象茶 Elephant tea：不「象」預期

早前逛一逛油麻地果欄，無咩收鑊，打道回府時就必然順便行過去「駿發花園」拍卡慳$2，而行過去地鐵站時，經過呢一間賣台式茶飲嘅「象茶」，見門口企咗唔少人等外賣，好奇下過去睇睇，喺幾抵喎，見口渴就買杯嘢飲吓。

鋪旁嘅價目表就一眼睇晒所以飲品，都真喺有幾多嘢揀，一時花多眼亂。影出嚟可能啲字好細，最啱佢有啲單張攞，掃描咗貼出嚟就易睇好多。

黑糖珍珠明治鮮奶 $30

平常多數飲珍珠奶茶，今回就改飲珍珠鮮奶，皆因佢標到明用明治鮮奶，加埋心水嘅黑糖元素，都喺賣$30，感覺好抵吓。而賣相真喺幾好架，除加入大量黑糖，面面仲唧咗啲忌廉花，如果講味道，黑糖鮮奶確喺正，黑糖清甜純香，鮮奶濃郁柔滑，不過，啲珍珠腍晒嘅，完全無咬口，明顯煮過籠，令整體大打折扣。

最後，黑糖鮮奶就飲晒，剩低大部分珍珠。未知其他出品喺點，只好嘆句唔好彩，撞中珍珠搞成咁。

個人評分
味道：6/10
環境：6/10
服務：7/10
抵食：7/10
平均每人消費：HK$30

餐廳資料：
象茶 Elephant tea
油麻地文明里11-13號地下2號舖
9616 1670