全記餐廳：穩打穩紮午市客飯

行山一向喺秋涼嘅戶外活動，不過，最近都有同個行山老友挑戰吓，夏天如果天氣合適，都會照行。呢個周六，撞到天氣唔錯，至少唔會落雨，一於挑戰吓元荃古道，由荃灣（荃威花園）起步，一路上山經石龍拱，未到田夫仔屈條小徑落清快塘，最後終點喺深井。兩支公就唔會揀食燒鵝啦，快手快腳搵間茶記搞掂去，「全記」似乎多人啲，內鋪又有冷氣，就揀佢啦。

喺村屋鋪，鋪前有啲非冷氣位，雖然有架起帳篷，但既焗且熱，故坐嘅人唔多，喺都會喺啲想食口煙嘅人。

我哋當然揀坐入面啦，有強勁嘅冷氣，涼快好多，尤其啱啱行完山添。而內裡格局如一般茶記，細圓枱加卡位，有大電視，周牆都貼滿小炒或碟頭飯菜式。

我哋大家都懶得諗，就喺揀是日快餐 / 午市客飯， 共有8款，包例湯及熱飲，定價都喺$45-$50，價錢喺咁上下啦，況且，深井都有唔少有錢人架，茶記都唔會特別平。

例湯

例湯講明送完即止，雖然喺免費，但店員都會問你要唔要，是日嘅例湯喺赤小豆眉豆鯪魚煲粉葛，飲落一啲都唔例牌喎，夠火喉，幾濃郁添。

枝竹班腩飯 $45

「班腩」即時令我諗起早前一單酒家違反商品說明條例嘅案件，小弟就只喺當笑話一則，幾驚有啲傻人去舉報菠蘿包無菠蘿、老婆餅無老婆呀，哈哈！作為茶記，佢哋啲班腩又做得唔差喎，粉漿唔算太厚，獻汁OK，唔會太杰到好餬咁，亦唔會好似有啲酒樓咁煮到好油。

海南雞飯 $50

佢哋賣嘅海南雞喺泰式，所以，伴嘅喺泰式酸辣醬。無論雞嘅份量，抑或飯嘅份量，都份量十足，不過，飯就只喺普通白飯，唔似新加坡式用上雞油飯。而啲雞就的確好食，雞皮幾爽，皮下脂肪又少，肉質夠嫩滑，沾點酸辣醬，更醒胃。

熱奶茶、熱檸水

講過好多次，去茶記飲餐飲奶茶喺小弟必然之選，不過，「全記」嘅奶茶無乜茶香，茶底比較弱，口感亦唔太滑，極為普通。

後話，友人睇網上資料，話呢條線需時4個鐘，我哋為免正午太熱，9:00am起步，11:40am就已經到咗深井村，超額完成，梗喺啦，兩支公行起嚟都唔使點停（除停一停飲水之外），臨尾落清快塘又抄山路走捷徑，慳咗不少時間，但無行開山嘅人咪照跟，確喺有少少危險。

個人評分
味道：7/10
環境：6/10
服務：7/10
抵食：7/10
平均每人消費：HK$48

餐廳資料：
全記餐廳
深井深井村54-55號地下
2491 9550