad落單，勤快有活力，亦招呼禮貌。上菜速度亦快，10分鐘左右，所有菜式都上齊。

田園沙律

一小碗田園沙律，有沙律菜、車厘茄及合桃碎，簡單拌點橄欖油，自行灑少許黑椒，美味也可以好簡單。

栗米忌廉湯

當然唔喺罐頭嗰隻啦，啲粟米打到變蓉，故口感幾滑溜，個粟米味又幾清甜，只喺杰身咗少許，但只不過喺加少少錢轉套餐而已，絕對收貨。

菠蘿果茶

只喺加多$3咋喎，仲要喺心水嘅菠蘿，梗喺轉為特飲啦。雖然賣相就無張相咁靚，用上有皮菠蘿做裝修，但睇到果茶內有唔少菠蘿，仲要唔喺罐頭貨先要讚吖嘛！茶底香濃有點點回甘嘅感覺，唔會「淡茂茂」，整體味道頗清甜，冰涼解渴。

蜆肉蝦仁蕃茄意大利粉 $60

天口熱，本來都想試嗰個「檸檬忌廉意粉」，不過，問過店員，碟意粉真喺只得檸檬忌廉汁，好似唔多抵咁，就改咗穩打穩紮嘅「蜆肉蝦仁蕃茄意大利粉」。呢度啲意粉望落去感覺有少少唔同，比較粗身少許，但煮得恰好，柔韌有咬口，而且，個蕃茄醬汁底勁濃郁，蜆肉就奀啲，但蝦肉就大隻爽口，性價比唔錯。

依家好多餐廳標啲價錢都好多尾數，加埋一之後都梗出現啲零頭，而大多數餐廳結帳都四捨五入，衰啲嗰啲就更加喺唔喺都當一蚊計。極少數好似「Kuru Kuru」咁大方，抹零，即喺去走晒個位之後嘅零頭，抵讚！

唔知將來佢哋會唔會推出其他麵條，如寬條麵、闊麵……等等，如有嘅話，都好有興趣再試，因為佢啲麵條真心覺得做出水準。

個人評分

味道：9/10
環境：7/10
服務：8/10
抵食：8/10
平均每人消費：HK$93

餐廳資料：
Kuru Kuru自家製手作意粉
荃灣青山公路荃灣段382-392號8咪半1樓120號舖
3460 4417