莆田 Putien：有福同享

新加坡過江龍「莆田」以賣福建莆田菜為主，今年7月先落戶晌利舞臺，估唔到事隔5個月，就再晌荷里活廣場擴展版圖。12月13日仲搞咗個「手工製作示範暨公眾試吃日」，一連幾場招待公眾人士，完全免費，無任何附帶條件，唔使買乜買物，實行讓大家齊享美味福建菜，真心有福同享。

店內嘅環境骨子古雅，薄荷綠襯白，啡白格仔地磚，假百頁窗，都有種復古風。有圓枱、方枱、梳化卡位，編排都唔算密，所以，感覺悠然自得。

除咗喺試食日，亦喺店方嘅「世界最大燕皮（扁肉皮）」挑戰「健力士世界紀錄」發佈會，所以，為隆重其事，誠邀方培清師傅示範擀製燕皮，當日就有幸一睹大師嘅傳統手藝，果然手工熟練，嘆為觀止。

有關「莆田」嘅故事就唔再多講，有興趣可以睇睇小弟之前晌利舞臺店嘅食文分享（http://garycwm.blogspot.hk/2014/07/putien.html），跟住落嚟就跟大家分享當日部份美食。

蝦苗伴紫菜
軟軟潺潺嘅紫菜，莆田特產，採割頭一朕長成嘅紫菜，產量少，營養高，鮮嫩有咬口；伴上蝦苗，襯以香醋，酸香醒胃！

冰浸苦瓜

不愧刀工幼細，碧綠嘅苦瓜切得薄透，沾蜜糖食，清甜中有回甘，而苦瓜口感爽脆涼快。

土筍凍

上次食土筍凍都無乜難度，今次再遇，當然無咩問題啦。其實對昆蟲食物一向有戒心，灼沙蟲算喺個別嘅例外，主因都喺灼完出嚟個樣無咁核突，入口煙煙韌韌似食海蜇咁，加上湯凍爽爽滑滑，所以，賣相、口感都無咁嚇人。

九轉小腸

有無「九轉」就無數，但一望就知一圈又一圈捲成，極具層次。因為滷得入味，不過，覺得今次去肥膏無上次做得咁徹底，但食落仍然唔會有臭味，而口感軟腍，又喺一道手工菜。

自製滑豆腐

因為試食關係，幾個人分享小小一碟，但都夠晒滋味。外觀跟廣東菜嘅紅燒豆腐差無幾，豆腐的確嫩滑富豆香，不愧自家製，無用來貨。配以厚肉嘅冬菇及清甜嘅蜜糖豆，稍嫌個蠔油茨濃咗少少，覺得會影響個豆味突出性。

原味燘黃瓜魚

好懷念個燘黃瓜魚（黃花魚），雖然小弟未算魚痴，但以自創2.5分鐘快速蒸煮法，只落薑蔥、海鹽，再無其他添加，魚肉真喺嫩而超滑，啖啖魚鮮味，但溫馨提示就喺骨多，要小心。

莆田扁肉湯

既然要以燕皮挑戰健力士世界紀錄，今日試菜又豈可無「莆田扁肉湯」呀！偏肉喺一啲細細粒嘅福州燕皮餃，燕皮喺搵豬肉擀製，好講功夫同耐性，湯頭清而鮮，扁肉入口滑溜而有韌勁，頗有特色。

興化米粉

試食版當然細份少少，但味道不俗，尤其米粉個口感，真喺超幼細，有啲似食銀絲米粉咁，最好就喺炒得爽身不餬口。此外，米粉內有唔少海鮮，如鮮蝦、蜆肉，又加入唔少配料，如紫菜、花生、西芹等等，認真豐富。

依家晌荷里活廣分店場更推出以紫菜蟹肉豆腐卷、興化米粉、水晶豬蹄凍、金湯莧菜、家常燜筍乾和香茅凍6款莆田精選作為下午茶套餐，更免茶位費，只收$68 + 10%。此外，更加以$30追加A選項（滷水嫩豆腐、包菜飯和蝦苗拌紫菜）或B選項（冰浸苦瓜、莆田印糕和九轉小腸），而即，又可以用$28優惠價享用花茶一客。只限每日下午2:30-4:30供應，特別節日除外，有無興趣嚟嘆個下午茶嗎？

個人評分

味道：7/10
環境：8/10
服務：7/10
抵食：8/10
平均每人消費：HK$0（試食活動）

餐廳資料：

莆田 Putien
鑽石山龍蟠街3號荷里活廣場2樓214舖
2111 8388