Häagen-Dazs：哈根大師歡樂派對迎聖誕

聖誕又就快到，好多人都會打算食飯慶祝一下，如果同你講去打鞭爐迎聖誕，會唔會感覺怪咗啲？不過，如果喺雪糕火鍋，你又點睇呢？掹住食友車邊，出席咗今個寒冬Haagen Dazs嘅歡樂派對，率先一嚐多款為今個聖誕設計新推嘅雪糕甜品、飲品，以及一睹兩款充滿節日氣氛嘅雪糕蛋糕，你準備好未？Let’s Party！

皇室堡嘅Häagen-Dazs地方特別寬敞闊落，光潔明亮，一室聖誕佈置，滿有佳節氣氛。

睇見一櫃十多款唔同口味嘅雪糕，以及唔同造型嘅雪糕蛋糕，已經好期待一陣新推嘅甜品及飲品！今次所推出嘅4款應節雪糕甜品（$106起）包括：飄雪聖誕夢、聖誕狂想曲、璀璨冬日及佳節獻禮，款款設計獨特，賣相立體且有心思。

飄雪聖誕夢

聖誕節又點可以無雪人呢？「飄雪聖誕夢」以兩球濃香軟滑嘅牛乳雪糕堆砌出造型可愛嘅小雪人，襯以法式焦糖燉蛋配仲夏野莓雪糕，營造出一份冬日暖意嘅感覺。焦糖燉蛋做得不俗，焦糖面頗焦脆，但做嘅範圍略嫌少，燉蛋挺實甜美富蛋香。如果，晌雪人頭上加頂士多啤梨「小紅帽」就更別緻。

聖誕狂想曲

你嘅聖誕狂想曲會喺點嘅？HD嘅狂想曲就以全新口味嘅焦糖香橙佛羅倫斯雪糕，加埋士多啤梨芝士餅、仲夏野莓、抹茶雪糕球，朱古力片，以及厚厚嘅花形芒果雪糕磚所譜奏而成，味道紛陳，絕對喺一份雪糕狂「嚐」曲。焦糖香橙片，同小「士的」，令誕狂想多添一份聖誕美意。

璀璨冬日

HD本身有一款堂食甜品「月影迷情」，3球雪糕配以蜜糖烤香蕉、朱古力布朗尼蛋糕及棉花糖，而依個「璀璨冬日」跟「月影迷情」如出一轍，只喺多咗塊聖誕快樂朱古力牌及樹葉形朱古力，所以，喺幾款甜品中，創意較hea嘅一款。與其成隻香蕉船咁款，不如考慮吓幻化成一架鹿車。還好喺香蕉做到有焦脆感，幾款雪糕：抹茶、朱古力同士多啤梨都好食，朱古力布朗尼蛋糕亦都濃郁綿密。

佳節獻禮

佳節當前，總會互相送上小禮物，甜品「佳節獻禮」就喺以精緻小禮物盒作為造型概念。以4塊方形脆餅作為「禮物盒」，內裡喺牛乳雪糕配以數款新鮮生果點綴，「盒底」再嚟一層芒果雪糕磚，相信你都好想拆開依份禮物。側旁裝飾喺「士的」及焦糖香橙佛羅倫斯雪糕，各款雪糕始終有一定嘅質素，尤其芒果味，最得眾人歡心。

試過多款聖誕限定嘅雪糕甜品，實在好令人回味。但想跟家人或朋友分享，就不妨考慮以下專為聖誕而設嘅雪糕蛋糕（$362起）：冬日小屋及雪白聖誕，既精緻，又充滿節慶嘅賣相，絕對能夠取悅大家。

冬日小屋

雪白聖誕

甜品以外，又點少得一啲聖誕特飲，幾款特飲又喺咪好吸引呢？小弟試咗當中嘅士多啤梨特飲，以士多啤梨牛奶、士多啤梨糖漿、忌廉及士多啤梨雪糕組成，攪勻後，冰涼透心，香滑而奶味重，如果喜歡飲奶昔嘅朋友，應該幾啱飲。

雪糕火鍋 $270

HD嘅雪糕火鍋一向都甚受歡迎，嚟到聖誕，必然要推出一個聖誕版雪糕火鍋。堂食價$270套，已包括兩盆共32球迷你雪糕（抹茶、雲呢拿、士多啤梨、仲夏野莓、曲奇雲呢拿、比利時朱古力、朱古力及夏威夷果仁，每款4球），以及一盆鮮果、朱古力布朗尼蛋糕、棉花糖及曲奇，而兩個蛋白脆餅小雪人「沐浴」於朱古力漿內，暖意無限。雪糕球沾過朱古力漿，形成脆皮效果，份外滋味，原來小雪人底下喺榛子碎，將雪糕球黏滿榛子碎再沾朱古力漿，就加更可以享受到雙倍滋味，果真壓軸閃耀登場。

為使更多人可以晌屋企享受到雪糕火鍋嘅美味，外帶嘅禮盒裝更可以成為節日送禮佳品（原價$429-$576）。本身已配備鮮紅色及深紫色嘅小火鍋爐，今次更與香港創作品牌Chocolate Rain合作，推出全新「Häagen-Dazs™雪糕火鍋 x Chocolate Rain™」限量版套裝（48個指定口味迷你雪糕球），據知數量有限，手快有，手慢無，有興趣嘅朋友良機勿失。

除咗以上各款雪糕甜品、雪糕蛋糕、雪糕火鍋外，仲有「歡樂派對禮盒裝」（$199）,一盒75ml x 15杯，包含5款口味：雲呢拿、士多啤梨、朱古力、香蕉、曲奇雲呢拿，同樣啱晒開派對之用，部份大型超市及7-11便利店已經有得買，超方便。你又會唔會已經有晒心水買邊款！

個人評分

味道：8/10
環境：8/10
服務：8/10
抵食：7/10
平均每人消費：HK$0（試食邀請）

餐廳資料：

Häagen-Dazs
銅鑼灣告士打道311號皇室堡2樓212號舖
2894 8663