Sodam Chicken：蛋先定雞先？喺鹹蛋炸雞先！

半年多無食韓國菜，但近呢個月就接連幾餐就喺食韓國嘢，其實，就無刻意揀，只喺朋友有興趣，就投其所好。而今晚所去喺中環嘅「Sodam Chicken」，查實2年多前同親友都到訪過佢嘅銅鑼灣店，仲記得佢啲無骨炸雞同焗雞都好正，亦喺小弟第一次食韓式炸雞。

中環店正正晌「藝穗會」對面街角，好易搵，餐廳樓高兩層，但比較細同窄，而廚房、水吧設晌樓下，所以，下層嘅座位唔多。原打算坐晌上層，諗住環境開揚少少，剛巧樓上有人訂場搞活動。

餐牌印刷精緻，圖文並茂，尤其啲炸雞，非常吸引。除炸雞，仲有焗雞、沙律、炒年糕、韓式湯鍋、小食、薄餅、特飲，選擇實在唔少。

此外，亦提供一款「滋味套餐」，分2人或3-4人，計一計，喺非常划算嘅選擇，而且，更喺可以試到季節限定嘅黃金鹹蛋無骨炸雞添，散叫都無得點呀！我哋就揀咗知2人餐，包咗一份炸雞、一客薯條、一款美食（水冷麵、魚串湯或凱撒沙律）及兩杯飲品（可加錢轉其他飲品），都只喺賣$398 +10%

凱撒沙律

因為炸雞及薯條兩款炸物喺未然嘅選擇，在乎喺揀咩口味，所以，第3樣嘢就揀客沙律除除罪惡感。醬汁喺搵小兜分開上，不過，最後我哋都喺倒晒落去自己撈，啲羅馬生菜好爽脆，配合煙肉、芝士碎及濃滑嘅沙律醬，鹹香清爽。

紫菜薯條

炸薯條當然食唔少啦，如配其他味道，大多數都喺加芝士，亦試過配黑松露醬，但配紫菜碎就第一次喇。估唔到，配紫菜碎效果非常好喎，薯條香脆唔油，紫菜碎令味道有層次，變得更惹味，值得留意嘅喺，一來啲紫菜碎唔喺粉，跟粉狀嘅感覺喺有些微唔同，二來佢哋唔喺炸起薯條後，就咁糝紫菜碎上面就算，堅喺一層薯條一層碎，喺心思嘅表現。

炸雞方面，可以選擇雙拼，個套餐可揀季節限定嘅黃金鹹蛋炸雞，呢個就肯定喺鐵膽，其次，仲有韓式、蜜糖芥末、甜酸、辣味、雪花芝士及檸檬柚子供選擇。我哋就一半揀黃金鹹蛋，另一半選蜜糖芥末。兩款炸雞都炸得金黃，熱氣四溢。

黃金鹹蛋炸雞

呢款炸雞會搭啲墨西哥脆片，過吓口癮咁啦，而啲炸雞表面沾滿晒鹹蛋黃，入口時嗰朕鹹蛋黃香味好濃郁，蛋黃起晒沙，而外皮仲帶脆口，雞肉卻十分之嫩滑。之不過，兩隻起，三隻止，再食有啲漏同偏鹹嘅感覺。

蜜糖芥末炸雞

蜜糖、芥末，一個甜，一個辣，真喺好有趣而又產生到化學作用嘅組合，其實，雖然喺加入芥末，實際辣度好有限，所以，就算唔食辣嘅人都啱食。佢哋啲雞，完全沾滿醬汁，呢一款都唔例外，咬落惹味，卻又有份滋潤嘅感覺。

蘋果特飲 +$10、菠蘿汁

小弟就簡單啲要杯菠蘿汁就算，因為唔喺鮮榨貨色，感覺普普通通咁啦；不過，表姨甥女杯特飲以青蘋果糖果打入梳打，青綠色夠大杯搶晒鏡，味道酸酸甜甜又夠凍，配炸雞真喺爽，仲插咗串色澤繽紛嘅軟糖添。

咪睇個套餐得3樣嘢，食完真喺好飽吓，連埋嘢飲，都喺四百鬆啲，加上啲炸嘢又真喺好食有水準，性格比高喎。

個人評分
味道：8/10
環境：7/10
服務：8/10
抵食：8/10
平均每人消費：HK$225

餐廳資料：
Sodam Chicken
中環蘭桂坊雲咸街31號地舖
2905 1668