沙嗲軒 Satay Inn：軒腸掛肚下午茶

年初曾到訪過沙嗲軒，不過，就喺北角店，同幾個朋友食餐開年飯，一齊撈喜。最近，收到見到尖沙咀嘅新推廣，竟然推出咗一個「星洲三點」下午茶套餐，集幾樣星馬名物美食（榴槤、斑蘭、咖央）於一「籮」，加上小弟一向對星馬菜都甚有興趣，所以，專誠嚟會一會，一解牽腸掛肚之苦。

其實，呢一間分店都曾嚟過，不過，大大話話應喺十多年前嘅事，今回再訪，感覺環境好似無咩點變。身為酒店內嘅餐廳，裝修方面當然唔會差得去邊，環境雅致，枱與枱唔會排得太密，光猛整潔，啲布梳化椅又幾好坐，讓人感覺舒適。

「星洲三點」下午茶 $208

門前已經貼有一張大海報，介紹呢個兩人用嘅下午茶套餐，足有8款星馬美食，鹹甜點各有4款：雞肉及豬肉沙嗲、家鄉福建薄餅、香脆炸蝦餅、黃金脆魚皮、斑蘭咖央多士、椰香黑糯米、斑蘭蛋糕及榴槤雪米糍，樣樣都甚有特色，再配兩杯飲品，加上環境好，招呼好，$208呢個價真喺抵。

但性格比高唔高就要睇埋啲食物，老實講，單喺以一個竹籮，鋪上蕉葉，擺齊8款美食，富地道嘅賣相已經搶唔少分。的確，咁多樣嘢食，真喺講唔出邊樣唔好食，最得小弟歡心，就有近來大熱嘅黃金脆魚皮，炸魚皮脆到咯咯聲，又富鹹蛋黃香味；家鄉福建薄餅造型好似春卷咁，包住好多餡料，口感及味道都極富層次，微辣醒胃有驚喜；而雞豬串燒正就正在個沙嗲醬，惹味到極點，香料味豐富；至於粒榴槤雪米糍亦喺喜出望外，皆因糯米皮薄而軟糯，裡面則爆晒餡，榴槤肉味道濃郁，一試難忘。蝦餅、咖央多士、斑蘭蛋糕同樣喺水準之作，總結，性格比肯定喺超高。

凍薏米水

餐飲可以揀斑蘭奶昔、白咖啡、星洲拉茶……等等，但講到健康，功效多多嘅，首推薏米水，外表平平無奇，但飲落好有薏米嘅清甜，功效有利水消腫、健脾去濕、舒筋清熱，呢排梗喺覺得呢度唔妥，嗰度唔妥，薏米水就真喺啱晒小弟。

招牌海南雞飯 $142

嚟沙嗲軒又好難唔翻兜佢哋嘅海南雞飯，半隻海南雞賣$218，全隻賣$428，而雞油飯單賣$28碗，所以，點一客招牌海南雞飯就超划算，有雞、有飯、有埋清雞湯，況且，雞嘅份量都唔算少，並傳統咁配上三色醬料（薑蓉、特製辣椒醬、黑醬油），賣相精緻。雞肉唔單單去晒骨，食得方便，皮下脂肪少，雞皮更爽滑，雞肉質感細嫩，沾點黑醬油，食味一流；而啲雞油飯濕潤，充滿油香卻不膩，飯粒夠分明，好食。

馬來叻沙 $108

叻沙又喺另一心水推介嘅馬來粉麵，最鍾意喺叻沙嗰種濃濃香香嘅椰汁咖喱湯底，不過，沙嗲軒嘅叻沙就印象中第一次食。端上嚟嘅叻沙大大碗，外觀望落非常對辦，有鮮蝦、炸魚片、豆卜、雞蛋及唔少芽菜，餸料十分豐富，而且用料不賴；湯底亦都好得，濃郁富椰香，香氣四溢，更有從香料味而嚟嘅層次感，配以滑溜嘅瀨粉，炷炷瀨粉都沾滿汁，真喺無得點輸。順帶一提，湯底更可以揀小辣、地道風味、特辣，認真貼心。

榴槤糊 $68

只喺下午茶套餐嘅榴槤雪米糍實在滿足唔到我哋，所以，臨尾再追加一客榴槤糊，原來早前有嚟自星洲嘅大廚客席來港獻技，更為餐廳帶嚟多款新加坡風味、設計獨特嘅菜式，呢一道榴槤糊就喺其一。以椰糖加上麥米做成嘅糊底，甜味濃郁而純香，麥米煙韌而咬口，加上一大抹榴槤果肉，未食已「香」氣飄飄，入口軟滑帶黏，食埋呢碗榴槤糊，大滿足！

溫馨提示一下，上述嘅「星洲三點」下午茶由3:00pm到6:00pm供應，仲喺星期一至日都有。不妨約啲朋友嚟嘆個下午茶，迤上一個下午，試試啲咁有星馬風情特色美點，何其「疏肝」，絕對可以一掃夏日悶氣！又或校晏啲嚟試個下午茶套餐，鹹點當前菜，甜點當餐後甜品，再加兩道招牌飯麵，好似我哋咁，就已經可以當喺一頓早鳥晚餐啦。

個人評分
味道：9/10
環境：8/10
服務：8/10
抵食：9/10
平均每人消費：HK$180（指定信用卡9折）

餐廳資料：
沙嗲軒 Satay Inn
尖沙咀廣東道33號中港城皇家太平洋酒店平台1座3號舖
2738 2368