璞 Agate：一「璞」多食

過嚟西九文化區除咗睇展覽之外，尤其近排有古埃及文明展，仲有喺可以搵食，今晚到訪嘅「璞」，主打高質素新派精緻中菜。雖然位處西九文化區M+下面，位置有少少隱蔽，但環境氣氛、菜式質素絕對俾到驚喜你！

剛走入餐廳，近門口兩組櫥窗櫃，放滿高級嘅中國白酒、多款頂級粵菜食材，已有種先聲奪人之效，非常搶眼。

再走入啲，大堂可以稱得上精緻高雅，又不失一份中式的古雅風，尤其中間嘅舞台及超巨型大屏幕；再加上枱和枱之間相當闊落，另一邊落地大玻璃又對住180度維港海景，嚟嘅客人普遍都喺較斯文，所以，寧舍清幽舒服。

此外，仲有啲戶外半露天位，感覺幾寫意，不過，近來天然都幾酷熱，又不時陣陣大雨，所以，都喺乖乖坐室內涼涼冷氣。

琥珀合桃、桂梅車厘茄
甫坐低，先嚟兩小份餐前小食，合桃色澤深而閃亮，咬落極之鬆脆，表面薄薄一層麥芽糖，香甜醇和而不黏牙；車厘茄已去皮，入口酸酸甜甜，最神來之筆喺加咗玉桂，令味道更具層次，兩樣都真好食。

蜜餞西班牙黑豚肉叉燒 $268

西班牙黑豚向來都有名氣，用嚟做叉燒自不然睇高一線，而最大亮點，就喺以炭爐熱住食，不單唔會令油脂凝住咗，每一口食嘅時候都熱焫焫，感覺好似新鮮燒製出嚟。而講到啲叉燒本身，的確好鬆化，半肥瘦，既有肉香，又有油脂香。另一特別之處喺附上一碟紫蘇葉，讓客人包住叉燒嚟食，味道變得好獨特，紫蘇葉有中和油脂之效，令口感變得清爽。

松茸浮萍菊花 $198

中菜有一道文思豆腐羹，喺好講求刀功嘅一道湯水，而呢道松茸浮萍菊花算喺異曲同工，湯中嘅浮萍菊花就喺以細膩嘅刀功將豆腐切成菊花狀，漂浮於松茸清湯裡，極具打卡感，而豆腐嫩滑富豆香，湯頭清甜，散發出陣陣菌香。

雲朵脆皮咕嚕肉 $268

咕嚕肉絕對喺粵菜中嘅經典之一，雖然話萬變不離中，但只要花啲心思，一樣可以平凡中顯出不平凡。以棉花糖營造出一片雲朵，意境十足，再淋上以三色椒調製嘅甜酸汁，令咕嚕肉味道酸香醒胃；此外，脆漿薄，肉質鬆化，越食越開胃，仲有菠蘿都喺新鮮貨，細節位喺菠蘿外層仲燒咗層薄薄嘅焦糖。

欖菜櫻花蝦炒蒜心苗 $238

一餐飯又點可以無碟菜架，想惹味少少就試咗呢一道蒜心苗，睇樣就平平無奇，食落你就知佢有內涵，蒜心苗咬落好爽脆，而加入咗欖菜、櫻花蝦，鹹香惹味之餘，仲多出一份富層次嘅口感。

法蔥油脆皮炸雞 $328

單睇外觀，亮麗嘅外皮，已感覺到嗰份香脆，入口果然炸功了得，外皮脆到好似薯片咁，又有少少油脂香，而雞肉食落，唔單止非常嫩滑，有微微花椒香，點點麻，更吊起雞肉嘅鮮味，真別出心裁，仲有個細心位，就喺雞肉已起骨，可謂啖啖肉，食得過癮；此外，下面嘅法蔥，細問之下，喺幾樣蔥醃製而成，襯埋啲雞肉味道更立體，再沾多一點點橄欖油，更香、更滑。

酥蔥豬油渣炒飯 $228

中國人食飯，除咗有湯、有肉、有菜之外，唔少得叫啲炒粉飯麵墊肚，豬油渣炒飯絕對喺邪惡之選，以砂鍋上枱，熱氣騰騰，再由侍應淋上甜豉油，正呀喂！飯粒炒得粒粒分明，又夠晒鑊氣，搭埋啲蔥粒、豬油渣粒、菜心梗切片，簡單樸實，卻是天作之合。

晌「璞」可靜心用餐，對住舒服嘅維港景，細味每道菜嘅特色，將人生嘅飄泊情懷拋諸腦後。停落嚟，唔喺到此為止，喺要準備走得更遠。

個人評分
味道：10/10
環境：10/10
服務：9/10
抵食：9/10
平均每人消費：HK$500

餐廳資料：
璞 Agate
地址：尖沙咀西九文化區博物館道38號M+ B1樓A號舖
電話：2656 4108