菜式方面，印象上跟其他店應該一樣，以英式炸魚配薯條、法式烤雞為店家嘅主打，再加埋湯品、小食、沙律、香煎即日鮮魚以及自家製甜品。
飲品方面，一系列梳打、凍飲，仲有多款咖啡、花茶、啤酒及各類餐酒，真喺睇佢唔出，麻雀雖小，卻喺五臟俱全。
我記得佢哋好似無做套餐，但呢間就正正有款二人套餐，性價比非常之高，因為包兩客頭盤，主菜有炸魚，又有烤雞，包埋基本餐飲，頭盤、主菜、餐飲都可以額外加錢升級，定價都只喺$298 + 10%，更可加錢配甜品。小弟一向師奶數口，計過吓如果散點，咁食法基本要$450左右，所以，即喺打咗個七折有多呀，唔使多諗，就梗喺一家揀二人套餐啦，抵到咁。
凍檸檬茶、凍可樂
餐飲我哋就無乜特別升級轉款，可樂配炸魚，小弟已經覺得夠晒爽。順帶一提，店員嘅招呼幾好，不時幫忙添水，上菜速度又啱啱好。
炸鮮蘑菇沙律
頭盤一有3款沙律供選擇，炸鮮蘑菇感覺幾有趣，有4大粒嘅炸鮮蘑菇，粉漿又薄又脆，蘑菇爽爽哋口，沾一點沙律醬感覺無咁熱氣，中間伴有大量沙律菜，少少油醋調和，爽脆清新。
滋味海鮮籃 +$30
頭盤二可以揀湯或加錢配海鮮籃 / 煮新鮮蜆，一於熱氣到底就揀咗滋味海鮮籃，其實喺因為多心啫，因為一客海鮮籃有炸魚手指、炸鮮海蝦、炸鮮魷魚、炸蟹肉球，可以試到多啲嘢。啲海蝦好爽彈，鮮魷魚果然好柔軟，唔會韌到咬唔開，但最正就喺啲蟹肉球，成球都喺鮮蟹肉，好有蟹味；而自家調嘅他他醬亦做得出色，比就咁嘅沙律醬味道喺有層次啲。
傳統英式炸魚薯條
主菜3揀2，又喺唔使多諗，一款揀炸魚薯條，另一款揀烤雞，而炸魚薯條講明用上嚟自紐西蘭嘅藍鱈魚，但客人亦可升級至其他魚類（+$30-$55）。整份炸魚薯條頗大份，而件炸魚裁得幾厚身，炸得一身金黃，灑上少少岩鹽，切成小件放入口，外層粉漿薄而香脆，肉質嫩滑富魚鮮味。店員推介沾亨氏麥醋，專用嚟食炸魚，但小弟都喺鍾意佢哋啲自家製他他醬，酸咪咪，又唔會咁易整濕個「脆皮」。粗身薯條同樣炸得脆口不膩，好有薯仔香。
烤雞半隻配甜粟米
另一道主菜走唔甩揀硬烤雞，而伴菜可以揀甜粟米或薯蓉，炸雞已經有咁多薯條食，正路就當然配甜粟米啦，的確啲粟米唔止甜，仲非常有牛油香，如果散點嘅話，仲有其他伴菜揀添。烤雞焗得金黃，散發出陣陣香草味，堅喺外皮脆肉嫩，一啲都唔油膩，不愧招牌菜式。
晌用餐期間，堂食嘅客人唔算好多，不過，外賣客嚟完一個又一個，亦有透過foodpanda做送外賣。臨走時先發現，外賣優惠，炸魚薯條買一送一，另外，有一款外賣二人餐，包涉律、炸魚薯條、烤雞半隻及汽水2罐，平到$198，咁我就明白點解有咁多外賣訂單喇！
真喺唔好睇少個餐，食得我哋好肚，結果，甜品都無再追加，表姨甥女已經話飽到耍投降，其實份炸魚薯條喺我食咗3/4架，故此，個餐的確抵食。佢仲話，有機會可以叫吓外賣送上宿舍同宿友一齊食。
個人評分
味道：9/10
環境：7/10
服務：8/10
抵食：9/10
平均每人消費：HK$180
味道：9/10
環境：7/10
服務：8/10
抵食：9/10
平均每人消費：HK$180
餐廳資料：
Fish & Chick
西環西營盤高街27號地舖
2973 6500
Fish & Chick
西環西營盤高街27號地舖
2973 6500
沒有留言:
發佈留言